"ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ޒަރިއްޔާއިން ފުލުހުންގެ ޚިދުމަތް އިތުރަށް ޒަމާނީ ކުރެވިގެންދާނެ"
27 މާރިޗު 2022 | އާދީއްތަ 07:50މިއީ އިންޑިއާ ސަރުކާރުން ބޮޑު ހޭދައެއް ކޮށްގެން، އެ ޤައުމުގެ ހިލޭ އެހީއާއެކު ކޮށްދީފައިވާ މުހިއްމު މަސައްކަތެއް
ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ހުޅުވައިދެއްވުމުގެ ރަސްމިއްޔާތުގެ ތެރެއިން
ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ޒަރިއްޔާއިން ފުލުހުންގެ ޚިދުމަތް އިތުރަށް ޒަމާނީ ކުރެވިގެންދާނެކަމަށް ހޯމް މިނިސްޓަރު ޝެއިޙް އިމްރާން އަބްދުﷲ ވިދާޅުވެއްޖެއެވެ.
އާދިއްތަ ދުވަހު ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ހުޅުވައިދެއްވުމުގެ ރަސްމިއްޔާތުގައި ދެއްކެވި ވާހަކަފުޅުއިގައި މިނިސްޓަރު އިމްރާން ވިދާޅުވީ، މިއީ ރާއްޖޭގެ ދާޚިލީ ރައްކާތެރިކަމާއި ރައްޔިތުންގެ ސަލާމަތް ކަށަވަރު ކޮށްދިނުމަށްޓަކައި މުހިއްމު މަރުކަޒެއް ކަމަށެވެ. އެގޮތުން މި މަރުކަޒުގެ އެހީގައި ދިވެހި ރައްޔިތުންނަށް އަމާންކަމާއި ރައްކާތެރިކަން ފޯރުކޮށްދިނުމަށް ކުރަންޖެހޭ މަސައްކަތްތަކަށް މަގުފަހިވެގެންދާނެކަން މިނިސްޓަރު ފާހަގަކުރެއްވިއެވެ.
މިނިސްޓަރ ވިދާޅުވީ، ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ޤާއިމު ކުރުމަކީ މިހާތަނަށް އައި ސަރުކާރުތަކުންވެސް ދެބަސްވުމެއް ނެތި ކުރިއަށް ގެންދަން ބޭނުންވެފައި އޮތް މަސައްކަތެއް ކަމަށެވެ. ވުމާއެކު، ހުރިހާ ސަރުކާރުތަކުން ދެމިތިބެ، ފުލުހުންނަށްޓަކައި މި މުހިއްމު މަރުކަޒު ޤާއިމު ކޮށްދިނުމަށް ކުރި މަސައްކަތް އިމްރާން ވަނީ ފާހަގަ ކުރައްވައި، އެ ސަރުކާރުތަކުގެ އިސްވެރިންނަށް ޝުކުރު އަދާ ކުރައްވާފައެވެ.
އިމާރާން ވިދާޅުވީ، މިއީ އިންޑިއާ ސަރުކާރުން ބޮޑު ހޭދައެއް ކޮށްގެން، އެ ޤައުމުގެ ހިލޭ އެހީއާއެކު ކޮށްދީފައިވާ މުހިއްމު މަސައްކަތެއް ކަމަށެވެ. އެކަމަށްޓަކައި އިންޑިއާ ސަރުކާރަށް މިނިސްޓަރ ވަނީ ޝުކުރު އަދާ ކުރައްވާފައެވެ.
ދިވެހި ފުލުހުންގެ ޚިދުމަތް މުޅި ރާއްޖެއަށް ފުޅާކުރުމުގެ މަސައްކަތަކީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙުގެ ތަސައްވުރެއްކަން ފާހަގަ ކުރައްވައި މިނިސްޓަރ އިތުރަށް ވިދާޅުވީ، ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ ޒަރިއްޔާއިން އެކަމަށް ބޭނުންވާ ފުލުހުން ތަމްރީނު ކުރުމަށް މަގުފަހިވެގެންދާކަމަށެވެ. ފުލުހުންގެ މުއައްސަސާއަށް ފުރިހަމަ ތަމްރީނާއި ހުނަރުގެ ބޭނުމުގެ މުހިއްމުކަމުގެ މައްޗަށްވެސް މިނިސްޓަރުގެ ވާހަކަފުޅުގައި އަލިއަޅުވާލައްވާފައިވެއެވެ.
މި މަރުކަޒުގެ އެހީގައި ފުލުހުންގެ ޚިދުމަތް އިތުރަށް ޒަމާނީ ކުރެވިގެންދާނެކަންވެސް މިނިސްޓަރު ފާހަގަކުރެއްވިއެވެ. އެގޮތުން އިންސާނީ ވަސީލަތްތައް މަދުވުމުގެ މައްސަލަތަކާއި، ރައްޔިތުންނާ ގާތުން ޚިދުމަތް ނުދެވުމުގެ މައްސަލަތަކަށް މި މަރުކަޒުގެ އެހީގައި ޙައްލު ހޯދުމަށް މަގުފަހިވެގެން ދާނެކަމަށްވެސް މިނިސްޓަރުވަނީ ވިދާޅުވެފައެވެ.
މިސާލެއްގެ ގޮތުން އިޤްތިސާދީ ގޮތުން ޤައުމު ކުރިއަރާއިރުވެސް، ޤައުމުގެ އެތެރޭގެ އަމާންކަން ޤާއިމު ކުރުމަށް މި މަރުކަޒުގެ ބޭނުންތެރިކަން މުހިއްމުކަމަށް މިނިސްޓަރު ވިދާޅުވިއެވެ.
މި ޕްރޮޖްކްޓުގެ ޕްލޭނިންގ މަސައްކަތް ނިންމުމަށްފަހު ޢަމަލީ މަސައްކަތް ފަށާފައިވަނީ 2017 ވަނަ އަހަރު ޖުލައި މަހުއެވެ. އަދި މަސައްކަތް ނިންމަން ކަނޑައަޅާފައިވާ ތާރީޚަކީ 2022 ވަނަ އަހަރުގެ ފެބުރުވަރީގެ ނިޔަލަށެވެ. އިންޑިއާ ސަރުކާރުން 300 މިލިއަން ޑޮލަރުގެ ހިލޭ އެހީއެއް މިޕްރޮޖެކްޓަށް ހޭދަކޮށްފައިވެއެވެ.
