އެމްބާޕޭގެ ނިންމުމަށް މެސީ އާއި ނޭމާއަށް ނުފޫޒު ނުފޯރުވޭނެ

ޕީއެސްޖީގެ ޒުވާން ތަރި ކީލިއަން އެމްބާޕޭގެ ނިންމުންތަކަށް އެޓީމުގެ ނޭމާ އަދި ލިއޮނެލް މެސީއަށް ބާރު ނުފޯރުވޭނެކަމަށް އެމްބާޕޭ ބުނެފިއެވެ.

އެމްބާޕޭ ވަނީ މީގެ ކުރިން އޭނާއާއި ނެތް ގާތް ގުޅުމެއް މިހާރު މެސީ އާއި ނޭމާ ބާއްވަން މަސައްކަތް ކުރާތީ އެކަމަށް ފާޑު ކިޔާފައެވެ. އުމުރުން 23 އަހަރުގެ އެމްބާޕޭ ބުނީ މީގެ ކުރިންވެސް ވާނީ އެކަން ހާމަކޮށްފައި ކަމަށެވެ.

ކުރިއަށް އޮތް ސަމަރ ޓްރާންސްފަރ މާކެޓުގައި ޕީއެސްޖީ ދޫކޮށް ރެއާލް މެޑްރިޑްއަށް އެމްބާޕޭ ބަދަލުވާނެ ކަމުގެ އަޑުތައް ވަނީ ގަދަވެފައެވެ. މިއާއެކު ޕީއެސްޖީން އަންނަނީ އެމްބާޕޭ ޓީމުގައި މަޑުކުރުވުމަށް ކުރެވެން ހުރި ހުރިހާ ކަމެއް ކުރަމުންނެވެ. މީގެ ކުރިން އެމްބާޕޭ އާއި ނޭމާ އަދި މެސީގެ މެދުގައި އޮންނަ ގުޅުން އެހާ ރަނގަޅެއް ނޫނެވެ. އޭރު ބޮޑަށް ފެނުނީ މެސީއާއި ނޭމާގެ ގާތް ގުޅުމެވެ. މިކަމާއި އެމްބާޕޭ ފާޑުވެސް ކިއެވެ.

ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ އެމްބާޕޭ ޓީމުގައި މަޑުކުރުވަން އޭނާ ވަރަށް ބޮޑަށް ބޭނުންވާ ކަމަށެވެ. ނަމަވެސް ޓީމާއި އެމްބާޕޭގެ މެދުގައި މަޝްވަރާތައް ކުރިއަށް ދަނީ އެދެވޭ ގޮތަށް ނޫންކަންވެސް ޕޮޗެޓީނޯ ހާމަކުރިއެވެ.

މި ސީޒަން ނިމުމަށްފަހު ޓީމު ދޫކޮށްލާނެކަން ނުވަތަ ނޫންކަން އެމްބާޕޭ މިހާތަނަށް ހާމަކޮށްފައެއް ނުވެއެވެ.