ހޯރަފުށި އިންޓަރނޭޝަނަލް ޕްރީސްކޫލްގެ ބިންގާ އަޅައިފި
1 އެޕްރީލު 2022 | ހުކުރު 04:31ސްކޫލްގެ ބިންގާ އަޅުއްވައިދެއްވީ ހޯރަފުށީ ދާއިރާގެ މެމްބަރު އަހުމަދު ސަލީމު
ހޯރަފުށީ ޕްރީސްކޫލްގެ ބިންގާ އެޅުމުގެ ރަސްމިއްޔާތު
ހއ. ހޯރަފުށީ އިންޓަރނޭޝަނަލް ޕްރީސްކޫލްގެ ބިންގާ އަޅައިފިއެވެ.
މިކަމަށްޓަކައި ހޯރަފުށީގައި ބޭއްވި ރަސްމިއްޔާތުގައި ސްކޫލްގެ ބިންގާ އަޅުއްވައިދެއްވީ ހޯރަފުށީ ދާއިރާގެ މެމްބަރު އަހުމަދު ސަލީމެވެ. މި ރަސްމިއްޔާތުގައި ހޯރަފުށީ ކައުންސިލްގެ ނައިބު ރައީސް އަހުމަދު އިމްދާޙުއާއި، އެމްޓީސީސީގެ ސީއީއޯ އާދަމް އާޒިމްއާއި އެމްޓީސީސީގެ އިސްވެރިން ބައިވެރިވެވަޑައިގެންނެވިއެވެ.
މި މަޝްރޫއަކީ އެމްޓީސީސީގެ އިޖުތިމާއީ ޒިންމާގެ ދަށުން ކުރިއަށްގެންދާ މަސައްކަތެކެވެ. އެމްޓީސީސީގެ އަމާޒަކީ މި މަޝްރޫއުގެ މަސައްކަތް ކުރުމުއްދަތެއްގެ ތެރޭގައި ނިންމައި، ޚިދުމަތަށް ބޭނުންވެފައި ތިބި ތުއްތު ކުދިންނާއި ބެލެނިވެރިންގެ އުންމީދު ފުރިހަމަ ކޮށްދިނުންކަމުގައި އެކުންފުނިން ބުނެއެވެ.
އަދި ރާއްޖޭގެ މުސްތަގުބަލް ކަމުގައިވާ ޅަދަރިންގެ އިލްމާއި ހިލްމު ތަރައްގީކުރުމަށް ބޭނުންވާ ވަސީލަތްތައް ފޯރުކޮށްދިނުމުގެ ރޫހަކީ ކުންފުނި އުފެދުނީއްސުރެ ސަގާފަތުގައި ހިމެނޭކަމެއް ކަމަށާއި މި މަސައްކަތުގައި ރާއްޖެއާއި ރާއްޖެއިން ބޭރުގެ ހިލޭސާބަހަށް މަސައްކަތްކުރާ ޖަމާއަތްތަކާއި ގާތުން އެމްޓީސީސީން މަސައްކަތްކުރަމުން ގެންދާކަމުގައިވެސް އެކުންފުނިން ބުނެއެވެ.
އެމްޓީސީސީގެ މިވީ ދިގު ތާރީޚުގައި އެކުންފުނިން ވަނީ ތަފާތު ރޮނގުރޮނގުން އިޖްތިމާއީ ޒިންމާ އަދާކޮށްދީފައެވެ.
