އިންތިޒާމްވެގެން ހިންގާ ކުށްތަކާއި، ޑްރަގް ނެޓްވޯކްތަކުގެ ގުޅުމަކީ، ރާއްޖޭގެ އަމާންކަމާއި، ޞުލްޙަމަސަލަސްކަމަށް އޮތް އެންމެ ބޮޑު އެއް ގޮންޖެހުން - ރައީސް
61 ރަށެއްގައި ޕޮލިސްސްޓޭޝަން އިމާރާތް ކުރުމަށް ވަނީ ކޮންޓްރެކްޓް ކުރެވިފައި
ރައީސް އިބްރާހިމް މުހައްމަދު ސާލިޙް ފުލުހުންގެ އަހަރީ ދުވަހުގެ ޖަލްސާގައި ވާހަކަފުޅު ދައްކަވަނީ
އިންތިޒާމްވެގެން ހިންގާ ކުށްތަކާއި، ޑްރަގް ނެޓްވޯކްތަކުގެ ގުޅުމަކީ، ރާއްޖޭގެ އަމާންކަމާއި، ޞުލްޙަމަސަލަސް ކަމަށް އޮތް އެންމެ ބޮޑު އެއް ގޮންޖެހުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙް ވިދާޅުވެއްޖެއެވެ.
ފުލުހުންގެ އަހަރީ ދުވަހުގެ މުނާސަބަތުގައި ވާހަކަފުޅުދައްކަވަމުން ރައީސް ވިދާޅުވީ އިންތިޒާމްވެގެން ހިންގާ ކުށްތަކާއި، ޑްރަގް ނެޓްވޯކްތަކުގެ ގުޅުމަކީ، ރާއްޖޭގެ އަމާންކަމާއި، ޞުލްޙަމަސަލަސްކަމަށް އޮތް އެންމެ ބޮޑު އެއް ގޮންޖެހުން ކަމަށާއި، މިހާރު މިކަން އެއީ ޤައުމީ ސަލާމަތަށް އޮތް ނުރައްކަލަކާއި ހަމައަށް އުފުލާ މަންޒަރު ފެނިވަޑައިގަންނަވާ ކަމަށެވެ. އެއީ ރައްޔިތުންގެ އޮތް ވަރަށް ބޮޑު ކަންބޮޑުވުމެއް ކަމަށާއި، މިކަންކަން ހުއްޓުވައި، ކޮންޓްރޯލް ކުރުމަށް ޚާއްޞަ ޓާސްކް ފޯސްތަކެއް އެކުލަވައިލެވި، ޢަމަލީ މަސައްކަތް ހިނގަމުންދާ ކަމަށެވެ. އަދި މީގެ ހެޔޮ ބަދަލު އިރާދަކުރެއްވިއްޔާ، ދާދި އަވަހަށް ފެންނާނެ ކަމަށެވެ.
ރައީސް ވިދާޅުވީ ކޮންމެ ޤައުމެއްގައިވެސް ކުށްވެރިން ހިތްހެޔޮނުވާ ބަޔަކީ ފުލުހުން ކަމަށެވެ. އެއީ އެކި ގޮތްގޮތުން އެމީހުން ހިންގާ ޖަރީމާތަކާއި، ޑްރަގް ވިޔަފާރިއަށް ހުރަސްއަޅައި ހުއްޓުވާ ބަޔަކީ ފުލުހުން ކަމަށްވާތީއާއި ގޭ ބިންގަރާހުގައި ގުދަންކޮށްފައި ހުއްޓަސް ޑްރަގް އަތުލައިގަންނަނީ ފުލުހުން ކަމަށްވާތީ ކަމުގައެވެ. އަދި އަނެއްކޮޅުން އެމީހުންގެ ބޯޓުތައް ރާއްޖެ ވަނުމުގެ ކުރިން ހިފަހައްޓައި އަތުލައިގަތުމުގައި އަވަށްޓެރި ޤައުމުތަކުންދޭ އެހީތެރިކަން ފުލުހުންނަށް ލިބެމުންދާކަމަށް ރައީސް ވިދާޅުވިއެވެ. ރައީސް ވިދާޅުވީ މިކަމުގައި އެބައިމީހުންނަށް ހިމަ ނަރެއްގެ ޖާގަވެސް ނުދެއްވުމަށް ގަދައަޅައި ފުލުހުން ކުރައްވާ މިންނެތް ބުރަ މަސައްކަތަށް ޝުކުރު އަދާކުރައްވާ ކަމަށެވެ. ދިވެހި ފުލުހުންނާއި، ކަސްޓަމްސްއާއި، ދިވެހި ސިފައިން އަދި މިކަމުގައި އެ މުއައްސަސާތަކަށް އެހީތެރިވެދޭ ބައިނަލްއަޤްވާމީ ގުޅުންތަކާއި، އަވަށްޓެރި ޤައުމުތަކަށްވެސް ރައީސް ޝުކުރު އަދާކުރެއްވިއެވެ.
