ސަރުކާރު އޮފީސްތަކުން ހިންގާނެ އައު މަޝްރޫޢުތައް ފިނޭންސް މިނިސްޓްރީ އަށް އެންގުމަށް އެދެފި
ނިއު ޕޮލިސީ އިނިޝިއޭޓިވްސް އަދި އާމްދަނީ އިތުރުކުރެވިދާނެ ގޮތްތައް 30 ޖޫންގެ ކުރިން ހުށަހެޅުމަށް އެދިފައިވޭ
ފިނޭންސް މިނިސްޓްރީ
ދައުލަތުގެ ހުރިހާ އޮފީސްތަކުން ސަރުކާރުގެ ލަނޑުދަނޑިތައް ހާސިލުކުރުމަށް 2023 ން 2025ށް ލަފާކުރާ ނިއު ޕޮލިސީ އިނިޝިއޭޓިވްސް އަދި އާމްދަނީ އިތުރުކުރުމަށް ކުރެވިދާނެ ކަންކަން ހުށަހެޅުމަށް ފިނޭންސް މިނިސްޓްރީން އޮފީސްތަކަށް އަންގައިފިއެވެ.
ފިނޭންސް މިނިސްޓްރީއިން ނެރެފައިވާ ސަރކިޔުލަރ ގައި ވަނީ ނިއު ޕޮލިސީ އިނިޝިއޭޓިވްސް އަދި އާމްދަނީ އިތުރުކުރެވިދާނެ ގޮތްތައް 30 ޖޫންގެ ކުރިން ހުށަހެޅުމަށް އޮފީސްތަކަށް އަންގާފައެވެ. ނަމަވެސް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ބަޔާންކޮށްފައިވާ ލޯކަލް ކައުންސިލުތައް އެސަރކިޔުލަރ އަށް އަމަލުކުރުމުން އިސްތިސްނާވާނެކަމަށް ބުނެފައިވެއެވެ
ފިނޭންސުން ބުނީ ނިއު ޕޮލިސީ އިނިޝިއޭޓިވްސް ހުށަހަޅާނީ mv.gov.isles މެދުވެރިކޮށްކަމަށެވެ.
އަދި ނިއު ޕޮލިސީ އިނިޝިއޭޓިވްސް އެކުލަވާލުމުގައި، ދައުލަތުގެ އޮފީސްތަކުން ހުށަހަޅާ ކަންތައްތަކަކީ ސަރުކާރުން އެކުލަވާލާފައިވާ އެސް.އޭ.ޕީ އަދި އެން.އާރް.އާރްގައި ހިމެނޭ ކަންތައްތައް ހާސިލްވާނެގޮތަށް އެކުލަވާލާފައިވާ ކަންތައްތައްކަމުގައި ވާންވާނެކަމަށް ބުނެފައިވެއެވެ. މީގެއިތުރުން ނިއުޕޮލިސީ އިނިޝިއޭޓިވްސްގެ ގޮތުގައި ހުށަހަޅާ ޕްރޮގްރާމް ނުވަތަ މަޝްރޫޢުގެ ސަބަބުން މިންތީގެ ހަމަހަމަކަމަށް ކުރާނެ އަސަރާއި ސަސްޓެއިނަބަލް ޑިވެލޮޕްމަންޓް (އެސް.ޑީ.ޖީ) ގޯލްތަކާއި ހުރި ގުޅުން ބަޔާންކުރަންވާނެކަމަށްވެސް އެމިނިސްޓްރީއިން ބުނެފައި ވެއެވެ.
ހަމަމިއާއެކު، ދައުލަތުން އާންމުންނަށް ފޯރުކޮށްދޭ ޚިދުމަތްތަކަށާއި އިންވެސްޓްމަންޓަށް ކުރަންޖެހޭ ޚަރަދުތައް ހަމަޖެއްސުމަށް އަދި ރާއްޖޭގެ ފިސްކަލް ހާލަތު ރަނގަޅުކުރުމަށް ދައުލަތަށް ލިބޭ އާމްދަނީ ދެމެހެއްޓުމަށް ކުރަންޖެހޭ މަސައްކަތްތަކުގެ ތެރެއިން، ސަރުކާރުގެ ލަނޑުދަނޑިތައް ހާސިލުކުރުމަށް ހުށަހަޅާ ނިއު ޕޮލިސީ ހުށަހަޅާ ފަދައިން 2023 އިން 2025 އަށް ދައުލަތުގެ އާމްދަނީ އިތުރުކުރެވޭނެ ގޮތްތައް ދެނެގަނެ، މި ފަދަ ގޮތްތައް އެ މިނިސްޓްރީއަށް ހުށަހެޅުމަށްވެސް އެދިފައިވެއެވެ.
މީގެއިތުރުން ދައުލަތުގެ ބަޖެޓުން 2022 ވަނަ އަހަރު ހިންގުމަށް ރައްޔިތުންގެ މަޖިލީހުން ފާސްކޮށްފައިވާ ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގައި ހިމެނޭ މަޝްރޫޢުތަކުގެ ތެރެއިން، އައިލްސް ޕޯޓަލުގައި މަޢުލޫމާތު ފުރިހަމަ ނުކޮށްހުރި މަޝްރޫޢުތަކުގެ މަޢުލޫމާތު 15 މެއިގެ ކުރިން ފުރިހަމަކުރުމަށްވެސް ފިނޭންސް މިނިސްޓްރީއިން އެދިފައިވެއެވެ.
