119 ކިލޯ ޑްރަގް ކޭސް: އާދިއްތަ ދުވަހަށް ތާވަލުކުރި އަޑުއެހުން ކުރިއަށް ނުގެންދެވުނު

މާލެއާއި ހުޅުމާލޭގައި ފުލުހުން ނިމިދިޔަ ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލު ކުރުމަށްފަހު ކެންސަލްކޮށްފިއެވެ.

މި އަޑުއެހުން ތާވަލުކޮށްފައި އޮތީ އާދިއްތަ ދުވަހުގެ ހެނދުނު 10:30 އަށެވެ.

Advertisement

އެހެންނަމަވެސް، އަޑުއެހުން ކެންސަލްވެފައިވަނީ ޕީޖީ އޮފީހުގެ ވަކީލުންނަށް ކޯޓު އަމުރު ލިބިފައިނުވާކަމަށް އެ އޮފީހުން ބުނެފައިވާތީއެވެ. ވުމާއެކު، މި މައްސަލައިގެ އަޑުއެހުން ވަނީ 19 އޭޕްރީލްއަށް ރީ ޝެޑިއުލްކޮށްފައެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 23 މާރޗު 2022 ގައެވެ. އެ ދުވަހުގެ އަޑުއެހުމުގައި ދައުލަތުން އެ 3 މީހުންގެ މައްޗަށްވެސް ކުރާ ދައުވާ އިއްވާފައިވާއިރު، 3 މީހުންވެސް ވަނީ ދައުވާއަށް އިންކާރު ކޮށްފައެވެ. އެއަށްފަހު ހެކި ހާމަކުރުމުގެ ކުރިން ދައުލަތުން ވަނީ ހެކި ރައްކާތެރި ކުރުމުގެ އަމުރާއި ގުޅޭގޮތުން ވާހަކަދައްކާފައެވެ.

މި މައްސަލައިގައި ދައުލަތުން ހުށައަޅާފައިވާ ހެކިތަކުގެ ތެރޭގައި ހިމެނޭ 3 އިންޓެލިޖެންސް ރިޕޯޓެއް ސިއްރުކޮށްދިނުމަށް ދައުލަތުން އެދެއެވެ. ސަބަބަކީ އެ ރިޕޯޓުތަކުގައި މިހާރުވެސް ކުރިއަށްދާ ތަހުގީގުތަކަކާއި ގުޅޭ މައުލޫމާތުތަކެއް ހިމެނޭތީ އާއި، އެ ފަރާތްތަކަށް އެ މައުލޫމާތުތައް ލިބިއްޖެނަމަ ހެކި ނައްތާލުމުގެ އިހްތިމާލު އޮތުމުންނެވެ.

އެހެންނަމަވެސް، ދިފާއީ ވަކީލުންނާއި ދައުވާ ލިބޭ ފަރާތްތައް ކޯޓަށް ހާޒިރުވެ، މުޅި ރިޕޯޓު ބެލުމަށް ދައުލަތުން އިއުތިރާޒެއް ނުކުރެއެވެ. އެހިސާބުން ދިފާއުން ވަނީ ތަހުގީގު ކުރިއަށްދާ ބައެއްގެ މައުލޫމާތު ހިމެނޭ ރިޕޯޓެއް ދިފާއަށް ދޫކުރުމާއި، ކޯޓަށް ހާޒިރުވެ، އެ ރިޕޯޓު އޮތް ގޮތަށް ބަލައި، ބޭނުންވާ މައުލޫމާތުތައް ނޯޓުކޮށްގެން ދިއުމާ ހުރި ތަފާތަކީ ކޮބައިތޯ ސުވާލު އުފައްދާފައެވެ.

އެ މައުޟޫއަށް ދައުލަތާއި ދިފާއުންވެސް ގިނަ ވާހަކަތަކެއް ދައްކާފައިވާއިރު، މައްސަލަ ބައްލަވާ ގާޒީ ދީބާނާޒް ފަހުމީވެސް ވަނީ ދައުލަތަށް ސުވާލެއް އަމާޒު ކުރައްވާފައެވެ. އެގޮތުން ގާޒީ ދީބާނާޒް ވަނީ، އެ ދެ ޙާލަތުގައި ތަހުގީގަށް ހުރަސް އެޅުމަށް އޮތް ތަފާތަކީ ކޮބައިތޯ ސުވާލު ކުރައްވާފައެވެ. އެހެންނަމަވެސް އެ ސުވާލަށްވެސް ދައުލަތުން ދިން ޖަވާބަކީ މުޅި ރިޕޯޓު ދޫކޮށްފިނަމަ ހުރިހާ މައުލޫމާތެއް ފެންނަން ހުންނާނެކަމެވެ.

އެހިސާބުން ގާޒީ ދީބާނާޒް ފަހުމީ ވަނީ ހެކި ރައްކާތެރި ކުރުމުގެ އަމުރާއި ގުޅޭގޮތުން ދައުލަތުން ހުށައަޅާފައިވާ ހުށައެޅުމަށް ބަދަލެއް ގެނައުމަށް ހިޔާލު ހުށައަޅުއްވާފައެވެ. އެގޮތުން އިންޓެލިޖެންސް ރިޕޯޓުތަކުގައި ހިމެނޭ ސިއްރު ކުރަންޖެހޭ މައުލޫމާތު ސިއްރު ކުރުމަށްފަހު ދިފާއުއަށް ރިޕޯޓު ދޫކުރުމާއި، ދިފާއުން މުޅި ރިޕޯޓު ބަލަން ބޭނުންވާނަމަ، ދައުލަތުން އެދިފައިވާ ގޮތަށް ކޯޓަށް އައިސް ކޯޓުން ކަނޑައަޅާ ޝަރުތުތަކާއެކު ބެލޭނެ ގޮތް ހެދުމާމެދު އިއުތިރާޒެއް އޮތްތޯ ގާޒީ ސުވާލު ކުރެއްވިއެވެ. އެގޮތަށް އެންމެ ރަނގަޅުކަމަށް ދައުލަތާއި ދިފާއުންވެސް ދެކެއެވެ. ވުމާއެކު އެގޮތަށް އަމުރު ނެރުއްވުމަށް ގާޒީ ނިންމެވިއެވެ.

ދެން ކުރިއަށް ދިޔައީ ދައުލަތުން ހެކި ހާމަ ކުރުމެވެ. އެއަށްފަހު ދެން އޮންނަ އަޑުއެހުމެއްގައި ދިފާއީ ހެކި ހާމަކުރުން އޮންނާނެކަމަށް ގާޒީ އެ ދުވަހުވަނީ ވިދާޅުވެފައެވެ.

މިއީ މިހާރުވެސް ތަހުގީގު ކުރިއަށްދާ ބޮޑު މައްސަލައެކެވެ. އެގޮތުން ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.