ރައީސް ވިދާޅުވީ 89 އަހަރުވިޔަސް، ޙަޤީޤަތުގައި ފުލުހުންނަށް ބޭނުންވާ، ވަރަށް ގިނަ ކަންކަން އަދިވެސް ހުރީ މާޒީގައި ހުއްޓި ހުރި ތަނުގައި ކަމަށެވެ. ޚާއްޞަކޮށް، ފުލުހުންގެ ބެރެކްސްތަކާއި، މަސައްކަތްކުރާ މާޙައުލުގައި ހުންނަންޖެހޭ ފަސޭހަކަން، އޭގެ ގާތަކަށްވެސް ފުރިހަމަވެފައެއް ނެތް ކަމަށެވެ. އަދި ލިބޭ ހުނަރާއި ތަމްރީނާ އެކުއެކީ، ފުލުހުންނަށް ބޭނުންވާ އުޅަނދުފަހަރާއި، ވެހިކަލްތަކާއި، އެހެނިހެން ވަސީލަތްތައްވެސް މުހިންމު ކަމަށެވެ.
ރައީސް ވިދާޅުވީ މިއަހަރުގެ ތެރޭގައި އިތުރު 25 ރަށެއްގައި ފުލުހުންގެ ޚިދުމަތް ގާއިމްކުރެވޭނެ ކަމަށެވެ. އަދި ރާއްޖޭގެ 61 ރަށެއްގައި ފުލުހުންގެ މަރުކަޒުތައް ބިނާކުރަން ކޮންޓްރެކްޓް ކުރެވިފައިވާ ކަމަށާއި، 2023 ވަނަ އަހަރުގެ ނިޔަލަށް ރާއްޖޭގެ މީހުން ދިރިއުޅޭ ހުރިހާ ރަށެއްގައި ދިވެހި ފުލުހުންގެ ޚިދުމަތް އިރާދަކުރެއްވިއްޔާ ޤާއިމުކޮށް ނިމޭނެ ކަމަށް ރައީސް ވިދާޅުވިއެވެ. އަދި ޢުމްރާނީ ވަސީލަތާއެކުއެކީ، ދިވެހި ފުލުހުންނަށް ބޭނުންވާ އިންސާނީ ވަސީލަތުގެ މަގު މިދަނީ އަލިވަމުން ކަމަށާއި، މިއީ ރައްކާތެރި، އަމާން ދިވެހިރާއްޖެއެއް ކަށަވަރު ކުރުމަށް ހިންގޭ ބޮޑު މަޝްރޫޢެއް ކަމަށް ރައީސް ވިދާޅުވިއެވެ.
އެއްދުވަހުން އަނެއްދުވަހަށް ދުނިޔެ ބަދަލުވަމުން ދަނީ ޓެކްނޮލޮޖީގެ އައު މަރުޙަލާއަކަށް ކަމަށާއި ޓެކްނޮލޮޖީގެ ފަސޭހަތައް ފުލުހުންނަށް ފަހިވުމަކީ ކޮންމެހެން ލާޒިމްކަމެއް ކަމަށް ރައީސް ވިދާޅުވިއެވެ. އަދި ޚިދުމަތް ދިނުމާއި، ޚިދުމަތް ލިބިގަތުމުގައި އަދުގެ ޒަމާން ބަރޯސާވާން ޖެހިފައިވަނީ ޓެކްނޮލޮޖީއަށް ކަމަށާއި، ޕޮލިސް އެޕްލިކޭޝަނަކީ، މި މަގުން ކުރިއަށް އެޅި ފިޔަވަޅެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ ފުލުހުން އަލަށް ބޭނުންކުރަން ފެށި ބޮޑީ ކެމެރާއަކީ ވަރަށް ބޮޑު ކުރިއެރުމެއް ކަމަށެވެ. އަދި އިންސާނީ ޤަދަރާއި ކަރާމާތާއެކު، ދެފުށް ފެންނަ ނިޒާމަކުން ތަޙުޤީޤު ހިންގޭނެވެސް ވަސީލަތެއް ކަމަށެވެ. ކުރެވޭ ތުހުމަތާއި އިލްޒާމްތަކުން ބަރީއަވެ، ކުށެއް ނުކުރާނަމަ، އެކަން ސާބިތުކުރެވޭނެ މަގެއް ކަމަށް ރައީސް ވިދާޅުވިއެވެ. އަދި ބޮޑީ ކެމެރާއަކީ ފުލުހުން ޒިންމާދާރު ކުރުވާ ވަސީލަތެކޭ ބައެއް ބޭފުޅުން ވިދާޅުވާ ކަމަށާއި، އެމަނިކުފާނު ދަންނަވަން ބޭނުންވަނީ، އޭގެ އަނެއްފަރާތްވެސް އޮތް ވާހަކަފުޅު ކަމަށެވެ. އަދި ފުލުހުންނާއި މުޢާމަލާތު ކުރުމުގައި ކުށެއް ކުރާނަމަ، އެ ކުށްކުރި މީހާގެ ކުށް ސާބިތު ކުރުމަށްވެސް ބޮޑީ ކެމެރާ ނުހަނު މުހިންމު ކަމަށާއި، ޙަޤީޤީ ބޭނުމަކީ ޤާނޫނުގެ ވެރިކަން ނެގެހެއްޓުން ކަމަށް ރައީސް ވިދާޅުވިއެވެ.
