"އެންމެ ބޮޑު ގޮންޖެހުމަކީ ތަހުގީގު ކުރުމުގެ ގާބިލްކަން ހުރި ފުލުހުން މަދުވުން"
ކޮލެޖުން އެންމެ އިސްކަންދޭނީ ތަހުގީގު ދާއިރައިން ފުލުހުންނަކީ ގާބިލް ބަޔަކަށް ހެދުން
އިމްރާން އަބްދުﷲ - ހޯމް މިނިސްޓަރު
އެންމެ ބޮޑު ގޮންޖެހުމަކީ ތަހުގީގު ކުރުމުގެ ގާބިލްކަން ހުރި ފުލުހުން މަދުވުން ކަމުގައި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ފުލުހުންގެ ގާބިލްކަން އިތުރު ކުރުމަށް ކުރަމުން އަންނަ މަސައްކަތް އޮޅުން ފިލުއްވުމަށް ވިލިފުށި ދާއިރާގެ މެމްބަރު ހުސެއިން އަފީފު ކުރެއްވި ސުވާލަށް ޖަވަބު ދެއްވަމުން ހޯމް މިނިސްޓަރު ވިދާޅުވީ، ތަހުގީގުކުރުމަށްޓަކައި ކަނޑައެޅިފައިވާ ފުލުހުންގެ ތެރޭގައި އެކަށީގެންވާ ފުރިހަމަ ތަމްރީނު ލިބިފައި ތިބީ މަދު ފުލުހަކަށް ކަމަށެވެ.
އެކަން ގަބޫލުކުރައްވާ ކަމަށާއި، ތަހުގީގު ކުރާ ފުލުހުންނަށް އިތުރު ތަމްރީނާއި ތަޖުރިބާ ދިނުމުގެ މަސައްކަތް ކުރަމުން އަންނަ ކަމުގައި ވިދާޅުވިއެވެ. އަދި އިތުރު ވަސީލަތްތައް ހޯދުމުގެ މަސައްކަތްވެސް ކުރަމުން އަންނަ ކަމަށް މިނިސްޓަރު ވިދާޅުވިއެވެ. އެގޮތުން މިހާރުވެސް އިނގިރެސިވިލާތުގެ ފުލުހުންގެ ތަޖުރިބާކާރެއް މަސައްކަތްކުރަމުން އަންނަ ކަމަށާއި، ކުރިއަށް އޮތް ދެ އަހަރުގެ ތެރޭގައި ތަހުގީގު ދާއިރާގައި މަސައްކަތްކުރާ ކޮންމެ ފުލުހަކީ އެދާއިރާއިން ޑިޕްލޮމާ ހާސިލްކޮށްފައިވާ ފުލުހަކަށް ހެދުމަކީ އަމާޒެއް ކަމުގައި ވިދާޅުވިއެވެ.
އުންމީދަކީ މިމަހުގެ ތެރޭގައި ފުލުހުންގެ ނެޝެނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމެންޓް ފެށިގެން ދިޔުން ކަމުގައިވެސް ހޯމް މިނިސްޓަރު އިމްރާން ވިދާޅުވިއެވެ. އަދި އެ ކޮލެޖުން އެންމެ އިސްކަންދޭނީ ތަހުގީގު ދާއިރައިން ފުލުހުންނަކީ ގާބިލު ބަޔަކަށް ހެދުމަށް ކަމަށާއި އެއާއެކު މިހާރު ތަހުގީގު ކުރުމުގައި ދިމާވާ މައްސަަލަތަކަށް ހައްލު އަންނާނެ ކަމަށް މިނިސްޓަރު އިމްރާން ވިދާޅުވިއެވެ.
