ރާއްޖެއަށް ކެނެބިސް އެތެރެކުރި ބަންގްލަދޭޝް މީހަކު އުމުރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
އަންގާރަ ދުވަހު ކްރިމިނަލް ކޯޓުން ކުރި މި ޙުކުމުގައިވަނީ ބަންގްލަދޭޝްގެ ރައްޔިތެއްކަމަށްވާ ގޮސްޕެލް ބައިރަގީގެ މައްޗަށް ކޮށްފައިވާ ރާއްޖެއަށް މަސްތުވާތަކެތި އެތެރެކުރުމުގެ ކުށުގެ ދައުވާ ސާބިތުވާކަމަށް ކަނޑައަޅާފައެވެ.
މި މައްސަލައިގައި އޭނާގެ މައްޗަށް ދައުވާ އުފުލާފައިވަނީ އޭނާ ރާއްޖެއަށް އައިއިރު، އެއާޕޯޓުން އޭނާގެ ލަގޭޖު ފާސްކުރިއިރު ކެނެބިސް ފެނިފައިވާތީއެވެ. އެއީ 2020 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހުގެ ރޭގައެވެ. އެގޮތުން މަސްތުވާތަކެތި ފެނިފައިވަނީ އޭނާ ގެނައި ފޮށިގަނޑެއްގެ ތެރޭގައި ބަންދުކޮށްފައި ހުއްޓައެވެ.
ކަސްޓަމްސް އޮފިސަރުން ބުނެފައިވާ ގޮތުގައި އޭނާގެ ލަގޭޖު އިތުރަށް ބަލައި ފާސްކުރީވެސް އޭނާގެ ކިބައިން ޝައްކު ކުރެވޭ ކަންތައްތަކެއް ފެނުމުގެ ސަބަބުންނެވެ. އެގޮތުން އޭނާގެ ޙަރަކާތްތައް ހުރި ގޮތާއި، އޭނާއާއި ކުރި ސުވާލުތަކަށް ޖަވާބު ދިން ގޮތުގެ އިތުރުން، އޭނާ ހުރި ގޮތާއި، އޭނާގެ "އައި މޫވްމަންޓް" ތަކުން އޭނާއާމެދު ޝައްކު ކުރެވޭ ކަންކަން ފެނިފައިވާކަމަށް ހެކިވެރިން ބުނެއެވެ.
އަދި އޭނާ ގެނައި ލަގޭޖު ފާސްކުރަން އުޅުމުން އޭނާ ރުޅިގަދަވިކަންވެސް ހެކިވެރިން ވަނީ ފާހަގަކޮށްފައެވެ.
އެ ފޮށިގަނޑާމެދު ޝައްކު ކުރެވިގެން ކަސްޓަމްސް އޮފިސަރުން އެ ޗެކުކުރަމުން ދަނިކޮށް އޭނާ ވަނީ އެތަނުން ފިލުމަށް މަސައްކަތް ކޮށްފައެވެ. ނަމަވެސް ކަސްޓަމްސް އޮފިސަރުންގެ ބެލުމުގެ ދަށަށް އޭނާ ގެނެސް، އޭނާގެ ހާޒިރުގައި އެ ފޮށިގަނޑު ބަލައި އޭގެން މަސްތުވާތަކެތި ވަނީ ހޯދާފައެވެ.
އެ ތަކެތީގެ ޖުމުލަ ބަރުދަނުގައި 4448 ގްރާމް ހުރިކަމަށް ހެކިވެރިން ވަނީ ބުނެފައެވެ.
އިބްތިދާއީ މަރުޙަލާގައި ދައުވާއަށް އޭނާ އިންކާރު ކުރުމުން ދައުލަތުން ވަނީ އޭނާއާއި ދެކޮޅަށް ގިނަ ހެކިތަކެއް ހުށައަޅާފައެވެ. އެގޮތުން އޭނާ ބުނާ ގޮތުގައި އެއީ މަސް ފޮށިގަނޑެއް ކަމަށް ބުނެ، ލިޓަން ކިޔާ މީހަކާއި ޙަވާލު ކުރަން އޭނާގެ ބޭބެ ދިން ފޮށިގަނޑެއް ކަމަށް ބުނެފައިވެއެވެ.
ގާޒީ ހުސައިން ފާއިޒު ރަޝާދު ނިންމެވި މި މައްސަލައިގައި އޭނާގެ މައްޗަށް ކުށް ސާބިތުވެފައިވާތީ އޭނާ އުމުރަށް ޖަލަށްލުމާއެކު، އެއް ލައްކަ ރުފިޔާއިން ޖޫރިމަނާ ކުރުމަށް ވަނީ ޙުކުމް ކުރައްވާފައެވެ. ޙުކުމުގައި ވަނީ އެ ފައިސާ 29 މާރޗުން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށް އަންގަވާފައެވެ.
