ގައުމުގެ ސުލްހަޔަށް ފުލުހުން ކުރާ މަސައްކަތް ޝުކުރުވެރިކަމާއެކު ބަލައިގަންނަން: ރައީސް ޞާލިހު
29 މާރިޗު 2022 | އަންގާރަ 12:43ދިވެހި ފުލުހުންނާއި، ފުލުހުންގެ އާއިލާތަކަށް ރައީސް ވަނީ ފުލުހުންގެ އަހަރީ ދުވަހުގެ ތަހުނިޔާ ވިދާޅުވެފައި
ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ހުޅުވުމުގެ ރަސްމިއްޔާތު
ދިވެހި ފުލުހުންގެ ހިދުމަތުގެ 89 ވަނަ އަހަރީ ދުވަހުގެ މުނާސަބަތުގައި ފުލުހުންނާއި ފުލުހުންގެ އާއިލާތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ތަހުނިޔާ ވިދާޅުވެއްޖެއެވެ.
މިކަން ފާހަގަ ކުރައްވާ އެމަނިކުފާނު ކުރެއްވި ޓްވީޓެއްގައި ވިދާޅުވީ ގައުމުގެ ސުލްހައާއި ހަމަޖެހުމަށް ފުލުހުން ކުރާ މަސައްކަތް ޝުކުރުވެރިކަމާއެކު ބަލައިގަންނަންނަވާ ކަމަށެވެ.
ދިވެހި ފުލުހުންގެ ހިދުމަތަށް 89 އަހަރު ފުރުމާއި ގުޅިގެން ހޯމަ ދުވަހުގެ ރޭ 00:00 ގައި ފުލުހުންގެ މައި އިދާރާ ކުރިމަތީގައި ދިދަ ނެގުމުގެ ރަސްމިއްޔާތެއް ވަނީ ބާއްވާފައެވެ.
ދިވެހި ފުލުހުންގެ ޚިދުމަތް ރަސްމީކޮށް ފެށިގެން ދިޔައީ 1933 ވަނައަހަރުގެ މާރޗު 29 ވަނަ ދުވަހު، ރާއްޖޭގެ ކީރިތި މަހާރަދުން، އައްސުލްތާން މުޙައްމަދު ޝަމްސުއްދީން ތިނެއް، ''ފުލުހު މީހުންގެ ގާނޫނު'' ތަސްދީގު ކުރެއްވުމާ ގުޅިގެންނެވެ. މި ގާނޫނަކީ 1932 ޑިސެންބަރު 22 ވަނަ ދުވަހު ދިވެހިންނަށް ލިބުނު ފުރަތަމަ ގާނޫނު އަސާސީ އަށް އިތުރު ކުރެވުނު ބޮޅެކެވެ.
ދިވެހި ފުލުހުންގެ ޚިދުމަތުން މައުލޫމާތު ދޭ ގޮތުގައި މި ގާނޫނުގެ ދަށުން އެންމެ ފުރަތަމަ އުފެދުނު ފުލުހުންގެ ފައުޖުގައި ހިމެނެނީ 120 ފުލުހުންނެވެ. މި ފައުޖު ބެހިފައިތިބީ މާލޭގެ ހަތަރު އަވަށުގެ މައްޗަށެވެ. އެއީ މާފަންނު، މައްޗަންގޮޅި އަދި ހެންވޭރު، މިއިން ކޮންމެ އަވަށަކަށް 32 ފުލުހުން އަދި ގަލޮޅަށް 24 ފުލުހުންނެވެ.
މީގެ އިތުރުން، ފުލުހުންގެ ޚިދުމަތް ވީހާގާތުން އަވަހަށް ރައްޔިތުންނަށް ފޯރުކޮށްދިނުމަށްޓަކައި، ޚިދުމަތް މުޅިރާއްޖެއަށް ފުޅާކޮށް، ދެވޭ ޚިދުމަތުގެ ފެންވަރުމަތިކުރުމުގެ މަސައްކަތް 1992 ވަނަ އަހަރު ފެށިގެން ވަރަށް ބާރު ސްޕީޑެއްގައި ކުރިޔަށް ދިޔަކަމަށް ފުލުހުންގެ އިދާރާ އިން މައުލޫމާތު ދެއެވެ. އެގޮތުން، 1993 އޮކްޓޫބަރު 06 ވަނަ ދުވަހު، ސ. ގަމުގައި ފުލުހުންގެ ޚިދުމަތްދޭން ފެށުނެވެ. މިއީ، މާލެއިން ބޭރުގައި ސިފައިން ގާއިމުވެ ތިބެގެން ފުލުހުންގެ ޚިދުމަތް ދިނުމުގެ ފެށުމުގެ ގޮތުގައި ދިވެހި ފުލުހުންގެ ޚިދުމަތުން ވަނީ ސިފަ ކޮށްފައެވެ.
ދިވެހި ފުލުހުންގެ ޚިދުމަތް ފުޅާކޮށް ޒަމާނީ ކުރުމަށް ކުރެވެމުންދާ މަސައްކަތުގައި މިހަފްތާގެ އާދީއްތަ ދުވަހުވަނީ ޕޮލިސިންގ އެންޑް ލޯ އެންފޯސްމަންޓް ތަމްރީން ދޭނެ ބައިނަލް އަގްވާމީ ފެންވަރުގެ ކޮލެޖެއް ރާއްޖޭގައި ހުޅުވާފައެވެ، އައްޑޫ ސިތީގައި ގާއިމް ކުރި ކޮލެޖް އަކީ އިންޑިޔާ ސަރުކާރުގެ އެހީގައި ގާއިމް ކުރި ބިނާއެކެވެ.
ދިވެހި ފުލުހުންގެ ޚިދުމަތަށް 89 އަހަރު ވެފައިވާއިރު، ދާދި ފަހުން ވަނީ ދިވެހި ފުލުހުންގެ ޚިދުމަތުގެ އައު ގާނޫނަށް ވެސް އަމަލުކުރަން ފަށާފައެވެ.
މި ގާނޫނަށް އަމަލުކުރަން ފެށުމާއެކު، ފުލުހުންގެ ޤާނޫނުގެ ދަށުން ގާއިމުކުރެވިފައިވާ "މޯލްޑިވްސް ޕޮލިސް ސަރވިސް"، މި ޤާނޫނުގެ ދަށުން އުފައްދާ "ދިވެހި ފުލުހުންގެ ޚިދުމަތް" މިނަމަށް ބަދަލުވާނެއެވެ. ނަމަވެސް "ދިވެހި ފުލުހުންގެ ޚިދުމަތް" މިނަން އިނގިރޭސި ބަހުން ބޭނުންކުރާނެ ނަމަކީ "މޯލްޑިވްސް ޕޮލިސް ސަރވިސް" ކަމުގައި މި ގާނޫނުގައި ބަޔާންކޮށްފައިވެއެވެ.
