މިދުވަސްވަރަކީ ރާއްޖެއާއި އެންމެ އަވަށްޓެރި ސިލޯނުގެ ނުވަަތަ ސްރީލަންކާގެ މަސްރަހު ނާމާން ދުވަސްވަރެކެވެ. އަމާން އުފާވެރި އައްސޭރިއެއް އެގައުމަށް ގެނައުމަށް މަސައްކަތްތައް ކުރެވޭ ދުވަސްވަރެކެވެ.

ރާއްޖެއާއި ސްރީލަންކާގެ ގުޅުންތަކަކީ ރާއްޖެ އާބާދުވީއްސުރެ ގާއިމުވެފައިވާ ގުޅުންތަކެކެވެ. ދިވެހީންގެ އަސްލާއި ނަސްލާއި ބަހާއި ތާރީޚާއި ސަގާފަތުން މިކަމުގެ ސާބިތު ހެކިތައް ފެންނަން އެބަހުއްޓެވެ.

ސިލޯނު އިނގިރޭސީންގެ އިސްތިއުމާރުގެ ދަށުގައި 1815އިން 1948އަށް އޮތެވެ. މި މުއްދަތުގެ ތެރެއިން 1987 ނުވަތަ 1889ން 1948އަށް ރާއްޖެ އިނގިރޭސީންގެ ހިމާޔަތުގެ ދަށުގައި އޮތް ދުވަސްވަރު ރާއްޖޭގެ ކަންކަން އިނގިރޭސި ދައުލަތުގެ ފަރާތުން ބެލެހެއްޓެވީ ސިލޯނުގައި ހުންނެވި އިނގިރޭސި ގަވަރުނަރެވެ. 1948ން 1965އަށް ރާްއްޖެ މިނިވަންވުމާއި ހަމަޔަށް ރާއްޖޭގެ ކަންކަން އިނގިރޭސި ދައުލަތުގެ ފަރާތުން ބެލެހެއްޓެވީ ސިލޯނުގައި ހުންނެވި އިނގިރޭސި ސަފީރެވެ.

ރާއްޖެއާއި ސްރީލަންކާގެ ގުޅުންތަކުގެ ތެރެއިން "ރަހަަތަފާތު" ވާހަކައެއް ދައްކާލަމާތޯއެވެ.

މިގޮތުން ބަލާއިރު، ރާއްޖެއިން ބޭރުގައި ދިވެހި ދައުލަތުގެ އަމިއްލަ ބިންބިން ހުރިކަން މިހާރުގެ ޖީލުގެ ގިނަބަޔަކަށް އެނގޭ ބާވައެވެ.

އެއީ ސިލޯނުގައި ހުރި، ދިވެހި ދައުލަތުގެ ބިންތަކުގެ ވާހަކައެވެ. މިގޮތުން މަޝްހޫރު "ސޯސަންވިލާ" ހިމެނެއެވެ.

މިބިމުގެ އިމާރާތާއި ގޯތި ދިވެހި ސަރުކާރަށް ބައްލަވައިގަތީ 1947 ވަނަ އަހަރުއެވެ. ބޮޑުމިނުގައި ދެއޭކަރުގެ ބިމެކެވެ. މިބިން ފުރަތަމަ ބޭނުން ކުރެވުނީ ލަންކާގައި ކިޔަވަން ފޮނުއްވާފައިތިބި ދިވެހި ފިރިހެން ކުދިންގެ ބޯޑިންގ ހައުސްއެއްގެ ގޮތުގައާއި، ދައުލަތުގެ ބައެއް އިއްޒަތްތެރިން، ކުރު ދަތުރުތަކުގައި ކޮޅުނބަށް ވަޑައިގެން ތިއްބެވުމަށެވެ.

ނަވާރަސަތޭކަ ހަތްދިހައިގެ އަހަރުތަކުގެ ތެރޭގައި މިތަން ބޭނުންކުރެވުނީ، މޯލްޝިޕްގެ "ޝިޕް ސްޓޯރ" ގެ ނަމުގައެވެ.

ސިލޯނުގައި މިހާރު ހުރި، ދިވެހި ދައުލަތުގެ އަނެއް ބިމަކީ، މަޝްހޫރު "ފެހިގެ" ނުވަތަ "އެވަރ ގްރީން"އެވެ.

ވޯރާ ވިޔަފާރިއެއްގެ އަތުން، ދިވެހި ސަރުކާރުން މިބިން ބައްލަވައިގަތީ 1948 ވަނަ އަހަރުއެވެ. މިތާނގައި ރާއްޖޭގެ ސަފީރު އޮފީސް ހިންގެވިއެވެ. އަދި ރެސިޑެންސް ބައެެއްވެސް ހިމެނެއެވެ. ސަފީރާއި އާއިލާ ދިރިއުޅުއްވިއެވެ.

ދައުލަތުގެ އެންމެ މަތީ ވެރިޔާ ވަޑައިގެން ހުންނެވުމަށްވެސް ޚާޢްސަ ކޮޓަރިކޮޅެއްވެސް ހިމެނެއެވެ ސިލޯނުގައި ހުރި، ދިވެހި ދައުލަތުގެ ބިންބިމަކީ، އެމްބެސީ އިމާރާތް ހުރި ބިން "ފެހިގެ" (25، މެލްބޯން އެވެނިޔު، ކޮލޮމްބޯ 4)އާއި، ސޯސަންވިލާ (ޕާމަންކަޑަ، ކަވިރަތުނަ ޕްލޭސް)އެވެ.

1948 ވަނަ އަހަރު ފެހިގެ ދިވެހި ސަރުކާރުން ބައްލަވައިގަތް ދުވަސްވަރު، ފެހިގޭގެ ބިއްދޮށުގައި ހުރި އިމާރާތަކާއި ގޯތި ބައްލަވައިގަނެ، ފެހިގޭގެ ގޯއްޗާ އެއް އިން ކުރެއްވިއެވެ. އެ ތަނަށް ކިޔަނީ "ކޯޒީ ކޯނަރު"އެވެ.

ވީމާ، ސިލޯނުގައި ރާއްޖޭގެ އެމްބަސީ ނުވަަތަ ހައިކޮމިޝަން ހުރި ބިމަކީ ދިވެހި ދައުލަތުގެ އަމިއްލަ ބިމެކެވެ.

މީގެ އިތުރުންވެސް ދިވެހި ސަރުކާރުން (ދިވެހި ރައްޔިތުންނަށް ކާޑުގަތުމަށް) ސިލޯނަށް ފޮނުވުނު ފައިސާއިން ސަރުކާރުގެ ވެރިޔާ އަލްއަމީރު ޙަސަން ފަރީދު ދީދީ 1942ގައި ކެންޑީ އިން ބަގީޗާއެއް ބައްލަވައިގެންނެވި ކަމަށް ބުނެވެއެވެ.

1944ގައި އަލްއަމީރު ޙަސަން ފަރީދު ދީދީ ނެތިވެދިއުމަށްފަހު، އެބަގީޗާ ވިއްކަވާލައްވައި އެފައިސާއިން ރައްޔިތުންނަށް ކާޑު ގެންނެވީ އަލްއަމީރު އިބްރާހީމް ފާމުލަދޭރި ކިލެގެފާނެވެ.