ސަބްމެރިން ކޭބަލް އެޅުމުގެ ސަރވޭގެ މަސައްކަތް އޭޕްރިލް މަހުގެ 11 ވަނަ ދުވަހު ނިމޭނެ ކަމަށް އޯޝަން ކަނެކްޓް މޯލްޑިވްސް އިން ބުނެފިއެވެ.
މި ސަރވޭ ކުރިއަށް ގެންދިޔުމަށްޓަކައި "އޯޝަން ސާވޭޔާރ" ނަމަކަށް ކިޔާ ބޯޓެއް ވަނީ ރާއްޖެ އައިސްފައެވެ. އޯޝަން ކެނެކްޓުން އަމާޒު ހިފާފައިވަނީ ރެކޯޑް ވަގުތެއްގައި ކޭބަލް އެޅުމަށް ކަމަށާއި ސަރވޭގެ މަސައްކަތް އެއް މަސްދުވަހުގެ ތެރޭގައި ނިންމުމަށް ކަމަށް ވަނީ ބުނެފައެވެ.
މި ސަރވޭއަކީ ސަބްމެރިން ކޭބަލް އެޅުމުގެ މަސައްކަތް ފެށުމަށް އެޅޭ ފުރަތަމަ ފިޔަވަޅު ކަމަށާއި މިއީ ކޭބަލް އަޅާނެ މަގު ޗެކްކޮށް އެ މަގުން ކޭބަލް އެޅޭނެ ގޮތް ބެލުމަށް އެޅުނު މުހިންމު ފިޔަވަޅެއް ކަމަށް ވެސް އޯޝަން ކަނެކްޓުން ވަނީ ބުނެފައެވެ.
ސަރުކާރުން އަޅާ ފުރަތަމަ ސަބްމެރިން ކޭބަލް އެޅުމަށް އިންޑިޔާގެ އެންމެ މުއްސަނދި މީހާ، މުކޭޝް އަމްބާނީގެ ރިލަޔަންސް ޖިއޯ ކުންފުންޏާއެކު ވަނީ ސޮއިކޮށްފައެވެ. މިއެއްބަސްވުމުގައި ސަރުކާރުގެ ފަރާތުން ސޮއިކޮށްފައިވަނީ ސަރުކާރުގެ 100 އިންސައްތަ ހިއްސާ އޮންނަ މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ ސަބްސިޑަރީ ކުންފުންޏެއްކަމަށްވާ އޯޝަން ކަނެކްޓް މޯލްޑިވްސްގެ ޗެއަރޕަރސަން ރިޔާޒް މަންސޫރުއެވެ. އަދި ރިލަޔަންސް ޖިއޯ ކުންފުނީގެ ފަރާތުން ސޮއިކޮށްފައިވަނީ ކުންފުނީގެ ރައީސް އަދި ބޯޑު މެންބަރު މެތިއު އޫމަންއެވެ. ސަރުކާރުން މި ކޭބަލް އަޅަނީ ރާއްޖޭގައި އިންޓަނެޓްގެ އަގުހެޔޮކޮށް އަވަސް އިންޓަނެޓްގެ ޚިދުމަތެއް މުޅި ރާއްޖެއަށް ފޯރުކޮށްދިނުމަށެވެ.
ރާއްޖެއާއި ގުޅާލުމަށް ހަމަޖެހިފައިވަނީ ރިލަޔަންސް ކުންފުނިން އަޅާ އިންޑިޔާ-އޭޝިޔާ އެކްސްޕްރެސް (އައިއޭއެކްސް) ކޭބަލެވެ. މިއީ އިންޑިޔާގެ މުމްބާއީން ފެށިގެން ސިންގަޕޫރާއި ހަމައަށް އަޅާ ކޭބަލެކެވެ.
މީގެ އިތުރުން ވެސް އެ ކުންފުނިން އަންނަނީ އިންޑިޔާ-ޔޫރަޕް އެކްސްޕްރެސް ކޭބަލްގެ ނަމުގައި ވެސް ކޭބަލެއް ގާއިމު ކުރަމުންނެވެ. މިއީ ޔޫރަޕުގެ ގިނަ ގައުމުތަކާއި އިންޑިޔާ ގުޅާލާނެ ކޭބަލެކެވެ.
އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވީ، މި މަސައްކަތަކީ ރާއްޖޭގެ އިގުތިސާދު ސިންދަފާތުކުރުމަށް ސަރުކާރުން ކުރަމުން ގެންދަވާ މަސައްކަތުގެ ދަށުން އެޅިގެންދާ މުހިންމު ފިޔަވަޅެއްކަމަށެވެ. މިއާއެކު މުޅި ރާއްޖެއަށް ހަލުވި އަދި އަވަސް ސްޕީޑްގެ އިންޓަނެޓްގެ ޚިދުމަތެއް ލިބިގެންދާނެކަމަށް މިނިސްޓަރު ވިދާޅުވިއެވެ.
އޯޝަން ކެނެކްޓުން ބުނީ މި ކޭބަލް ހުޅުމާލޭ ފޭސް 2 ގައި ޖައްސާނީ 2023 ވަނަ އަހަރު ނިމުމުގެ ކުރިން ކަމަށާއި އޭރުން ކޭބަލްގެ ޚިދުމަތް ލިބޭނެ ކަމަށް ލަފާ ކުރެވޭ ކަމަށެވެ.
