މަސްވެރިންނަށް ވީ ވައުދު ފުއްދުމަށް މެނިފެސްޓޯއަށް ރުޖޫއަވޭ: ނަޝީދު
މަސްވެރިން ތަކުރާރުކޮށް ފާހަގަކުރާ އެއް ނުކުތާއަކީ، އެމްޑީޕީން ބުނެގެން އެމީހުން ބަލައިގަތް ވާހަކަތައް ކަމަށް ނަޝީދު ވިދާޅުވި
މުހައްމަދު ނަޝީދު
މިފްކޯއަށް ކިރާ މަހުގެ އަދަދު ކޮންޓްރޯލްކުރުމަށް ނިންމުމާގުޅިގެން, މަސްވެރިންނަށް އެމްޑީޕީން ވެފައިވާ ވައުދު ފުއްދުމަށް އެމްޑީޕީގެ މެނިފެސްޓޯއަށް ރުޖޫއަވުމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ސަރުކާރަށް ގޮވާލައްވައިފިއެވެ.
ދެކުނަށް މަސްވެރިކަން ރަނގަޅުވެ މަސް ކިރުމުގައި ދިމާވި ދަތިތަކާގުޅިގެން މިފްކޯއިން ވަނީ ކޮންމެ ދޯންޏަކުން ކިރާނީ 5 ޓަނުގެ މަސް ކަމަށް ކަނޑައަޅާފައެވެ. އެކަމާގުޅިގެން ނަޝީދު ނެރުއްވި ބަޔާނުގައި ވަނީ, ވަރަށް ގިނަ މަސްވެރިން ފޯނުން ގުޅައި ވަރަށް ޝަކުވާއުފުލިކަމަށެވެ. އެއީ މަސްވެރިން ބޭނި މަސް ނުކިރި އެތައް ތަކުލީފެއްގައި އުޅެންޖެހުމުން ކުރާ ހައްގު ޝަކުވާކަމަށް ނަޝީދު ވިދާޅުވިއެވެ. މަސްވެރިން ތަކުރާރުކޮށް ފާހަގަކުރާ އެއް ނުކުތާއަކީ، އެމްޑީޕީން ބުނެގެން އެމީހުން ބަލައިގަތް ވާހަކަތަކެވެ. އަދި އެމީހުން އެހެން މަސްވެރިން ގާތުގައި އެވާހަކަތައް ދައްކައި، އޭގެ ސަބަބުން އެމްޑީޕީއަށް ވޯޓް ދިންކަމަށް ނަޝީދު ވިދާޅުވިއެވެ.
މަސްވެރިން އެއިޝާރާތް ކުރަނީ 2018 ވަނައަހަރުގެ އެމްޑީޕީ މެނިފެސްޓޯގައި ހުށަހަޅާފައިވާ ތަސައްވަރަށް ކަމަށް ނަޝީދު ވިދާޅުވިއެވެ. އަހަރު ދެކޮޅު ރާއްޖޭގައި މަސްވެރިކަން ރަނގަޅުވާކަމަށާއި, މި ތައްގަނޑު ދިވެހިން އަތުން ހިފައި ދެނެގަނެ އުޅޭތާ ހާހަކަށް ވުރެން ގިނަ އަހަރުވެއްޖެކަމަށް ނަޝީދު ވިދާޅުވިއެވެ. މަސްވެރިކަން ރަނގަޅު މޫސުން އަންނަ ކޮންމެ ފަހަރަކު ބާނާ މަސް ގިނަވެ އެއަށް ހަދާނެގޮތް އޮންނަނީ ހުސްވެފައި ކަމަށް ނަޝީދު ވިދާޅުވިއެވެ.
