ހަމަނުޖެހުން ބޮޑުވެ، ހޮންޑިއުރަސްގެ ބޮޑު ޑާބީ މެޗު ހުއްޓާލައިފި!

ހޮންޑިއުރަސްގެ ބޮޑު ޑާބީގައި ހިނގި ހަމަނުޖެހުންތަކާއެކު މެޗު ހުއްޓާލައިފިއެވެ.

މެޗުގައި ބައްދަލުކުރީ ރެއާލް އެސްޕާނާ އާއި މެރަތަންއެވެ. މިއީ ހޮންޑިއުރަސްގެ އެންމެ ބޮޑު ޑާބީ މެޗެވެ. މައްސަލަ ހޫނުވީ މެރަތަންގެ ސަޕޯޓަރުންތަކެއް ސްޓޭޑިއަމްގެ ވަނުން މަނާ ސަރަހައްދަކަށް ވަނުމުންނެވެ. މެޗު ކުޅުނީ އެސްޕާނާގެ ސްޓޭޑިއަމްގައެވެ.

އެންމެ ފުރަތަމަ އެމީހުން އެތަނަށް ވަންކަން އެއްވެސް މީހަކަށް ފާހަގައެއް ނުކުރެވެއެވެ. މިކަން ފާހަގަވީ އެސްޕާނާގެ ސަޕޯޓަރުންނަށެވެ. މިއާއެކު ދެޓީމުގެ ސަޕޯޓަރުންގެ ދެމެދުގައި ކުރިމަތިލުންތަކެއް ހިނގާ ހަމަނުޖެހުންތައް އުފެދުނީއެވެ.

ހަމަނުޖެހުން ބޮޑުވެ، ބައެއް ސަޕޯޓަރުން ވަނީ ދަނޑަށްވެސް އަރާފައެވެ. މިއާއެކު މެޗު ހުއްޓާލުމަށްފަހު ދެޓީމުގެ ކުޅުންތެރިން ވަނީ ދަނޑުން ބާލާފައެވެ.