ބަޔާން ބަލިވިއިރު، ރެއާލްއަށް މޮޅެއް!

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ މެޗުގައި ވިޔަރެއާލް އަތުން ބަޔާން މިއުނިކް ބަލިވިއިރު، އެންމެ ފަހުގެ ޗެމްޕިއަން ޗެލްސީ ކައިރިން ރެއާލް މެޑްރިޑް މޮޅުވެއްޖެއެވެ.

ވިޔަރެއާލްގެ ދަނޑުގައި ބަޔާން އާއި ވާދަކޮށް އެޓީމުން ކުރިހޯދީ 1-0 ންނެވެ. މި މެޗުގައި ވިޔަރެއާލްގެ ހަމައެކަނި ލަނޑު ޖަހާފައިވަނީ ފުރަތަމަ ހާފުގެ 8 ވަނަ މިނެޓުގައެވެ. މިއީ ޕަރޭހޯ ޖެހި ބޯޅައެއްގެ މިސްރާބު ބަދަލުކޮށްލައިގެން އާނޯޓް ޑަންޔޫމާ ކާމިޔާބުކޮށްދިން ހިތްގައިމު ލަނޑެކެވެ. މިއާއެކު ބަޔާންއިން ގިނަ ހަމަލާތަކެއް އުފައްދާ ވިޔަރެއާލްގެ ގޯލަށް ނުރައްކާ ކުރިއެވެ. މެޗުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ވެސް ބަޔާންއިންނެވެ. ނަމަވެސް ލަނޑެއް ޖެހުމަށް ބަޔާންއިން ކުރި މަސައްކަތް ނާކާމިޔާބުވީއެވެ.

ޗެމްޕިއަންސް ލީގުގެ މެޗެއްގައި ބަޔާންއިން ރަށުން ބޭރުގައި ކުޅެގެން ބަލިމިވީ ގާތްގަނޑަކަށް ފަސް އަހަރަށްފަހުއެވެ.

ޗެލްސީގެ މައްޗަށް ރެއާލްއިން ކުރިހޯދީ 3-1 ންނެވެ. މި މެޗުގައި ރެއާލްގެ ކެޕްޓަން ކަރިމް ބެންޒެމާ ވަނީ ހެޓްރިކް ހަދާފައެވެ. ބެންޒެމާގެ ދެލަނޑަކީ ބޮލުން ޖަހާ ގޯލުގެ ތެރެއަށް ބޯޅަ ފޮނުވާލައިގެން ކާމިޔާބުކުރި ދެލަނޑެވެ. އަނެއް ލަނޑަކީ މެންޑީ އާއި ރުޑިގާއަށް ހެދުނު މިސްޓޭކެއްގެ ބޭނުން ހިފައިގެން ބެންޒެމާ ކާމިޔާބުކުރި ލަނޑެކެވެ. ޗެލްސީއަށް ލަނޑު ޖަހައިދިނީ ކައި ހަވާޓްޒްއެވެ.

ރެއާލްއަށް މި މެޗުގައި ލަނޑު ޖެހުމަށް ގިނަ ފުރުސަތުތަކެއް ލިބުނެވެ. އެގޮތުން ވިނީޝިއަސް ފޮނުވާލި ހަމަލާ ގޯލުގެ ދަނޑިއަށް އަމާޒުވިއިރު، ފުރަތަމަ ހާފު ނިމެނިކޮށް ބެންޒެމާއަށް ލިބުނު ފުރުސަތުވެސް ބޭކާރުވީއެވެ.