ރާއްޖޭގެ ފުރަތަމަ 2 ރައީސުން، ރަސްމީ ގެކޮޅުގައި ދިރިނޫޅުއްވައި އަމިއްލަ ގެކޮޅުގައި ދިރިއުޅުއްވި ސަބަބަކީ ކޮބާ؟

ދިވެހިރާއްޖެއަކީ ޒަމާންވީ ރަސްކަމެއް ކުރަމުންއައި ގައުމެކެވެ. "ރާއްޖެ" މިލަފުޒުގެ ލަފުޒީ މާނައެއް ކަމުގައި ރަސްކަން (މަމްލިކާ / ކިންޑްގަމް) ވެއެވެ. "ރާއްޖެ" މިލަފުޒުގެ މިހާރުގެ މަފުހޫމަކީ ގައުމެވެ.

މީލާދީގޮތުން ބަލާއިރު ރާއްޖެ އިސްލާމްވި 1153 އިން ފެށިގެން ބަރަބާރު 800 އަހަރުގެ އިސްލާމީ ރަސްކަމަކަށްފަހު، ދިވެހިރާއްޖޭގެ ވެރިކަން ޖުމުހޫރިއްޔަތަކަށް ބަދަލުވީ 1953ގައެވެ.

މި 800 އަހަރަށް ބަލާއިރު 80ށް ވުރެ މަދުނޫން އަދަދެއްގެ ރަސްރަސްކަލުން ދިވެހިރަސްކަމުގެ ސިންގާސަނާގައި ރެދަލިކުރެއްވިއެވެ. މިރަސްރަސްކަލުން ރަސްމީ ހައިސިއްޔަތުން ދިރިއުޅުއްވާފައި ވަނީ ވެރިރަށް ފުރަމާލޭގެ ރަސްކަމުގެ ގަނޑުވަރުގައެވެ. ނުވަތަ ރަސްކަމުގެ ކޮއިލުގައެވެ.

ރާއްޖޭގެ ރަސްކަން 1968ގައި ނިމުމާއި ހަމަޔަށް ހުރި ރަސްކަމުގެ ގަނޑުވަރު ހުރި ބިމަކީ، 1970ގެ އަހަރުތަކުން ފެށިގެން ސަލްޓަން ޕާކު ހުރި ބިމެވެ. އެބިމަކީ ރާއްޖޭގެ ރަސްކަމުގެ ކޮއިލު 400 އަހަރަށްވުރެ ގިނަޒަމާންތަކުގައި ހުރި ތާރީޚީ ބިމެއްވެސްމެއެވެ.

ރާއްޖޭގެ ޖުމުހޫރީ ރައީސުންގެ ރަސްމީގެކޮޅާއިބެހޭ މުހިންމު ބައެއް މައުލޫމާތު

މުލީއާގެ(ކުރީގެ ހެންވޭރު ގަނޑުވަރު) ދާރުއްރިޔާސަތު (ފުރަތަމަ ޖުމްހޫރިއްޔަތު 1 ޖަނަވަރީ 1953 - 21 އޮގަސްޓު 1953)

ފުރަަތަމަ ޖުމްހޫރިއްޔަތުގައި ޤައުމުގެ ރައީސް ސުމުއްވުލްއަމީރު މުޙައްމަދު އަމީނު ދޮށިމޭނާ ކިލެގެފާނު، ރަސްމީ ކަންކަން ކުރެއްވުން އޮންނަނީ ދާރުއްރިޔާސަތު (މުލީއާގެ) ގައެވެ. އެކަމަކު ދިރިއުޅުއްވީ އަމިއްލަފުޅުގެކޮޅު ކަމަށްވާ އަތިރީގޭގައެވެ.

މުލީއާގެ/ ރައީސުލްޖުމްހޫރިއްޔާގެ ރަސްމީގެ (11 ނޮވެންބަރު 1968 - 11 ނޮވެންބަރު 1978)

ރައީސުލްޖުމްހޫރިއްޔާ ސުމުއްވުލްއަމީރު އިބްރާހީމް ނާޞިރު ރަންނަބަނޑޭރި ކިލެގެފާނު ނިޝާން ޣާޒީގެ ޢިއްޒަތްތެރިވެރިޔާ ދިރިއުޅުއްވީ އަމިއްލަފުޅު ގެކޮޅު ވެލާނާގޭގައެވެ. އެކަމަކު ރައީސްގެ ރަސްމީ ގެޔަކީ މުލީއާގެ ކަމަށް ބަޔާންވެގެންވެއެވެ.

މުލީއާގެ/ ރިޔާސީ ގަނޑުވަރު (11 ނޮވެންބަރު 1978 - 7 ފެބުރުވަރީ 1995)

ތީމުގެ/ ރިޔާސީ ގަނޑުވަރު (7 ފެބުރުވަރީ 1995 - 11 ނޮވެންބަރު 2008)

ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް (ނިޝާން ޣާޒީގެ ޢިއްޒަތްތެރިވެރިޔާ) މުލީއާގެ އަދި ތީމުގޭގައި ދިރިއުޅުއްވާފައިވެއެވެ.

މުލީއާގެ/ ރައީސުލްޖުމްހޫރިއްޔާގެ ރަސްމީގެ (6 ފެބުރުވަރީ 2009ން މިހާތަނަށް)

ރައީސުލްޖުމްހޫރިއްޔާ މުޙައްމަދު ނަޝީދު 6 ފެބުރުވަރީ 2009ން 7 ފެބުރުވަރީ 2012ށް، ރަސްމީގޮތުން މުލީއާގޭގައި ދިރިއުޅުއްވިއެވެ.

ރައީސުލްޖުމްހޫރިއްޔާ ޑރ މުޙައްމަދު ވަޙީދު، ރަސްމީގޮތުން 7 ފެބުރުވަރީ 2012ން 17 ނޮވެންބަރު 2013ށް، ރަސްމީގޮތުން ދިރިއުޅުއްވީ ހިލާލީގޭގައެވެ.

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް 1 މާރިޗު 2016ން 17 ނޮވެންބަރު 2018ށް، ރަސްމީގޮތުން ދިރިއުޅުއްވީ ހިލާލީގޭގައެވެ.

ރައީސުލްޖުމްހޫރިއްުޔާ އިބްރާހީމް މުޙައްމަދު ޞާލިޙް 17 ނޮވެންބަރު 2018ން ފެށިގެން ރަސްމީގޮތުން ދިރިއުޅުއްވަނީ މުލީއާގޭގައެވެ.

މިއާއެކު އުފެދޭ ސުވާލަކީ ރާއްޖޭގެ ފުރަތަމަ 2 ރައީސުން (ސުމުއްވުލްއަމީރު މުޙައްމަދު އަމީނު ދޮށިމޭނާ ކިލެގެފާނާއި، ސުމުއްވުލްއަމީރު އިބްރާހީމް ނާޞިރު ރަންނަބަނޑޭރި ކިލެގެފާނު) ރަސްމީ ގެކޮޅުގައި ދިރިނޫޅުއްވައި އަމިއްލަ ގެކޮޅުގައި ދިރިއުޅުއްވި ސަބަބަކީ ކޮބައިބާވައެވެ!!