ދިވެހީންނަށް ދިވެހި ނަންނަން ކިޔުމުގެ ސަގާފަތު ނުއުވި 9 ގަރުނު ވަނީ!
18 އޯގަސްޓު 2021 | ބުދަ 10:50ރާއްޖެ އިސްލާންވުމަށްފަހުގައި ވެސް އަރަބި ނަންނަން ކިޔަމުން އައީ ދިވެހި އަޑަށް ފައްތައިގެން
ދިވެހިންނަށް ކިޔައި އުޅުނު ދިވެހި ސަގާފީ ނަންނަން
ދިވެހިރާއްޖެ މީގެ 895 އަހަރު ކުރިން ހިޖުރީގޮތުން 548 ގައި އިސްލާންވުމުގެ ކުރިން ދިވެހީންނަށް ކިޔާފައިހުރީ ދިވެހި ނަންނަމެވެ. އަދި ރާއްޖެ އިސްލާމްވި ގަރުނު ކަމަށްވާ ހިޖުރައިން 6 ވަނަ ގަރުނާއި، 7 ވަނަގަރުނާއި 8ވަނަ ގަރުނު، އަދި މީލާދީން 12 ވަނަ ގަރުނާއި 13 ވަނަ ގަރުނާއި 14 ވަނަ ގަރުނުގައި ބައެއް ރަސްރަސްކަލުންނާއި ރަނިންނަށް ދިވެހި ނަންނަން ކިޔާފައިވެއެވެ.
އެގޮތުން
އިސްލާން ދިވެހިރާއްޖޭގެ 2 ވަނަ ރަސްގެފާނު އައްސުލްތާން މުތެއި ކަލަމިންޖާ ((1166-1184މ)
4 ވަނަ ރަސްގެފާނު އައްސުލްތާން ދިނެއި ކަލަމިންޖާ (1192-1198މ)
5 ވަނަ ރަސްގެފާނު އައްސުލްތާން ދިހެއި ކަލަމިންޖާ (1198-1213މ)
6 ވަނަ ރަސްގެފާނު އައްސުލްތާން ވަޑި ކަލަމިންޖާ (1213-1232މ)
މި ރަސްރަސްކަލުން ފާހަގަކޮށްލެވެއެވެ.
ސޯމަވަންސަ ވަންހަ ނުވަތަ ހަނދުވަންހައިގެ މިނޫންވެސް ގިނަ ރަސްރަސްކަލުންނަށް ކިޔާފައި ވަނީ ދިވެހި ނަންނަން ފާހަގަކުރެވެއެވެ. އަދި ސަތުހިރި އައިސިރިފަދަ ދިވެހި ނަންނަމުގެ ވަޒީރުން ވެސް އެދުވަސްވަރު ތިއްބެވިއެވެ.
ރާއްޖޭގެ އެންމެމަތީ ވެރިކަން ކުރެއްވި އަންހެން ދެތިން ރަނިކަނބަލުންގެ ތެރެއިން 2 ރަނި ކަނބަލަކަށް ދިވެހި ނަން ކިއިފައވެއެވެ. އެއީ އައްސުލްތާނާ ރާދަފަތި ކަނބައިދިކިލެގެ (1359މ) އަދި އައްސުލްތާނާ ދާއިން ކަނބައިދިކިލެގެ (1363-1367މ) އެވެ.
ވޭތުވެދިޔަ 9ވަރަކަށް ގަރުނު ނުވަތަ 900 ވަރަކަށް އަހަރު ދިވެހި ނަންނަން ދިވެހިންނަށް ކިޔާފައިވެއެވެ. އަދި އަރަބި ނަންނަން ކިޔާފައިވިޔަސް އެއީ ރަސްމީ ލިޔުންތަކަށް ނުވަތަ ފޮތުގެ ނަމެއްގެ ގޮތުގައި އެކަނި ބަލައި، ދިވެހި ނަންނަން އާންމުކޮށް ކިޔުމުގެ ސަގާފަތަށް ވެސް 900 އަހަރުވަނީއެވެ.
