އަބްދުލްމުހީތު (ބޮބީ) މަރާލި މައްސަލައިގައި ކުށް ސާބިތުވި ދެ މީހުން މެރުމަށް ކްރިމިނަލް ކޯޓުން ހުކުމްކޮށްފައިވާއިރު، އެ ޙުކުމުގެ އިސްތިއުނާފު އަޑުއެހުމެއް އަންގާރަ ދުވަހު ހައިކޯޓުގައި ކުރިއަށް ގެންގޮސްފިއެވެ.

ފިނޭންސް މިނިސްޓްރީ ކުރިމަތީގައި އޮންނަ ގޯޅި ތެރޭގައި 2012 ވަނަ އަހަރުގެ ފެބްރުއަރީ މަހު މުހީތަށް ތޫނު އެއްޗެހިން ހަމަލާދީ އޭނާ މަރާލި މައްސަލައިގައި ދައުލަތުން ކްރިމިނަލް ކޯޓުގައި ތިން މީހަކަށް ދައުވާ ކުރިއެވެ. އެއީ ޅ. ނައިފަރު ޒައިތޫނިގޭ މުހައްމަދު މައިމޫނާއި ގދ. ގައްދޫ އަބްލަޣީގޭ މުހުޖަތު އަހުމަދު ނާސިހާއި ސ. މަރަދޫ ސަލްޓަންވިލާ އަލީ މުޝައްފާއު އެވެ.

ކްރިމިނަލް ކޯޓުން 7 މެއި 2019 ގައި ވަނީ މައިމޫނާއި މުހުޖަތުގެ މައްޗަށް ކުށް ސާބިތުވާ ކަމަށް ނިންމާފައެވެ. އެގޮތުން ކްރިމިނަލް ކޯޓުން އިއްވި ހުކުމްގައި ބުނެފައިވަނީ، މުހީތު މަރުވެފައިވަނީ މުހްޖަތު އަހްމަދު ނާސިހާއި އިތުރު ބަޔަކު ތޫނު އެއްޗަކުން ހަމަލާދިނުމުން ލިބުނު ޒަހަމުތަކަށް ފަރުވާދެމުން ދަނިކޮށް ކަމަށެވެ.

ކްރިމިނަލް ކޯޓުން އެ ދެ މީހުން މެރުމަށް ކޮށްފައިވާ ހުކުމުގައިވާ ގޮތުން މުހީތުގެ ހުރިހާ ވާރިސުން ބޭނުންވަނީ ގާތިލުންގެ ފުށުން ޤިޞާޞް (މަރަށް މަރު) ހިފުމަށެވެ. އަދި އިސްލާމީ ޝަރީއަތާއި ރާއްޖޭގެ ގާނޫނުގައި ބުނެފައިވާ ގޮތަށް މަރަށް މަރު ހިފުމަށް ކްރިމިނަލް ކޯޓުން ވަނީ ހުކުމްކޮށްފައެވެ.

އެ ޙުކުމް ހައިކޯޓުގައި އިސްތިއުނާފު ކޮށްފައިވާއިރު، އަންގާރަ ދުވަހު ވަނީ ހައިކޯޓުގައި އަޑުއެހުމެއް ކުރިއަށް ގެންގޮސްފައެވެ. އެހެންނަމަވެސް، މި އަޑުއެހުމުގައި މައިމޫނާއި މުހުޖަތު ބައިވެރިވެފައިވަނީ ވަކީލަކާއި ނުލައެވެ. އެމީހުން ވަނީ އަޑުއެހުން ކުރިއަށް ގެންދަން ބޭނުންވަނީ ވަކީލަކާއެކުގައި ކަމަށް ބުނެފައެވެ.

މި މައްސަލަ ހައިކޯޓުގައި ބައްލަވަނީ ފަނޑިޔާރު ހާތިފް ހިލްމީއާއި، ފަނޑިޔާރު ހުސައިން ޝަހީދުގެ އިތުރުން، ފަނޑިޔާރު ފާތިމަތު ފަރުހީޒާއެވެ.

މި މައްސަލަ ބައްލަވާ ބެންޗުގެ ރިޔާސަތުގައި އިންނަވާ ފަނޑިޔާރު ހާތިފް ހިލްމީ ވަނީ ވަކީލަކު އައްޔަނު ކުރުމަށް ފަހު ފުރުސަތު ދެއްވާފައެވެ. އަދި ގިނަ ދުވަސްވީ މައްސަލަތަކަށް އިސްކަންދީގެން ހައިކޯޓުން މައްސަލަތައް ބަލަމުންދާއިރު، މި މައްސަލައިގެ ގަޒިއްޔާއަށްވެސް ދުވަސްތަކެއް ވެފައިވާކަން ފަނޑިޔާރު ފާހަގަކުރެއްވިއެވެ. އެގޮތުން ފަނޑިޔާރުން ވަނީ ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދެއްވާފައެވެ.

އަދި ވަކީލަކާއި ނުލައި ހާޒިރުވި ނަމަވެސް، ދެން އޮންނަ އަޑުއެހުން ކުރިއަށް ގެންދަވާނެކަމަށް ފަނޑިޔާރު ހާތިފް ހިލްމީ ވަނީ ވިދާޅުވެފައެވެ.