2 ދުވަހަށް ކުރިއަށްދިޔަ ސައޫދީ ކޮސްޓިއުމް އިވެންޓްގައި އެތައް ސަތޭކަ ބަޔަކު ބައިވެރިވެ ތަފާތު ކޮސްޓިއުމްތައް ދައްކާލައިފިއެވެ.

އެމީހަކަށް އެންމެ ކަމުދާ ކެރެކްޓަރެއްގެ ހެދުން އަޅައިގެން ރިޔާޟުގެ މަގުތަކުގައި އޮތް މި ޕެރޭޑް ކުރިއަށްގެންދިޔައީ ދެ ދުވަހަށެވެ. މިއީ މިހާ ބޮޑަށް ހުޅުވާލައިގެން މި ޕެރޭޑް ކުރިއަށްގެންދިޔަ ފުރަތަމަ ފަހަރެވެ.

"ވަރަށް އުފާވި އަހަންނަށް އެންމެންގެ ސަމާލުކަން ލިބުމުން. މިއީ ބޮޑު ކާމިޔާމީއެއް ކަމަށް ދެކެނީ. އަހަންނަށް ވީ އެންމެ ރަނަގަޅަކަށް ތައްޔާރުވެގެން ޕެރޭޑްގައި ބައިވެރިވީ." ޕެރޭޑްގައި އެންމެ މަގްބޫލް ކޮސްޓިއުމްގެ މަގާމު ހޯދި ސައުދު އަލް-ހަޒާނީ ބުންޏެވެ.

މޮބައިލް ގޭމް ޕަބްޖީގެ ކެރެކްޓަރތަކާ ވައްތަރުކޮށް ހެދުން އަޅައިގެން ޕެރޭޑްގައި ބައިވެރިވި އަބްދުލްގާދިރު އަބްދުﷲ ބުނީ, "ހަގީގަތުގައި އުންމީދެއް ނުކުރަން މިހާ ބޮޑު ތަރުހީބެއް ލިބޭނެ ކަމަކަށް. މިއީ ވަރަށް ޕްރޮފެޝަނަލް ކަމެއް އަސްލު."

މިއީ ސައޫދީގެ ޖެނެރަލް އެންޓަރޓެއިންމެންޓް އޮތޯރިޓީން އިންތިޒާމްކޮށްގެން ކުރިއަށްގެންދާ ރިޔާޟް ސީޒަން ފެސްޓިވަލްގެ ހަރަކާތެކެވެ. މިއީ، ފަންނުވެރިކަމާއި ސަގާފަތާއި، ކުޅިވަރަށް ހިތްވަރުދިނުމުގެ މަގުސަދުގައި ކުރިއަށްގެންދާ ހަރަކާތެކެވެ. އެ އޮތޯރިޓީން ބުނީ، މި އަހަރުގެ ޕެރޭޑް ވަރަށް ކާމިޔާބު ކަމުގައެވެ. އަދި މިކަމަށް ލިބުނު ތަރުހީބު އެހެން އަހަރުތަކަށްވުރެ ބޮޑު ކަމަށެވެ.

ރިޔާޟް ސީޒަން ފުރަތަމަ ބާއްވާފައިވަނީ 2019 ވަނަ އަހަރުއެވެ. މި ފެސްޓިވަލްގެ މަގުސަދަކީ ސައޫދީގެ ފަތުރުވެރިކަމަށް މާރކެޓް ހޯދުމެވެ. ފަސް މަހަށް ދެމިގެންދާ މި ފެސްޓިވަލްގައި 100ށްވުރެ ގިނަ ހަރަކާތް ކުރިއަށްގެންދެއެވެ.