އިޤްތިސާދު ހުއްޓޭކަމަށް ވިދާޅުވެ އަވަސް ފިޔަވަޅުތަކެއް އެޅުމަށް ގޮވާލާ ހުށަހެޅި ކުއްލި މައްސަލަ ބޭރުކޮށްލައިފި
ރާއްޖޭގެ ބައެއް އަތޮޅުތަކުން ޑީސަލްއެއްކޮށް ހުސްވެފައިވާ ކަމަށް ކުއްލި މައްސަލައިގައި ބުނެފައިވޭ
ކުއްލި މައްސަލަ ހުށަހެޅުއްވި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް
ދިވެހިރާއްޖޭގެ އިޤްތިސާދު ހުއްޓުމުގެ ކޮޅުމަތި ފެންނަމުންދާތީވެ ސަރުކާރުން ޚާއްސަ ސަމާލުކަމެއްދީ އަވަސް ފިޔަވަޅުތަކެއް އެޅުމަށް ގޮވާލާ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ހުށަހެޅުއްވި ކުއްލި މައްސަލަ ބޭރުކޮށްލައިފިއެވެ.
މެންބަރު ހުސައިން މުހައްމަދު ލަތީފް ހުށަހެޅުއްވި ކުއްލި މައްސަލައިގައި ބުނެފައިވަނީ ދިވެހިރާއްޖެއަށް ތެޔޮ އެތެރެކުރުމަށް ސަރުކާރުން އުފައްދާފައިވާ ފިއުލްސަޕްލައިސް މޯލްޑިވްސްއިން ރާއްޖެއަށް ބޭނުންވާވަރަށް ޑީސަލް ނުގެނެވި، ރާއްޖޭގެ ބައެއް އަތޮޅުތަކުން ޑީސަލްއެއްކޮށް ހުސްވެ، ޒަރޫރީ ބޭނުންތަކަށް ދަތުރުކުރާ އަމިއްލަފަރާތްތަކާއި، ދިވެހިރާއްޖޭގެ ލޭނާރު ކަމަށްވާ މަސްވެރިކަން ކުރާ އުޅަނދުތަކަށް ބޭނުންވާ ޑީސަލް ނުލިބި، މަހަށް ނުފުރިފައިވާކަމުގެ ޝަކުވާތައް ރާއްޖޭގެ އެކިކަންކޮޅުތަކުގެ މަސްވެރިން ކުރަމުންދާ ކަމަށެވެ.
އަދި ރާއްޖޭގައި ތެލުގެ ވިޔަފާރިކުރާ އަމިއްލަ ފަރާތްތަކަށް ސަރުކާރުގެ ކުންފުނިން ޑީސަލް ފޯރުކޮށްދިނުމުގައި ތަފާތުކުރުންތަކެއް ގެންގުޅެ، އެވިޔަފާރީގައި އޮތް ވާދަވެރި މާހައުލު ނެތިކޮށް، ފިއުލްސަޕްލައިސް މޯލްޑިވްސްގެ ވެރިންނާއި ގުޅުންއޮންނަ ކުންފުނިތަކަށް އެކަނި ތެޔޮ ލިބޭނެ އިންތިޒާމަކުން ޚާއްސަކޮށް މިދުވަސްވަރު އަމަލު ކުރަމުންދާކަމުގެ ޝަކުވާ ތެލުގެ ވިޔަފާރީގައި މަސައްކަތްކުރާ ކުންފުނިތަކުން ކުރަމުންދާ ކަމަށެވެ.
މީގެ އިތުރުން ކޮވިޑްގެ ހާލަތަށްފަހު ދިވެހިރާއްޖޭގެ އިޤްތިސާދު ހަމަ މަގަށް އެޅުވުމުގެ އެންމެ ބޮޑު ހިއްސާއެއްވާ ފަތުރުވެރިކަމުގެ ސިނާޢަތުގެ ރިސޯޓްތަކާއި، އުޅަނދުފަހަރަށް ބޭނުންވާވަރަށް ޑީސަލް ނުލިބި އެ ސިނާޢަތު ހުއްޓުމުގެ މަލަމަތި ފެންނަމުންދާތީވެ، ދުނިޔޭގެ ތެލުގެ ބާޒާރަށް އަންނަ ލޮޅުންތަކަށް ފާރަވެރިވެ، ދިވެހިރާއްޖެއަށް ބޭނުންވާ ތެލުގެ ބާވަތްތައް ދުރާލާ ތައްޔާރުވެ ރާއްޖެއަށް އެތެރެކުރުމުގައި ޚާއްސަ ސަމާލުކަމެއް ދިނުމަށް ގޮވާލައި ރައްޔިތުންގެ މަޖިލީހުގެ ޤަވައިދުގެ 110ވަނަ މާއްދާގެ ދަށުން ކުއްލި މައްސަލަ ހުށައަޅާ ކަމަށެވެ.
ކުއްލި މައްސަލައަށް ބަހުސް ކުރުމަށް ހުޅުވާލުމުން، މަޖިލީހަށް ހާޒިރުވި 58 މެންބަރުންގެ ތެރެއިން ވޯޓު ދެއްވީ 53 މެންބަރުންނެވެ. ކުއްލި މައްސަލައާއި އެއްކޮޅަށް ވޯޓް ދެއްވީ 9 މެންބަރުންނެވެ. އަދި ދެކޮޅަށް ވޯޓް ދެއްވީ 44 މެންބަރުންނެވެ. ވޯޓް ނުދެއްވާ 4 މެންބަން ތިއްބެވިއެވެ. އެހެން ކަމުން މައްސަލަ ވަނީ ބޭރުވެފައެވެ.
