ސޮލިޓެއަރ ލަގްޒަރީ ރެސިޑެންސްގެ ބިންގާ އަޅައިފިއެވެ.

ބުރާސްފަތި ދުވަހު ހުޅުމާލޭގައި އޮތް ޚާއްސަ ހަފްލާއެއްގައި އެތަނުގެ ބިންގާ އަޅުއްވައިދެއްވީ ސެންޑަލް މޮރީޝަސްގެ ފަރާތުން ނީރަޖް ގުލާޓީ އަދި ޔަޓިން ގުލާޓީއެވެ. އަދި ރެއިންބޯ ކޮންސްޓްރަކްޝަންގެ ފަރާތުން އިބްރާހީމް ރަފީގުއެވެ.

ޖުމްލަ 9 ފަންގިފިލާގެ ސޮލިޓެއަރގައި ހިމެނޭނީ އެޕާޓްމަންޓްގެ އިތުރުން އަޕަރ ގްރައުންޑް ލެވެލްގައި މަގުބޫލު ފިހާރަތަކާއި ރޫފްޓޮޕްގައި މަލްޓި ފެސިލިޓީ ކްލަބް ހައުސްއެއް ކަމަށް ސެންޑަލް މޮރިޝަސް އިން މައުލޫމާތު ދީފައިވެއެވެ. އަދި އެންމެ ޒަމާނީ ފެންވަރުގެ ޖިމްއަކާއި އިންފިނިޓީ ޕޫލް ލާއި ކުޑަކުދިންގެ ޕްލޫގެ އިތުރުން ކުޅޭ ތަނަކާއި އާއިލާތަކަށް ޚާއްސަ ހިތްފަސޭހަ މައިޒާނެއް ވެސް ސޮލިޓެއަރގައި ހުންނާނެ ކަމަށް ވަނީ ބުނެފައެވެ.

ސޮލިޓެއަރގެ ކޮންމެ ފްލޯއެއްގައި ގާތްގަނޑަކަށް 1200 އަކަފޫޓުގެ 8 އެޕާޓްމަންޓް ހުންނާނެ ކަމަށާއި ހުރިހާ އެޕާޓްމަންޓެއްގައި 4 ކޮޓަރި ހުންނާނެ ކަމަށް އެ ކުންފުނިން ބުނެއެވެ. އަދި އެންމެ މަތީ ފްލޯގައި ހުންނާނީ 4 ލަގްޒަރީ ޕެންޓް ހައުސްއެވެ.

ސޮލިޓެއަރ ކޮންސެޕްޓް ހެދުމާއި ފަރުމާ ކުރުމުގައި އެންމެ ޚާއްސަ ސަމާލުކަމެއް ދީފައިވަނީ ދިރިއުޅުމުގެ ހިތްފަސޭހަކަން ކުރިއެރުވުމަށް ކަމަށް ސެންޑަލް މޮރިޝަސް އިން ބުނެއެވެ.

ސޮލިޓެއަރ ލަގްޒަރީ ރެސިޑެންސް އަކީ ސެންޑަލް މޮރިޝަސް އިން ރާއްޖޭގައި ހިންގާ ދެވަނަ މަޝްރޫއެވެ.

ސެންޑަލް މޮރީޝަސް އަކީ އިންޑިއާގެ ނިއުދިއްލީގެ ރިއަލް އެސްޓޭޓް ކުންފުނި އެސޮޓެކް ރިއަލްޓީ އިން ރާއްޖޭގައި ރިއަލް އެސްޓޭޓް މަސައްކަތް ކުރުމަށް އުފައްދާފައިވާ ޚާއްސަ ސަބްސިޑިއަރީ ކުންފުންޏެކެވެ.