ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި އައްޑޫއިން ބަޔަކު ހައްޔަރުކޮށްފި
27 މާރިޗު 2022 | އާދީއްތަ 17:01ހައްޔަރުކޮށްފައިވަނީ ކިތައް މީހުން ކަމެއް ހާމަކޮށްފައެއްނުވޭ
ފުލުހުން ހިންގި ޚާއްސަ އޮޕަރޭޝަނެއްގެ ތެރެއިން
ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި އައްޑޫ ސިޓީން ބަޔަކު ހައްޔަރުކޮށްފިއެވެ.
ފުލުހުން ބުނީ ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި އާދިއްތަ ދުވަހު އައްޑޫއިން ބަޔަކު ހައްޔަރުކޮށްފައިވާ ކަމަށެވެ. އެކަމާގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން ބުނެއެވެ.
މި މައްސަލާގައި ބަޔަކު ހައްޔަރުކޮށްފައިވާކަން ފުލުހުން ހާމަކޮށްފައިވާއިރު، ހައްޔަރުކޮށްފައިވަނީ ކިތައް މީހުން ކަމެއް ހާމަކޮށްފައިނުވެއެވެ.
ޓެރަރިޒަމްގެ އަމަލުތައް ހުއްޓުވުމަށް ފުލުހުން އަބަދުވެސް ދަނީ މަސައްކަތް ކުރަމުންނެވެ. މިގޮތުން މާލޭގެ އިތުރުން އަތޮޅުތެރޭގައި ވެސް ޚާއްސަ އޮޕަރޭޝަންތައް ހިންގަމުންދެއެވެ. މީގެ ކުރިން ވެސް އައްޑޫ ސިޓީން ޓެރަރިޒަމްގެ ތުހުމަތުގައި ބަޔަކު ހައްޔަރުކޮށްފައިވެއެވެ. ރާއްޖޭގައި ޓެރަރިޒަމަށް ހިތްވަރުދީ އެކަން ފެތުރުމަށް ބަޔަކު މީހުން އަޑީގައި ތިބެގެން މަސައްކަތް ކުރާއިރު، ކުޑަކުދިން ގްރޫމްކޮށްގެން ޓެރަރިޒަމްގެ އަމަލުތަކެއް ހިންގަން މަސައްކަތްކޮށްފައިވާ ކަމަށް ފުލުހުން ބުނެފައިވެއެވެ.
ޓެރަރިޒަމްގެ އަމަލުތައް ހުއްޓުވުމަށް ކުރަމުންދާ މަސައްކަތުގެ ދަށުން ކާމިޔާބު އޮޕަރޭޝަންތަކެއް ހިންގަމުން ދެއެވެ. އެގޮތުން 18 މެއި 2021ގައި, ޓެރަރިޒަމްއަށް ހިތްވަރުދީ އެމަސައްކަތުގައި އިސްވެ އުޅޭ 49 އަހަރުގެ ދިވެހި ފިރިހެނެއް ވެސް ހައްޔަރުކޮށްފައިވެއެވެ.
