ޔޫތް މނިސްޓަރ އަހުމަދު މަހްލޫފް އާލާސްކަންފުޅާ އުޅުއްވާތީ މިނިސްޓަރާ ސުވާލުކުރުން ރައްޔިތުންގެ މަޖިލީހުން ފަސްކޮށްފިއެވެ.
ހޯމަ ދުވަހުގެ ޖަލްސާއަށް އެޖެންޑާ ކޮށްފައި އޮތީ، މާވަށު ދާއިރާގެ މެމްބަރު މުހައްމަދު ސައީދު ޔޫތް މިނިސްޓަރާ ސުވާލު ކުރެއްވުމެވެ. ސައީދު ހުށަހެޅުއްވި ސުވާލަކީ ލ.ކުނަހަންދޫގައި މިއަހަރު ފުޓްސެލް ދަނޑަކާއި އައުޓްޑޯ ޖިމެއް ޤާއިމު ކޮށްދެއްވާނެކަމަށް މިދިޔަ އަހަރު މިނިސްޓަރ ވަނީ ވިދާޅުވެފައިކަމަށާއި، މި މަސައްކަތް ބަޔަކާ ޙަވާލުކުރެވޭނީ ކޮން އިރަކުންތޯ އާއި، މިކަންކަން ކުރުމަށް މިހާތަނަށް އެއްވެސް މަސައްކަތެއް ކުރެވިފައިވާނަމަ އޭގެ ތަފްސީލަކީ ކޮބައިތޯއެވެ.
އެހެންނަމަވެސް މިނިސްޓަރ އާލާސްކަންފުޅާ އުޅުއްވާތީ ހޯމަ ދުވަހުގެ ޖަލްސާގައި ސުވާލު ނުކުރެވުނު ނަމަވެސް، ވަޒީރުގެ ހާލުކޮޅު ރަނގަޅުވުމުން މިސުވާލު މަޖިލީހުގައި އެޖެންޑާކޮށް ކުރިއަށް ގެންދަވާނެކަމަށް މަޖިލިސް ރައީސް މުހައްމަދު ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ވަޒީރަކާއި ސުވާލު ކުރެއްވުމަށް ލިބޭ ފުރުސަތުގައި ސުވާލު ކުރައްވަން އޮތް ވަޒީރަކަށް މިފަދަ ހާލަތެއް މެދުވެރިވެއްޖެނަމަ އެސުވާލު ކުރުމުގެ ފުރުސަތު ފަހުން ލިބޭނެ ކަމަށެވެ. ނަމަވެސް މެމްބަރު ހާޒިރު ނުވެއްޖެނަމަ އެފުރުސަތު ފަހުން ލިބޭނެ ގޮތަކަށް މަޖިލިސް ގަވާއިދުގައި ނެތްކަމަށެވެ.
