އިސްތިއުނާފު މުއްދަތު ގުނުމުގެ އޮޅުންބޮޅުން: މިފަހަރު ދޫވީ ޑްރަގް އެތެރެކުރުމުގެ ދައުވާ އުފުލާފައިވާ މީހެއް

ސީލައިފް މޯލްޑިވްސް ޕްރައިވެޓް ލިމިޓެޑްގެ ވެރިޔާ ވ. ތިނަދޫ، ރެޑްހައުސް، އަހުމަދު މޫސާ މުހައްމަދު (އައްމަޓީ) ދޫކޮށްލި މައްސަލަ ދައުލަތުން އިސްތިއުނާފު ކުރުމުން، ހައިކޯޓުން އެ މައްސަލަ ބޭރުކޮށްލި އުސޫލުން އެފަދަ އެހެން މައްސަލައެއްވެސް މިވަނީ ބޭރުކޮށްލާފައެވެ. ހަމަ އެ އުސޫލުގެ މަތިންނެވެ.

އައްމަޓީގެ މައްސަލައަށް ބަލާއިރު، ކޯޓު އަމުރެއް އިސްތިއުނާފު ކުރުމަށް ދައުލަތަށް ލިބިގެންވަނީ 48 ގަޑިއިރުކަން ބަޔާންކޮށް، ދައުލަތުން ހުށައެޅި އިސްތިއުނާފު ހައިކޯޓުން ބޭރުކޮށްލީ 6 އޭޕްރީލްގައެވެ. ހައިކޯޓުގެ ފަނޑިޔާރުން ވިދާޅުވި ގޮތުގައި އިސްތިއުނާފު ގަޑި ގުނާނީ ދަށު ކޯޓުގެ އަމުރު ނެރޭތާ ހުއްޓުމެއް ނެތި 48 ގަޑިއިރު ހަމަވާ ވަގުތަށެވެ.

ވުމާއެކު، ޕީޖީ އޮފީހުން ހުށަހެޅި މައްސަލަ، 48 ގަޑިއިރު ތެރޭގައި ހުށަހެޅިފައި ނެތްކަމަށް ބަޔާންކޮށް އެ މައްސަލަ ހައިކޯޓުން ބޭރުކޮށްލީއެވެ.

ހައިކޯޓުން މިވަނީ ހަމަ އެ އުސޫލުގެ މަތިން އެހެން މައްސަލައެއްވެސް ބޭރުކޮށްލާފައެވެ.

ދައުލަތުން ގދ މަޑަވެލި އަފްޡާމް ޢަބްދުއްސައްތާރުގެ މައްޗަށް ކުރާ، ރާއްޖެއަށް މަސްތުވާތަކެތި އެތެރެކުރުމުގެ ކުށުގެ ދައުވާއަށް ބަލާއިރު، މި މައްސަލައަކީ 7 ޑިސެމްބަރު 2021ގައި ދިވެހިރާއްޖެ އައި ޕާކިސްތާނުގެ ރައްޔިތެއް ކަމަށްވާ މުނީރު އަޒީޒް އާއި، ޕާކިސްތާނުގެ ރައްޔިތެއް ކަމަށްވާ މުޙައްމަދު ޔާސީން އާއި، ޕާކިސްތާނުގެ ރައްޔިތެއް ކަމަށްވާ ބުސްރާ އަނީސް އިތުރު ބަޔަކާއި ގުޅިގެން ދިވެހިރާއްޖެއަށް މަސްތުވާތަކެތި އެތެރެކުރިކަމަށް ބުނާ މައްސަލައެކެވެ.

މި މައްސަލައާއި ގުޅިގެން އެކި ފަހަރުމަތިން އަފްޡާމް ގެ ބަންދުގެ މުއްދަތު ޖަހާފައިވާއިރު، 21 މާރޗު 2022 ގައި ބޭއްވި އަޑުއެހުމުގައި ކްރިމިނަލް ކޯޓުން ވަނީ އޭނާ އިތުރަށް ބަންދުގައި ބަހައްޓަންޖެހޭ ސަބަބެއް ނެތްކަމަށް ބުނެ ޝަރުޠުތަކާއެކު ބަންދުން ދޫކޮށްލުމަށް ނިންމަވާފައެވެ. އެ ނިންމުން ދައުލަތުން ހައިކޯޓުގައި އިސްތިއުނާފު ކޮށްފައިވަނީ މާރޗް 24 ގައެވެ.

