ވަށައިގެންވާ ވެއްޓަކީ ދުޅަހެޔޮ ވެއްޓަކަށް ވެގެން މެނުވީ ހަގީގީ ދުޅަހެޔޮކަމެއް ނުލިބޭނެ: ނައިބު ރައީސް
ދިވެހިރާއްޖެ ފާހަގަވެގެން ގޮސްފައިވަނީ، ތިމާވެއްޓަށް އަންނަމުންދާ ނޭދެވޭ އަސަރުތަކާއި ތިމާވެށީގެ ނާޒުކުކަން ބައިނަލްއަގުވާމީ މުޖުތަމައުގައި ހާމަކޮށްދޭ ގައުމެއްގެގޮތުގައި
ނައިބު ރައީސް ފައިސަލް ނަސީމް
ވަށައިގެންވާ ވެއްޓަކީ ދުޅަހެޔޮ ވެއްޓަކަށް ވެގެން މެނުވީ ހަގީގީ ދުޅަހެޔޮކަމެއް ނުލިބޭނެކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ދުނިޔޭގެ ސިއްހަތު ދުވަސް ފާހަގަކުރުމަށްޓަކައި ޣިޔާސުއްދީން އިންޓަރނޭޝަނަލް ސްކޫލުގައި ބޭއްވި ރަސްމީ ޖަލްސާ ޝަރަފުވެރިކޮށްދެއްވައި ވާހަކަދައްކަވަމުން ނައިބު ރައީސް ވިދާޅުވީ, ދިވެހިރާއްޖެ ފާހަގަވެގެން ގޮސްފައިވަނީ, ތިމާވެއްޓަށް އަންނަމުންދާ ނޭދެވޭ އަސަރުތަކާއި ތިމާވެށީގެ ނާޒުކުކަން ބައިނަލްއަގުވާމީ މުޖުތަމައުގައި ހާމަކޮށްދީ، ތިމާވެށި ހިމާޔަތްކުރުމަށް ވަކާލާތުކުރާ ގައުމެއްގެގޮތުގައި ކަމަށެވެ. މިމޭރުމުން އެ މަނިކުފާނު ދެއްކެވި ވާހަކަފުޅުގައި ވަނީ ތިމާވެށި ހިމާޔަތްކުރުމަށް މި ސަރުކާރުން ޚާއްސަ އިސްކަމެއްދޭކަމަށް ވިދާޅުވެފައެވެ. އެގޮތުން އދ ގެ އާންމު މަޖިލީހާއި އެންމެފަހުން ބޭއްވުނު ކޮންފަރެންސް އޮފް ޕާޓީސް (ކޮޕް) ސަމިޓުގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ދެއްވި ތަގުރީރުގައި, ތިމާވެށި ހިމާޔަތްކުރުމަށްޓަކައި, ތަރައްގީވެފައިވާ ގައުމުތަކުން ޖައްވަށް ދޫކުރާ ވިހަގޭސްތައް މަދުކޮށް ތިމާވެށި ހިމާޔަތް ކުރުމަށް ބާރުއަޅުއްވާފައިވާކަން ފާހަގަކުރެއްވިއެވެ.
ނައިބު ރައީސްގެ ވާހަކަފުޅުގައި، ރައްޔިތުންނަށް ފަސޭހައިން ސިއްހީ ޚިދުމަތްތައް ލިބިދިނުމަކީ ރައީސުލްޖުމްހޫރިއްޔާ ޚާއްސަ އިސްކަމެއް ދެއްވާ ކަމެއްކަން ފާހަގަކުރައްވައި، ސަރުކާރުން ރާއްޖޭގެ އެކި ސަރަހައްދުތަކަށް ސިއްހީ ޚިދުމަތް ފުޅާކުރުމަށް ކުރަމުންގެންދާ މަސައްކަތްތަކުގެ މައްޗަށް އަލިއަޅުވާލެއްވިއެވެ. އެގޮތުން ދިވެހިރާއްޖޭގެ ފަސް ސަރަހައްދުގައި ޓާރޝަރީ ހޮސްޕިޓަލްތައް ގާއިމުކުރުމަށްޓަކައި ކުރަމުންގެންދާ ބުރަ މަސައްކަތް ފާހަގަކުރެއްވިއެވެ. އަދި މިފަދަ ބޮޑު މަސައްކަތެއް ކުރިއަށް ގެންދާއިރު, މި ފަސް ސަރަހައްދަށާއި މުޅި ސިއްހީ ދާއިރާއަށް ބޭނުންވާ މިންވަރަށް ސިއްހީ ޚިދުމަތްތެރިން ތަމްރީނުކުރުމުގެ މުހިއްމުކަމުގެ މައްޗަށް އެ މަނިކުފާނު އަލިއަޅުއްވާލެއްވިއެވެ.
ދުނިޔޭގެ ސިއްހަތު ދުވަސް ފާހަގަކުރުމަށްޓަކައި ބޭއްވި ރަސްމީ ޖަލްސާގައި ނައިބު ރައީސް ވަނީ "ގްރީން ސްމާރޓް އައިލެންޑް ޕްރޮޖެކްޓް" އިފްތިތާހުކޮށްދެއްވާފައެވެ. މި ޖަލްސާގައި ވަނީ ޕްރޮޖެކްޓާގުޅޭ ކޮމިޓްމަންޓްގައި ކައުންސިލްތަކުގެ މަންދޫބުން ސޮއިކުރައްވާފައިވެއެވެ. މިޖަލްސާގައި މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވަނީ ކްލައިމެޓް ސްމާރޓް ހޮސްޕިޓަލް ޕޮލިސީ ސްޓްރެޓަޖީ އިފްތިތާހުކޮށްދެއްވާފައެވެ. އަދި މިނިސްޓަރ އޮފް އެޑިއުކޭޝަން ޑރ. އާއިޝަތު އަލީ ވަނީ އިންޓަރސްކޫލް އާރޓް މުބާރާތާއި ކުރުވާހަކަ ލިޔުމުގެ މުބާރާތް އިފްތިތާހުކޮށްދެއްވާފައެވެ.
