ސަރުކާރުން އަޅާ ސަބްމެރިން ކޭބަލްއާއެކު އިންޓަރނެޓުގެ ކެޕޭސިޓީ އިތުރުވާނެ: ފައްޔާޒް

ސަރުކާރުން އަޅާ ސަބްމެރިން ކޭބަލްއާއެކު އިންޓަރނެޓުގެ ކެޕޭސިޓީ އިތުރުވާނެކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.

ދިރިއުޅުމުގެ ހުރިހާ ކަމެއް އިންޓަރނެޓަށް ބަރޯސާވެފައިވާކަން ފާހަގަ ކުރައްވައި މިނިސްޓަރ ވިދާޅުވީ، އިންޓަރނެޓުގެ ކެޕޭސިޓީ މިހާރަށްވުރެ އިތުރުކުރަން ޖެހޭކަމަށެވެ. ވަކިން ޚާއްސަކޮށް ސަރުކާރުގެ ހުރިހާ ޚިދުމަތެއް އޮންލައިންއަށް ބަދަލުވެގެންދާއިރު، އިންޓަރނެޓު ބޭނުންކުރަން މަޖުބޫރުވަމުންދާކަމަށް މިނިސްޓަރ ވިދާޅުވިއެވެ.

ދައުލަތުގެ މީޑިއާގެ ޕްރޮގްރާމެއްގައި އެ ވާހަކަ ދައްކަވަމުން މިނިސްޓަރ ވިދާޅުވީ، ސަރުކާރުން އަޅާ ސަބްމެރިން ކޭބަލްގެ ސަބަބުން ކެޕޭސިޓީ މިހާރަށްވުރެ އިތުރުވާނެ ކަމަށެވެ. ހަމައެއާއެކު، ސަބްމެރިން ކޭބަލްއާއެކު މިހާރަށްވުރެ އިންޓަރނެޓުގެ އަގުވެސް ހެޔޮވާނެކަން މިނިސްޓަރ ފާހަގަކުރެއްވިއެވެ.

ސަރުކާރުން އަޅާ ފުރަތަމަ ސަބްމެރިން ކޭބަލް އެޅުމުގެ މި މަޝްރޫއު ހަވާލުކުރީ އިންޑިޔާގެ އެންމެ މުއްސަނދި މީހާ، މުކޭޝް އަމްބާނީގެ ރިލަޔަންސް ޖިއޯ ކުންފުންޏާއެވެ. މިއެއްބަސްވުމުގައި ސަރުކާރުގެ ފަރާތުން ސޮއިކޮށްފައިވަނީ ސަރުކާރުގެ 100 އިންސައްތަ ހިއްސާ އޮންނަ މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ ސަބްސިޑަރީ ކުންފުންޏެއްކަމަށްވާ އޯޝަން ކަނެކްޓް މޯލްޑިވްސްގެ ފަރާތުންނެވެ.

ސަރުކާރުން މި ކޭބަލް އަޅަނީ ރާއްޖޭގައި އިންޓަރނެޓްގެ އަގުހެޔޮކޮށް އަވަސް އިންޓަރނެޓްގެ ޚިދުމަތެއް މުޅި ރާއްޖެއަށް ފޯރުކޮށްދިނުމަށެވެ.

ރާއްޖެއާއި ގުޅާލުމަށް ހަމަޖެހިފައިވަނީ ރިލަޔަންސް ކުންފުނިން އަޅާ އިންޑިޔާ-އޭޝިޔާ އެކްސްޕްރެސް (އައިއޭއެކްސް) ކޭބަލެވެ. މިއީ އިންޑިޔާގެ މުމްބާއީން ފެށިގެން ސިންގަޕޫރާއި ހަމައަށް އަޅާ ކޭބަލެކެވެ.

އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވީ، މި މަސައްކަތަކީ ރާއްޖޭގެ އިގުތިސާދު ސިންދަފާތުކުރުމަށް ސަރުކާރުން ކުރަމުންގެންދާ މަސައްކަތުގެ ދަށުން, އެޅިގެންދާ މުހިންމު ފިޔަވަޅެއްކަމަށެވެ. މިއާއެކު މުޅި ރާއްޖެއަށް ހަލުވި އަދި އަވަސް ސްޕީޑްގެ އިންޓަރނެޓްގެ ޚިދުމަތެއް ލިބިގެންދާނެކަމަށް މިނިސްޓަރު ވިދާޅުވިއެވެ.

އޯޝަން ކެނެކްޓުން ބުނީ މި ކޭބަލް ހުޅުމާލޭ ފޭސް 2ގައި ޖައްސާނީ 2023 ވަނަ އަހަރު ނިމުމުގެ ކުރިން ކަމަށެވެ. އޭރުން ކޭބަލްގެ ޚިދުމަތް ލިބޭނެކަމަށް ލަފާކުރެވޭ ކަމަށް މިނިސްޓްރީން ބުނެއެވެ.