ރޯދަ މަހު ކިޔަވައިދޭނީ ތިން ގަޑިއިރު
24 މާރިޗު 2022 | ބުރާސްފަތި 02:17ޕްރައިމަރީ ގުރޭޑްތަކުގެ ދަރިވަރުންގެ ކިޔެވުން ދެ ގަޑިއިރާއި ތިރީސް މިނެޓަށްވުރެ ދިގު ނުކުރުމަށް އަންގާފައިވޭ
އިސްކަންދަރު ސްކޫލްގެ ދަރިވަރުންތަކެއް
ރޯދަ މަހު ސުކޫލުތަކުގައި ކިޔަވައިދޭނީ ތިން ގަޑިއިރު ކަމަށް ކަނޑައަޅާ އެޑިޔުކޭޝަން މިނިސްޓްރީން އެކަން ސްކޫލްތަކަށް އަންގައިފިއެވެ.
ކިޔަވައި ދިނުމުގެ ވަގުތު ކަނޑައެޅުމުގައި އަމަލު ކުރަން ޖެހޭ އުސޫލު މިނިސްޓްރީން ސްކޫލްތަކަށް ފޮނުވާފައިވާއިރު ބުނެފައިވަނީ ސުކޫލުތައް ހެނދުނު 8:30 ނުވަތަ 9:00 ގައި ފެށުމަށެވެ. އަދި މެންދުރު ފަހު 3:00 ގެ ކުރީން ސުކޫލުތަކުގެ ކިޔަވައި ދިނުން ނިންމާލުމަށެވެ. އެގޮތުން ސެކަންޑަރީ އާއި ހައި ސެކަންޑަރީއަށް ކިޔަވާ ދަރިވަަރުން ސުުކޫލުގައި ހޭދަކުރަ ވަގުތު ތިން ގަޑިއިރަށް ހަމަޖެއްސުމަށާއި ޕްރައިމަރީ ގުރޭޑްތަކުގެ ދަރިވަރުންގެ ކިޔެވުން ދެ ގަޑިއިރާއި ތިރީސް މިނެޓަށްވުރެ ދިގު ނުކުރުމަށެވެ.
ޕްރީ ސުކޫލު ދަރިވަަރުންނަށް ދޮޅުގަޑިިއިރު ކިޔަވައިދިނުމަށެވެ. މީގެއިތުރުން މާއްދާއަކަށް 30 މިނެޓާއި 45 މިނެޓް ހޭދަކުރުމަށާއި ދެ ހަފްތާގެ ތެރޭގައި ހުރިހާ މާއްދާތަކެއް ނެގޭ ގޮތަށް ޓައިމްޓޭބަލް އެކުލަވާލުމަށްވެސް ވަނީ އަންގާފައެވެ. ޓީޗަރުންގެ މަސައްކަތުގެ ވަގުތުވެސް ހަތަރު ގަޑިއިރަށްވުރެ ދިގު ނުވާނެ ގޮތަށް ހަމަޖެއްސުމާއެކު ހަވީރު ހަތަރަކުން ރޭގަނޑު ނުވަޔަކަށް ސުކޫލުގެ ހަރަކާތްތައް ކުރިއަށް ނުގެންދިޔުމަށްވެސް ވަނީ އަންގާފައެވެ.
މި އުސޫލަށް ޝައްވާލު މަހުގެ ފުރަތަމަ ހަތް ދުވަހާއި ހަމައަށް އަމަލު ކުރުމަށް މިނިސްޓްރީން ވަނީ ސްކޫލްތަކަށް އަންގާފައެވެ.
