ހިޔާ ފްލެޓްތަކުގެ ކުލި ކުޑަކޮށްދިނުމަށް އެދި ސަރުކާރަށް ހުށަހަޅަނީ

ހިޔާ ފްލެޓްގެ ކުލި ކުޑަކުރުމަށް އެދި ސަރުކާރަށް ހުށަހެޅުމުގެ މަސައްކަތް ފަށައިފިއެވެ.

ހިޔާ ޔޫނިއަނުން ބުނީ, ހިޔާ ފުލެޓުތަކުގެ ކުލި ދެއްކޭނެ މިންވަރަކީ 5600 ރުފިޔާކަން ބަޔާންކޮށް ސަރުކާރަށް ހުށަހެޅުމަށް ސިޓީގައި ސޮއިކުރުން ކުރިއަށްދާ ކަމަށެވެ. މި މަސައްކަތް ފަށާފައިވަނީ ހޯމަ ދުވަހު ކަމަށާއި، އަންގާރަ ދުވަހުގެ ރޭ 10:00އާ ހަމައަށް މިހަރަކާތް ކުރިއަށްދާނެކަމަށެވެ. އަދި މިހާރު ވެސް ފްލެޓްތައް ލިބިފައިވާ ގިނަ މީހުން ކުލި ކުޑަކޮށްދިނުމަށް އެދި ހުށަހަޅާ މި ޕެޓިޝަންގައި ސޮއިކޮށްފައިވާކަމަށް ހިޔާ ޔޫނިއަނުން ބުނެއެވެ.

މީގެ ކުރިންވެސް ހިޔާ ޔޫނިއަން މެދުވެރިވެގެން ފްލެޓްތަކުގެ ކުލި ކުޑަކުރުމުގެ މަސައްކަތް ކޮށްފައިވެއެވެ. ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ އިތުރުން ރައީސް އޮފީހަށް ވެސް ސިޓީ ހުށަހަޅާފައިވެއެވެ. މި މައްސަލައާ ގުޅިގެން އެޗްޑީސީން ބުނެފައިވަނީ, ހިޔާ ފްލެޓްތަކުގެ ކުލި ކުޑަކުރުމަށް ސަރުކާރާއެކު މަޝްވަރާކޮށްފައިވާ ކަމަށާއި، ކުލި ކުޑަ ކުރެވޭނެ އެންމެ ދަށް މިންވަރަށް އެކަން ކޮށްފައިވާ ކަމަށެވެ.

ހިޔާ ފްލެޓްތަކުގެ ކުލި ކުޑަކުރުމަށް ޑިމާންޑް ކުރަމުންދާއިރު، ހިޔާ ފްލެޓްތަކުން ކުލި ނުނަގާގޮތަށް ދިން މުއްދަތު މިމާރޗް މަހުގެ ނިޔަލަށް ހަމަވާނެ އެވެ. ނަމަވެސް އަދިވެސް ބައެއް ފްލެޓްތަކުގެ ފިނިޝިންގެ މަސައްކަތް ނުނިމޭ މައްސަލަ ވަނީ ބޮޑުވެފައެވެ. މަސައްކަތް ކުރުމަށް ހަވާލުކުރި ބައެއް ކުންފުނިތަކުން ފައިސާ ނެގުމަށްފަހު މަސައްކަތް ނުކުރާ ކަމަށް ފްލެޓުތަކުގެ ވެރިން ބުނެއެވެ.

ހިޔާ ފްލެޓްތަކަށް ދިރިއުޅުން ބަދަލުކުރާ މީހުންގެ ހުރި ކަންބޮޑުވުންތަކާއި ދަތިތައް ހައްލުކުރުމުގެ ގޮތުން, ފްލެޓްތައް ނިންމުމަށްޓަކައި، ކުލި ނުނަގައި އިތުރު ތިން މަސްދުވަސް ފްލެޓްތަކުގެ ވެރިންނަށް ދޭން ސަރުކާރުން ނިންމާފައިވާކަން އިއުލާން ކުރައްވާފައިވަނީ 26 ޑިސެންބަރު 2021ގައި ބޭއްވި, އެއްބައިވަންތަކަމުގެ ދުވަހުގެ ޖަލްސާގައި ރައީސް އިބްރާހީމް މުހައްމަދު ސޯލިހެވެ. އަދި އެމަނިކުފާނު ވިދާޅުވީ 2022 ވަނަ އަހަރުގެ މާރޗު މަސް ނިމޭއިރު، ފްލެޓްތަކުގެ ފިނިޝިންގ މަސައްކަތް ނިންމައި އެތަނުގައި ފްލެޓް ލިބުނު ފަރާތްތަކަށް ދިރިއުޅެން ފެށޭވަރުވާނެކަމަށް އުންމީދުކުރައްވާކަމަށެވެ.

ހިޔާ މަޝްރޫއުގެ ފްލެޓްތަކުގެ މަސައްކަތް ހަވާލުކުރެވުނު ކޮންޓްރެކްޓަރާއެކު އެތަނުގެ ފިނިޝިންގ މަސައްކަތް ކުރުމަށް އެއްބަސްވެވިފައެއް ނުވެއެވެ. އެހެންކަމުން، މި ތަންތަން އާންމުންނާ ހަވާލު ކުރެވިފައިވަނީ ފިނިޝިންގ މަސައްކަތް ނުނިންމައެވެ. ވުމާއެކު ފްލެޓްތަކުގައި މުށިޖެހުމާއި، ކުލަލުމާއި، ބަދިގެ ކަބަޑުސެޓު ޖެހުމާއި، ފަންކާއާއި ބޮކިވެސް ހަރުކުރަންޖެހުނީ ފްލެޓްތަކުގެ ވެރިންގެ ޚަރަދުގައި އަމިއްލައަށެވެ. އެގްރިމެންޓްގައި ސޮއިކުރުމަށްފަހު ފުރަތަމަ ތިން މަސް ދިނީ ފިނިޝިންގ މަސައްކަތްތައް ކުރުމަށެވެ. މި މުއްދަތުގައި އެއްވެސް ކުއްޔެއް ނުނަގާގޮތަށް ސަރުކާރުންވަނީ ލުއި ދީފައެވެ.

ހިޔާ ފްލެޓްތަކުގެ ކުއްޔަކީ މަހަކު 7,500 ރުފިޔާކަމަށް ވަނީ ނިންމާފައެވެ. އަދި ފްލެޓްގެ މެއިންޓަނަންސް ފީގެ ގޮތުގައި ކޮންމެ މަހަކު 1,000 ރުފިޔާ ނަގާނެއެވެ. ފްލެޓްތަކަށް ފައިސާ ދައްކާ ޚަލާސް ކުރަން ޖެހެނީ 25 އަހަރުގެ މުއްދަތަށް ބަހާލައިގެންނެވެ.