ޓީ10 ކްރިކެޓް: ސީބީއެލް އާއި މިލާން ފައިނަލަށް

ކްރިކެޓް ބޯޑް އޮފް މޯލްޑިވްސް (ސީބީއެމް) އިން ރާއްޖެއަށް މުޅިން އަލަށް ތައާރަފްކޮށްގެން ކުރިއަށް ގެންދާ ޓީ10 ކްރިކެޓް މުބާރާތުގެ ފައިނަލްއަށް ސީބީއެލް ސްޕޯޓްސް އާއި މިލާން ކްރިކެޓް އެކަޑެމީ ދަތުރުކޮށްފިއެވެ.

ސެމީ ފައިނަލުގެ ފުރަތަމަ މެޗުގައި ބައްދަލުކުރީ ސީބީއެލްއާއި ކޮމެޓްސް ކްރިކެޓް ކްލަބެވެ. ހުކުރު ދުވަހު ހެނދުނު ކުޅުނު މި މެޗު ކާމިޔާބުކުރީ ސީބީއެލްއިންނެވެ. ކޮމެޓްސްއިން ކުޅެންއަރާ 10 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 73 ލަނޑެވެ. ސީބީއެލްއިން މެޗު ކާމިޔާބުކުރީ ޖަވާބުގައި ކުޅެންއަރާ ހަތްވަނަ އޯވަރުގެ ތެރޭގައި އެންމެ ކުޅުންތެރިއަކު ނުބައިވެގެން 74 ލަނޑު ހަދައިގެންނެވެ.

މިލާނުން ފައިނަލުގެ ޖާގަ ކަށަވަރުކުރީ މެންދުރުފަހު ކުޅުނު ދެވަނަ ސެމީ ފައިނަލުގައި މާލެ ސްޕޯޓްސް ކްލަބާއި ވާދަކޮށް ކުރިހޯދައިގެންނެވެ. މާލެ ސްޕޯޓްސްއިން ކުޅެންއަރާ 10 އޯވަރުގެ ތެރޭގައި ފަސް ކުޅުންތެރިން ނުބައިވެގެން 112 ލަނޑު ހެދިއެވެ. މިލާނުން މެޗު ކާމިޔބުކުރީ 8.2 އޯވަރު ހަމަވިއިރު އެންމެ ކުޅުންތެރިއަކު ނުބައިވެގެން 115 ލަނޑު ހަދައިގެންނެވެ.

ޖުމްލަ 10 ޓީމުން ބައިވެރިވި މި މުބާރާތް ކުރިއަށް ގެންގޮސްފައިވަނީ ދެގްރޫޕަކަށް ބަހައިގެންނެވެ. އަދި ކޮންމެ ގްރޫޕަކުންވެސް އެންމެ ރަނގަޅު ނަތީޖާ ނެރުނު ހަތަރު ޓީމެއް ކުއާޓާ ފައިނަލުގައި ވާދަކުރިއެވެ.

ފައިނަލް މެޗު އޮންނާނީ މިއަދު މެންދުރުފަހު 14:25 ގައެވެ.