މާލެސިޓީ ގެއެއްގެ ތަޅުންގަނޑު ދަށުގައި ހުރި ގިނަ އަދަދެއްގެ މަސްތުވާތަކެތި ހޯދައިފިއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ގިނަ އަދަދެއްގެ މަސްތުވާތަކެތި ހޯދާފައިވަނީ އިންޓެލިޖެންސްއަށް ލިބުނު މައުލޫމާތާއެކު ހިންގި ޚާއްސަ އޮޕަރޭޝަނެއްގައެވެ. މި މަސްތުވާތަކެތި ހޯދާފައިވަނީ ކަނބާ އައިސާރަނި ހިނގުމުގައި ދެ ބުރިއަށް ހަދާފައި ފަޅަށް ހުރި ގެއަކުންނެވެ.

ފުލުހުން ހިންގި މިއޮޕަރޭޝަނާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ މަސްތުވާތަކެތި ފެނުނީ ފުލުހުންގެ ޑްރަގް އެންފޯސްމެންޓް އެންޑް ނާކޮޓިކްސް އިންޓެލިޖެންސުން ބުފާސްފަތި ދުވަހުން ފެށިގެން ކުރިއަށް ގެންދިޔަ އޮޕަރޭޝަނެއްގައި ކަމަށެވެ. މި އޮޕަރޭޝަންގައި ގާތްގަނޑަކަށް 42 ކިލޯގެ މަސްތުވާތަކެތި އަތުލައިގަނެފައިވާ ކަމަށް ސީޕީ ހަމީދު ވިދާޅުވިއެވެ.

އަދި މި މައްސަލަ އާއި ގުޅިގެން އެކަކު ހައްޔަރުކޮށްފައިވާ ކަމަށްވެސް ސީޕީ ހަމީދު ވިދާޅުވިއެވެ.

ގެއެއްގެ ތަޅުންގަނޑު ދަށުގައި ރައްކާކޮށްފައި ހުރި ގިނަ އަދަދެއްގެ މަސްތުވާތަކެތި އަތުލައިގަނެފައިވާއިރު، މިފަހުން ފުލުހުން ގެންދަނީ މާލެސިޓީގެ އިތުރުން އަތޮޅުތެރޭގައި ކާމިޔާބު އޮޕަރޭޝަންތައް ހިންގަމުންނެވެ.

އެގޮތުން މާޗް މަހުގެ 20 ވަނަ ދުވަހު ވެސް މޯލްޑިވްސް ކަސްޓަމްސް ސަރވިސް އިން ދިން މައުލޫމާތަކާއި ގުޅިގެން ހިންގި އޮޕަރޭޝަނުގައި 17 ކިލޯގެ މަސްތުވާތަކެތި ހޯދައި ފުލުހުންގެ ބެލުމުގެ ދަށަށް ގެންގޮސްފައިވެއެވެ. މި ކޭސް އާއި ގުޅިގެންވެސް ހަތަރު މީހަކު ހައްޔަރުކޮށްފައިވެއެވެ.