ރައީސް ނަޝީދާއި މާވަށު ދާއިރާގެ މެމްބަރުގެ ބަހުގެ ހަމަލާތަކަށްފަހު މެމްބަރުގެ ނަން އިއްވައިފި
ސައީދު ވިދާޅުވީ، ރައީސް ނަޝީދު ކަނޑައެޅިގެން އިތުރުފުޅު ހެއްދެވީ ކަމަށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، މާވަށު ދާއިރާގެ މެމްބަރު މުހައްމަދު ސައީދު
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މާވަށު ދާއިރާގެ މެމްބަރުގެ މުހައްމަދު ސައީދުގެ ބަހުގެ ހަމަލާތަކަށްފަހު، މެމްބަރުގެ ނަން އިއްވައިފިއެވެ.
ބަހުގެ ހަމަލާތައް ފެށިގެން އައީ އިހަވަންދިއްޕޮޅުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސް ކޮށްދިނުމަށް އެދި ހުށަހަޅުއްވާފައިވާ ޤަރާރު، އިޤްތިޞާދީ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ވާހަކަދައްކަވަމުންނެވެ. މި ރިޕޯޓަށް ވާހަކަދައްކަވަމުން މާވަށު ދާއިރާގެ މެމްބަރު ވިދާޅުވީ، އެ ރިޕޯޓުގައި އޮތް ކަންބޮޑުވާ ކަމަކީ ސެކިއުރިޓީ ދިނުމަށް ބުނެފައިވާ ނުކުތާ ކަމަށެވެ. މިއީ ނުރައްކާތެރި ކަމެއް ކަމަށް ސިފަކުރައްވައި ވިދާޅުވީ، އުތުރުގައި ހަތިޔާރު ގުދަންކުރުން އެއީ އެ ގަރާރުގައި ސިއްރު ކުރެވިފައިވާ މަންޒަރެއް ކަމަށެވެ.
މެމްބަރުގެ ވާހަކަ ހުއްޓުވައި، ރައީސް ނަޝީދު ވިދާޅުވީ، ހަތިޔާރު ގުދަން ކުރުމާއި، ހަތިޔާރުން ޔޮޓް ފަހަރަށް ހިމާޔަތް ދިނުމުގެ އެއްބަސްވުމުގައި ސޮއިކޮށްފައިވަނީ ރައީސް ޔާމީންގެ ސަރުކާރުން ކަމަށެވެ. އެ ސޮއިކުރެއްވި އިރު ޑިފެންސް މިނިސްޓަރަކަށް ހުންނެވީ މިހާރުގެ މަޑުއްވަރީ ދާއިރާގެ މެމްބަރު ކަމަށެވެ. މެމްބަރު ސައީދު ވިދާޅުވީ، ރައީސް ނަޝީދު ކަނޑައެޅިގެން އިތުރުފުޅު ހެއްދެވީ ކަމަށެވެ. މިއާއެކު ރައީސް ނަޝީދު ވިދާޅުވީ، މެމްބަރަށް އެހެން ވިދާޅު ނުވެވޭނެ ކަމަށާއި، މިހާހިސާބުން އެމަނިކުފާނަށް ޖެހިވަޑައިގަންނަވާނީ އެ އެއްބަސްވުން މަޖިލީހަށް ގެންނަވަން ކަމުގައެވެ. އަދި ރައްޔިތުންގެ މަޖިލީހުގެ ތަޅުމުގައި މެމްބަރުން ވާހަކަފުޅު ދައްކަވާއިރު، ކަންކަމުގެ ހަގީގަތް އޮޅުވާލުމުން އެކަން ހާމަ ކޮށްދެއްވުމަކީ އެމަނިކުފާނުގެ މަސްއޫލިއްޔަތެއް ކަމަށް ރައީސް ނަޝީދު ވިދާޅުވިއެވެ.
މިއާއެކު ނިޒާމީ ނުކުތާ ނަންގަވައި މެމްބަރުންވަނީ، އެ އެގްރީމެންޓަކީ ކުރީގެ ރައީސް ޔާމީންގެ ސަރުކާރުން ހަދާފައިވާ އެއްބަސްވުމެއް ކަމަށާއި، މާވަށު ދާއިރާގެ މެމްބަރު ސައީދު މަސައްކަތް ކުރައްވަނީ ކަންކަން އޮޅުވާލަން ކަމަށް ވިދާޅުވެ ވާހަކަދައްކަވާފައެވެ. މިއާއެކު ސައީދުވަނީ، ތަކުރާރުކޮށް އެކަން ދޮގު ކުރައްވަން ފައްޓަވާފައެވެ.
ދެބޭފުޅުންގެ ބަހުގެ ހަމަލާތަކަށްފަހު ރައީސް ނަޝީދު ވަނީ، އެމަނިކުފާނު އިތުރުފުޅު ހެއްދެވީ ކަމަށް މަޖިލީހުގެ ތަޅުމުގައި މާވަށު ދާއިރާގެ މެމްބަރު ސައީދު ވިދާޅުވި ބަސްފުޅު އަނބުރާ ގެންދެވީތޯ ސުވާލު ކުރައްވާފައެވެ. ސައީދު ވިދާޅުވީ އެ ބަސްފުޅު އަނބުރާ ނުގެންދަވާ ކަމަށާއި ރައީސް ނަޝީދަކީ މަޖިލީހާއި އެހެނިހެން ޕްލެޓްފޯމްތަކުގައި އަބަދުވެސް އިތުރުފުޅު ހައްދަވަ ބޭފުޅެއް ކަމަށް ވިދާޅުވެފައެވެ. އެއާއެކު ރިޔާސަތުންވަނީ ރައްޔިތުންގެ މަޖިލީހުގެ ގަވާއިދަށް އިހުތިރާމްކޮށް ހިއްތެވުމަށް ނަސޭހަތްތެރިވެ މާވަށު ދާއިރާގެ މެމްބަރުގެ ނަން އިއްވާފައެވެ.
ހއ. އުލިގަމުގައި ހަތިޔާރު ގުދަނެއް ހަދައި، މެރިޓައިމް ސެކިއުރިޓީގެ ހިދުމަތް ދިނުމަށް މޯލްޓާގެ ސޭފްޓީ އެޓް ސީ ލޮޖިސްޓިކްސް ޕްރައިވެޓް ލިމިޓެޑް (އެސްއޭއެސްއެލް) އާއި ހަވާލުކޮށްފައިވާކަމުގެ ވާހަކަ ފެންމަތިވެގެން ދިޔައީ 2015 ވަނަ އަހަރުގެ އޮކްޓޯބަރު މަހުގެ ތެރޭގައެވެ. އޭރު އާންމުވި ލިޔުންތަކުން އެނގޭ ގޮތުގައި އާމަރީ ހަދައި، އެތަން ސުޕަވައިޒްކުރާނީ ދިވެހި ސިފައިންނެވެ. އެސްއޭއެސްއެލްގެ ހަތިޔާރު އެޅި ބޯޓުތައް ވެސް މި މަސައްކަތުގައި ބޭނުންކުރާނެ ކަމަށް ލިޔުންތަކުގައިވެއެވެ. ރައްޔިތުންގެ މަޖިލީހުގައި އަންގާރަ ދުވަހު ވާހަކަ ދައްކަވަމުން ބައެއް މެމްބަރުންވަނީ އެ އެއްބަސްވުން ފެނިވަޑައިގެންފައިވާ ކަމަށްވެސް ވިދާޅުވެފައެވެ.