ދިވެހިންނަށް އާންމުކޮށް ކިޔާއުޅުނު ނަންނަމުގެ ތެރެއިން ފޮތުގެ ނަމާއި އާންމު ނަމަކީ ކޮބައިކަމުގެ ބައެއް މިސާލުތައް ދަންނަވައިލާނަމެވެ.
ފިރިހެން
ފޮތުނަން - އާދަމް
އާންމުނަން- އާދަނު/އެޑަމް
ފޮތުނަން - އިބްރާހީމް
އާންމުނަން - އުނބުށޭމު/އިބޫ
ފޮތުނަން - އިސްމާއީލް
އާންމުނަން އިސްމާލު/އިއްސޭ
ފޮތުނަން - ޔޫސުފް
އާންމުނަން ޔޫސުބު/ ޔޫސޭ
ފޮތުނަން - އަބްދުﷲ
އާންމުނަން - އަބުދު، އަބުދާާ/ އައަލޯ، އަބުޅޯ
ފޮތުނަން މުހައްމަދު
އާންމުނަން -މޮހޮދޭ/ މުހައްމާ، މޯޑް
ފޮތުނަން - އަހުމަދު
އާންމުނަން އަހަންމަދު/ އަންދު، އަންމަޑޭ
ފޮތުނަން - އަލީ
އާންމުނަން - އައްޔު، އައްޔަ، އަލިބެ
ފޮތުނަން - ގާސިމް
އާންމުނަން - ކާސިމު
ފޮތުނަން - ހަސަން
ޢާންމުނަން ހަސަނު
ފޮތުނަން. - ހުސައިން
އާންމުނަން ހުސޭނު/ ހުސެން
އަންހެން
ފޮތުނަން - މަރްޔަމް
އާންމުނަން މަރިޔަނބު، މަރިޔަން/ މަރީ
ފޮތުނަން - ޒުލައިޚާ
އާންމުނަން - ދަލޭކަ
ފޮތުނަން. - ސަންފަ
އާންމުނަން ސަންޕަ
ފޮތުނަން - ޚަދީޖާ
އާންމުނަން - ކަތްދަ/ހައްޖަ
ފޮތުނަން - އާމިނަތު
އާންމުނަން އާމިނަ، އާމިނާ/އައިންތު
ފޮތުނަން - ފާތިމަތު
އާންމުނަން ފާތުމަ/ފާތުން
ފޮތުނަން - އާއިޝަތު
އާންމުނަން އައިސަ/އައިސްތު، އައިސާ
ދިވެހި ނަންނަން
ފިރިހެން
ރަދުން/ރަސްގެފާނު
ކަލަމިންޖާ
މަނިއްޕުޅު
ކަލާފާނު
މަތުއްކަލާ
ކަޅުތުއްކަލާ
ދޮންތުއްކަލާ
ކަލާ
ސީދީ
ތުއްތީދި
ރަހާ
ތަކުރު
ތުއްތު
މަނިކު
ކަލޯ
އަންހެން
ރަނި
ރެހެންދި
ރާދަފަތި
ކަނބައިދި
ކަނބާ
މާވާ
ސިއްތި
ދޮންދީދީ
ދޮށީދީދި
މެއްދީދި
ޅަދީދި
ހިޔަލަ
ކަމަނަ
ރަނާ
މަނިކެ
ކަނބުލޮ
ގޮއްޔެ
މަންޖެ
ދި/ދިޔެ
ކަލާއަކީ 1940ގެ އަހަރުތަކުގެ ކުރިން ހަމައެކަނި ފިރިހެނުންނަށް ބޭނުންކުރި ނަމެކެވެ. އަންހެނުންނަށް ކަނބާއެވެ. ކަލާ ދެޖިންސަށް ވެސް ބޭނުންކުރަން ފެށުނީ 1940ގެ އަހަރުތަކުގައެވެ. އަމީނީ ދައުރުގައެވެ.
ކަލާ / ކަނބާ
ކަލާފާނު / ކަނބާފާނު
ކަލުން / ކަނބަލުން
