ކޮވިޑް-19 ސާމްޕަލް ނަގަމުންދިޔަ ސެންޓަރުތަކަށާއި ގަޑިތަކަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބަދަލުތަކެއް ގެނެސްފިއެވެ.

އެެޗްޕީއޭއިން ބުނީ މިއަދުން ފެށިގެން ދަރުބާރުގެއިން ސާމްޕަލް ނަގައިދެމުންދިޔަ ސެންޓަރު ބަންދުވާނެކަމަށެވެ. ސެނެހިޔާއިން ހޮނިހިރު ދުވަހުން އާދިއްތަ ދުވަހަށް ރޭގަނޑު 9ން 11ށް ޕީސީއާރު ސާމްޕަލް ނަގައިދެމުންދާނެއެވެ.

މީގެއިތުރުން ހުޅުމާލެ ރުއްގަނޑުގައި ހުރި ސާމްޕަލް ނަގާ ސެންޓަރުވެސް މިއަދުން ފެށިގެން ބަންދުވާނެކަމަށް އެޗްޕީއޭއިން ބުނެއެވެ. ހުޅުމާލޭގައި ދެން ސާމްޕަލް ނަގައިދެމުންދާނީ ހުޅުމާލެ ހޮސްޕިޓަލުންނެވެ.

ޕީސީއާރު ސާމްޕަލް ހުޅުމާލެ ހޮސްޕިޓަލުން ނަގައިދެމުންދާނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 10ން ރޭގަނޑު 12އަށް އެޕޮއިންޓްމަންޓް އުސޫލުންކަމަށް އެޗްޕީއޭއިން ބުނެއެވެ.

ރާއްޖޭގައި މިހާރު ކޮވިޑްގެ ހާލަތު ރަނގަޅުވަމުން އަންނައިރު ސިއްހީ ކުއްލި ނުރައްކަލުގެ ހާލަތުވަނީ މިދިޔަ މަހު އުވާލާފައެވެ. އެޗްޕީއޭއިން ކޮވިޑްގެ ތަފާސްހިސާބުތައް މިހާރު ހާމަކުރަމުންދަނީ ހަފްތާއަކު އެއް ފަހަރުއެވެ. އެގޮތުން އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު 27 މާރޗުވީ އާދިއްތަ ދުވަހުން ފެށިގެން، 2 އޭޕްރީލްގެ ނިޔަލަށް 665 މީހުން ޕޮޒިޓިވްވެފައިވެއެވެ.