ދެ ރަށެއްގައި ކްލާސްރޫމްތަކެއް އެޅުމަށް ބަޔަކާއި ހަވާލުކޮށްފި
24 މާރިޗު 2022 | ބުރާސްފަތި 02:14ކ. ހިންމަފުށީގައި އެޅުމަށް ހަމަޖެހިފައިވަނީ ސްކޫލުގައި 4 ކްލާސްރޫމް އަދި ހޯލު އިމާރާތުގެ މަސައްކަތް
ކ. ހިންމަފުށި ސްކޫލުގައި 4 ކްލާސްރޫމް އަދި ހޯލު އިމާރާތުގެ މަސައްކަތް ހަވާލުކުރުމުގެ އެއްބަސްވުމުގައި ސޮއިކުރުމުގެ ތެރެއިން
ކ. ހިންމަފުއްޓާއި ބ. ކިހާދޫގައި ކުލާސްރޫމްތަކެއް އެޅުމަށް އެޑިޔުކޭޝަން މިނިސްޓްރީން ބަޔަކާއި ހަވާލުކޮށްފިއެވެ.
ކ. ހިންމަފުށީގައި އެޅުމަށް ހަމަޖެހިފައިވަނީ ސްކޫލުގައި 4 ކްލާސްރޫމް އަދި ހޯލު އިމާރާތުގެ މަސައްކަތްކުރުމެވެ. މި މަސައްކަތް ހަވާލުކޮށްފައިވަނީ ޔެސް މޯލްޑިވްސް ޕްރައިވެޓް ލިމިޓެޑާއެވެ.
އެ ފަރާތުން މި މަސައްކަތަށް ހުށައަޅާފައިވަނީ 16,709,293.57 (ސޯޅަ މިލިއަން ހަތްލައްކަ ނުވަހާސް ދުވިސައްތަ ނުވަދިހަ ތިންރުފިޔާ ފަންސާސް ހަތްލާރި) އެވެ. އެއީ މި މަސައްކަތް 365 ދުވަސް ތެރޭގައި ނިންމާ ގޮތަށެވެ.
ބ. ކިހާދޫ ސްކޫލުގައި 2 ކްލާސްރޫމް އިމާރާތްކުރުމާއި ވަށާފާރު ރޭނުމަށް ހަވާލުކުރީ އިސްކޯ އިންވެސްޓްމެންޓް ޕްރައިވެޓް ލިމިޓެޑާއެވެ.
އެ ފަރާތުން މި މަސައްކަތް ކުރުމަށް ހުށަހަޅާފައިވަނީ 2,074,555.06 (ދެމިލިއަން ހަތްދިހަ ހަތަރުހާސް ފަސްސަތޭކަ ފަންސާސް ފަސް ރުފިޔާ ހަލާރި) އެވެ. އެއީ މި މަސައްކަތް 99 ދުވަސް ތެރޭގައި ނިންމާ ގޮތަށެވެ.
