ޖުޑީޝަރީގެ ވާހަކަ ދައްކާ ކޮޅުންލާކަށް ނެތެވެ.

ޖުޑީޝަރީ އިސްލާހުކުރުމުގެ ވާހަކަ ދައްކާތާ ޒަމާންތަކެއްވެއްޖެއެވެ. ޖުޑީޝަރީގައި މައްސަލަތަކެއް ހުރިކަން ފާހަގަކުރެވި އެދާއިރާގައި ހުރި މައްސަލަތައް ހައްލުކުރުމަށް އެކި ސަރުކާރުތަކުން މަސައްކަތްތަކެއް ކޮށްފިއެވެ. އަދި މިހާރުވެސް އަންނަނީ ކުރަމުންނެވެ. ނަމަވެސް އަދިވެސް ރައްޔިތުންގެ މާޔޫސްކަމަކީ ޖުޑީޝަރީގައި ހުރި މައްސަލަތަކުގެ ސަބަބުން އެ ރައްޔިތުންނަށް އިންސާފު ނުލިބޭކަމެވެ. ޝަކުވާއަކީ އިންސާފު ނުލިބޭކަމުގެ ޝަކުވާއެވެ. ނިޒާމުގައި ހުރި މައްސަލަތަކާއި ގާނޫނުގައި ހުރި މައްސަލަތަކަކުންނެވެ. ނުވަތަ ޒަމާނުއްސުރެ ގަބޫލުކުރާ އުސޫލުތަކެއް ބަދަލުކުރަން ބޭނުންނުވުމެވެ.

މިސަރުކާރުގެ އެންމެ މުހިންމު ވައުދަކީވެސް ޖުޑީޝަރީ އިސްލާހުކުރުމެވެ. ޖުޑީޝަރީ އިސްލާހުކުރުމަށް 19 ވަނަ ރައްޔިތުންގެ މަޖިލީހުން އެދާއިރާއާ ގުޅުންހުރި ގިނަ ގާނޫނުތަކަކަށް ބަދަލުތަކެއް ގެނެސް ބައެއް ގާނޫނުތައް އުފަންކުރުވިއެވެ. ނިޒާމަށް ބަދަލުތަކެއް ގެންނަންފެށިއެވެ. އަދި މިހާރުވެސް އެމަސައްކަތް ކުރަމުންދެއެވެ. ނަމަވެސް އަދިވެސް ފެންނަނީ ޖުޑީޝަރީގައި ހުރި މައްސަލަތަކުގެ ސަބަބުން އިންސާފާ ނުލިބި ނުވަތަ އިންސާފާ ހިސާބަށް ނުދާތަނެވެ. އޭގެތެރެއިން އެއް ކަމަކީ ކޯޓުތަކުގައި މައްސަލަތައް ދިގުލައިގެން ދިޔުމެވެ. މަތީ ކޯޓުތަކާއި ދަށު ކޯޓުތަކުގައި އެތައް ދުވަހެއްވީ މައްސަލަތަކެއް ފުނިޖެހިފައިވާއިރު އެމައްސަލަތައް ދިގުލައިގެން ދިޔުމުގެ ސަބަބުން އެތައް ރައްޔިތުންތަކެއްގެ ހައްގުތަކެއް ގެއްލިގެންދަނީއެވެ. އޭގެތެރޭގައި މައްސަލަތަކުގައި ޝަރީއަތް ނިމެންދެން ހައްޔަރުކޮށް ބަންދުކޮށްފައި ތިބޭ ގައިދީންނާއި އަނިޔާ ލިބޭ ފަރާތްވެސް ހިމެނެއެވެ.

އޭގެ އެއް މައްސަލައަކީ އައްޑޫ ސިޓީ ހިތަދޫގެ ވިޔަފާރިވެރިއެއް ކަމުގައިވާ އަލީ އަބްދުﷲ މަރާލި މައްސަލައިގައި ބައިވެރިވި މީހަކު ޖަލަށްލުމަށް ކްރިމިނަލް ކޯޓުން ހުކުމްކުރިއިރު ހުކުމް ކުރި ދުވަހު މިވަނީ އޭނާ އަދަބު ތަންފީޒުކޮށް ނިމިފައިވާކަމަށް ގާޒީ ކަނޑައަޅުއްވާފައެވެ. ކީއްވެހެއްޔެވެ؟ އެއީ މި މައްސަލައިގައި އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާ މުޙައްމަދު ޝިފާޒު އޭނާ ތަހުގީގު މަރުޙަލާއިން ފެށިގެން ޝަރީއަތް ނިމެންދެން ބަންދުކޮށްފައި ހުރި މުއްދަތު ޙުކުމުން އުނިކުރުމުން އިތުރަށް ތަންފީޒު ކުރަންޖެހޭ މުއްދަތެއް ނެތުމުންނެވެ.

މިހާދިސާ ހިނގާފައިވަނީ 2 މާރޗު 2016ގައެވެ. އޭގެފަހުން މިހާރު 6 އަހަރު ދުވަސްވީއެވެ. އެހެންކަމުން މައްސަލަ ދިގުލައިގެން ދިޔުމުގެ ސަބަބުން މިވަނީ މައްސަލަ ނިމުނުއިރު އޭނާ މިނިވަންވެފައެވެ. މައްސަލަތައް ދިގުލައިގެން ދިޔުމުގެ ސަބަބުން މިނޫންވެސް މައްސަލަތައް ކުރިމަތިވެއެވެ. އޭގެތެރޭގައި މައްސަލައިގެ ދައުވާ އުފުލާއިރު އަމަލުކުރަމުން އަންނަ ގާނޫނު މައްސަލަނިމޭއިރު ބަދަލުވެ ކުރާ ކުށަށް އެކަށީގެންވާ އަދަބު ނުލިބުމެވެ. ނުވަތަ ކުށްކުރި މީހާގެ މައްޗަށް މައްސަލަ ސާބިތުވާކަމަށް ކޯޓުން ހުކުމްކުރި ނަމަވެސް އަނިޔާ ލިބުނު މީހާއަށް އިންސާފު ލިބުނުކަމުގެ އިހުސާސެއް ނުކުރެވުމެވެ.

ކޯޓުތަކުގައި އެތައް އަހަރެއްވީ މައްސަލަތައް އަދިވެސް ހުރިއިރު ބެކްލޮގްތައް ކުލިއަރ ކުރަން އެތައް އަހަރެއް ނަގާނެކަމަށް ޖުޑީޝަލް ސަރވިސް ކޮމިޝަން (ޖޭއެސްސީ)ންވެސް ވަނީ ފާހަގަކޮށްފައެވެ. ކޯޓުތަކުގެ ތެރޭގައި ކަންކަން ހަމަޖެހިފައިވާ ގޮތުންނާއި އެކަށީގެންވާ ވަސީލަތްތައް ނެތުމާއި މިފަދަ ކަންކަމާހެދި އަދިވެސް ރައްޔިތުން އެންމެ އެދޭ ޖުޑީޝަރީ ނިޒާމަކާއި ހަމައަށް ދެވޭ ގޮތެއް ނުވެއެވެ. އިންސާފު ލިބޭކަމުގެ އިހުސާސެއް ނުކުރެވެއެވެ. މިއީ އަދި ޖުޑީޝަރީގައި ހުރި ބައެއް މައްސަލަތަކެވެ. ނަމަވެސް މިވާހަކަތައް ދައްކާ އަދިވެސް ކޮޅުންލާކަށްނެތެވެ.