އެމްޑީޕީގެ 2018 ވައަހަރުގެ މެނިފެސްޓޯ ދުށްގޮތުގައި، ދިވެހިރާއްޖޭގެ މަސްވެރިކަމުގެ ސިނާއަތަށް ދިމާވެފައިވާ އެންމެ ބޮޑު ގޮންޖެހުމަކީ މިއީ ކަމަށް ނަޝީދު ވިދާޅުވިއެވެ. އެސިނާއަތުގައި ސަރުކާރު ބައިވެރިވާ މިންވަރު ބޮޑުވުމެވެ. ރާއްޖޭގެ މަސްވެރިން ބާނާ ހުރިހާ މަސް ގަނެ, އެމަސް ބަންދުކުރެވި, ރާއްޖެއިން ބޭރަށް ފޮނުވުމުގެ ގާބިލްކަން އެއްވެސް ސަރުކާރަކަށް ނުހޯދޭކަމަށް ނަޝީދު ވިދާޅުވިއެވެ. ހޯދިދާނެކަމަށް ދުށުމަކީވެސް އަމާޒު ގެއްލުންކަމަށް ނަޝީދު ވިދާޅުވިއެވެ. މި ސަރުކާރު އެމައްޗައް އުފެދިފައިވާ މެނިފެސްޓޯ، މައްސަލައަށް ހައްލެއް ހުށަހެޅިއެވެ.
މަސްވެރިން ބާނާހާ މަހެއް ވިއްކައި، ބަންދުކުރެވި ބޭރުކުރެވިދާނެ އިންތިޒާމެއް 2018 ވަނަ އަހަރުގެ އެމްޑީޕީމެނިފެސްޓޯ ހުށަހެޅިއެވެ. "ގޭދޮށު މަސް ޕްލާންޓް"ގެ ސިޔާސަތެވެ. މަސް ގަނޑުކޮށާއި ފިނިކޮށް ރައްކާކުރުމާއި އަދި މަސްބަންދުކުރުމުގެ، މިއަދުގެ ސިނާއަތުގައި، ކުދި، މަސްބަންދުކުރާ ނިޒާމްތައް އިންތިހާއަށް ފައިދާ ބޮޑުކޮށް އެތައް ގައުމެއްގައި އެބަ ހިންގާކަމަށް ނަޝީދު ވިދާޅުވިއެވެ. ދުވާލެއްގެ މައްޗައް ދިހަ ޓަނު ބަންދުކުރެވޭ މިންވަރުގެ މަސްބަންދުކުރާ ނިޒާމްތަކެވެ. ވިހި ތިރީސް މީހުން މަސައްކަތް ކުރާ ގޭދޮށު ކުދި ފެކްޓަރީތަކެވެ.
ނަޝީދު ވިދާޅުވީ ސަރުކާރުގެ ކުންފުނިތަކުން ބޮޑެތި މަސް ފިނިކުރާ ގުދަންތަކާއި މަސް ބަންދުކުރާ ކާރުޚާނާތައް ހަދައިގެން މަސްވެރިކަމުގެ ސިނާއަތް ކުރިއަށް ގެންދެވެން ނެތްކަން ވަރަށް ބޮޑަށް ސާފުވަމުން އަންނަތާ އެތައް ދުވަހެއް ވެއްޖެކަމަށެވެ. މިއަދުވެސް، އަނެއްކާވެސް ސަރުކާރަށް ދަންނަވާން އޮތީ، އެމްޑީޕީ މެނިފެސްޓޯގެ މަގަށް ރުޖޫއަވުމަށް ކަމަށާއި, ވީ ވައުދު ފުއްދުމަށް މަސައްކަތް ކުރުމަށް ކަމަށާއި, އަދި ސަރުކާރުގެ ކުންފުނިތަކުގެ ދަރަނި ބޮޑުކޮށް އެތަންތަނުގެ ފިނިގުދަން ޖާގައާއި ކާރުޚާނާ ޖާގަ ބޮޑުކުރުން ހުއްޓާލުމަށާއި, ރާއްޖޭގެ މަސްވެރިކަން ރަނގަޅު ރަށްރަށުގައި، ރަށުކައުންސިލާއި، މަސްވެރިންނާއި އަދި ވިޔަފާރިވެރިންނަށް ހިއްސާވެވޭނެ ނިޒާމެއްގައި ހިންގާ ކުދި މަސްފެކްޓަރީތައް ހެދުން އަވަސް ކުރުމަށް ކަމަށް ނަޝީދު ވިދާޅުވިއެވެ.