ދައުލަތުން ބުނެފައިވަނީ އިސްތިއުނާފު މުއްދަތު ގުނުމުގައި ފުރަތަމަ މަރުހަލާގެ ކޯޓުން މައްސަލަ ނިންމި ދުވަހާއި، އިސްތިއުނާފު ކުރުމުގެ މުއްދަތު ހަމަވާ ދުވަސް ނުހިމެނޭނެ ކަމަށެވެ. އެގޮތުން ބަލާއިރު، ކްރިމިނަލް ކޯޓުގެ އަމުރު ނެރެފައިވަނީ 21 މާރޗު ވީ ހޯމަ ދުވަހުގެ ހަވީރު 16:20 ގައެވެ.

ދައުލަތުން ބުނާ ގޮތުގައި، ފުރަތަމަ މަރުޙަލާގެ ކޯޓުން މައްސަލަ ނިންމި ދުވަހަކީ އެއީއެވެ. އަދި އެއީ އިސްތިއުނާފު މުއްދަތު ގުނުމުގައި ބަލާނެ ދުވަހެއް ނޫނެވެ.

އޭގެ އިތުރުން، އިސްތިއުނާފު މުއްދަތު ހަމަވާ ދުވަސްވެސް ނުގުނާނެކަމަށް ޝަރީއަތް ކުރުމާބެހޭ ޖިނާއީ އިޖުރާއަތުގެ ޤަވާއިދުގެ 169 ވަނަ މާއްދާގައި ބަޔާން ކޮށްފައިވާއިރު، އިސްތިއުނާފު މުއްދަތު ހަމަވަނީ 24 މާރޗުވާ ބުރާސްފަތި ދުވަހަށެވެ. އެއީވެސް ނުގުނާނެ ދުވަހެއްކަމަށް ދައުލަތުން ފާހަގަ ކުރެއެވެ. ވުމާއެކު، ދައުލަތުން އެ އަމުރު އިސްތިއުނާފު ކޮށްފައިވަނީ މާރޗް 24 ވީ ބުރާސްފަތި ދުވަހު ހެނދުނު 10:10 ގައެވެ.

ދައުލަތުން މި ފާހަގަކުރި އުސޫލަށް ހައިކޯޓުގައި މި މައްސަލަ ބެއްލެވި ފަނޑިޔާރު ހާތިފް ހިލްމީގެ ރައުޔުގައިވެސް ތާއީދު ކުރައްވާފައިވެއެވެ.

އެހެންނަމަވެސް، ބާކީ ތިއްބެވި ދެ ފަނޑިޔާރުންގެ އަޢުލަބިއްޔަތުން ވަނީ ދަށު ކޯޓުން އަމުރު ނެރުނު ވަގުތުން ފެށިގެން ވިދިވިދިގެން 48 ގަޑިއިރަށް ވަގުތު ގުނައި، މި މައްސަލަ ހުށައަޅާފައިވަނީ އިސްތިއުނާފު މުއްދަތު ހަމަވި ފަހުންކަމަށް ކަނޑައަޅާފައެވެ.

އަދި މިމައްސަލައަކީ އިޖުރާއީ ގޮތުން ކުރިއަށް ގެންދެވޭނެ މައްސަލައެއް ކަމުގައި ނުވާތީ، ދައުލަތުގެ ފަރާތުން ހުށަހަޅާފައިވާ އިސްތިއުނާފީ ނުކުތާތަކާ މެދު ގޮތެއް ކަނޑައަޅަންޖެހޭ ކަމުގައި ނުފެންނަކަމަށް ހައިކޯޓުގެ ޙުކުމުގައި ފާހަގަކޮށްފައިވެއެވެ.

އައްމަޓީ ދޫކޮށްލި މައްސަލައިގައިވެސް ހައިކޯޓުން މުއްދަތު ގުނާފައިވަނީ ހަމަ މި އުސޫލުންނެވެ. އެ މައްސަލައިގައި ހައިކޯޓުން ނިންމި ނިންމުން ދައުލަތުން ސުޕްރީމް ކޯޓުގައި އިސްތިއުނާފު ކޮށްފައިވާއިރު، ސުޕްރީމް ކޯޓުން މިހާރު ވަނީ އެ މައްސަލަ ބަލައިގެންފައެވެ.