ޗެމްޕިއަންސް ލީގު ކްއާޓަރ ފައިނަލް ފުރަތަމަ ލެގުން މެންޗެސްޓަރ ސިޓީއާއި ލިވަޕޫލް ކުރި ހޯދައިފި

ޔުއެފާ ޗެމްޕިއަންސްލީގު ކްއާޓަރ ފައިނަލް ފުރަތަމަ ލެގުން މެންޗެސްޓަރ ސިޓީއާއި ލިވަޕޫލްވެސް ކުރި ހޯދައިފިއެވެ.

އެންމެފަހުން މުބާރާތުގެ ފައިނަލްގައި ބަލިވި މެންޗެސްޓަރ ސިޓީން ކްއާޓަރ ފައިނަލް ފުރަތަމަ ލެގުގައި ކުރި ހޯދީ އަންގާރަ ދުވަހުގެ ރޭ އެތްލެޓިކޯ މެޑްރިޑާއި ވާދަކޮށް 1-0 ނެވެ. ސިޓީގެ އިއްތިހާދު ސްޓޭޑިއަމްގައި ކުޅުނު މެޗުގެ ހަމައެކަނި ލަނޑު ޖަހާ ސިޓީ މޮޅުކޮށްދިނީ މިޑްފީލްޑަރު ކެވިން ޑި ބުރައިނާއެވެ. އޭނާ ލަނޑު ޖެހީ 70 ވަނަ މިނިޓްގައި ފިލް ފޮޑެން ތަނަވަސްކޮށްދިން ފުރުޞަތަކުންނެވެ. ފޮޑެން ކުޅެން ނުކުތީވެސް 68 ވަނަ މިނިޓްގައެވެ. އެއީ ރިޔާދު މާރޭޒްގެ ބަދަލުގައެވެ. ސިޓީން މެޗު ޑޮމިނޭޓްކޮށްގެން ކުޅުނު ނަމަވެސް އެތްލެޓިކޯގެ ޑިފެންސް ފޫއަޅުވާލުންވީ ޕެޕް ގާޑިއޯލާގެ ސިޓީއަށް އުނދަގޫ ކަމަކަށެވެ. ދެވަނަ ލެގު މިމަހުގެ 13 ވަނަ ދުވަހުގެ ރޭ ކުޅޭނީ އެތްލެޓިކޯ މެޑްރިޑްގެ ދަނޑުގައެވެ.

ލިވަޕޫލް ވަނީ ކްއާޓަރ ފައިނަލް ފުރަތަމަ ލެގުގައި 3-1 ން ބެންފީކާ ބަލިކޮށްފައެވެ. ލިވަޕޫލުން ފުރަތަމަ ހާފްގައި ދެލަނޑުގެ ލީޑެއް ނެގިއެވެ. އެއީ ކޮނާޓޭއާއި މާނޭގެ ގޯލުންނެވެ. ދެވަނަ ހާފް ފަށައިގެން 4 ވަނަ މިނިޓްގައި ބެންފީކާއިން ލަނޑެއް ޖަހާ ހިތްވަރު ހޯދިއެވެ. އެކަމަކު ނުނޭޒް ޖެހި ގޯލުން ހިތްހަމަ ޖެހުން ހޯދޭވަރެއް ނުވިއެވެ މެޗު ނިމެން 3 މިނިޓަށް ވެފައިވަނިކޮށް ލިވަޕޫލުން ތިންވަނަ ލަނޑެއް ޖެހިއެވެ. ތިންވަނަ ލަނޑު ޖެހީ ލުއިސް ޑިއާޒްއެވެ. ދެވަނަ ލެގު ކުޅޭނީ ލިވަޕޫލްގެ ދަނޑުގައެވެ.