އެންމެ މޮޅު އެތުލީޓުގެ ޝަރަފު ސާއިދު އާއި ނަބާއަށް
18 މާރިޗު 2022 | ހުކުރު 02:09ކޮންމެ އެސޯސިއޭޝަނަކުން އެންމެ މޮޅު ތިން ކުޅުންތެރިންވެސް މި ހަފްލާގައި ހޮވާފައިވޭ
އެންމެ މޮޅު އެތުލީޓުންގެ ވަނަތައް ހާސިލްކުރި ކުޅުންތެރިން
ރާއްޖެއަށް މުޅިން އަލަށް ތައާރަފްކުރި މޯލްޑިވްސް ސްޕޯޓްސް އެވޯޑްސް 2022 ގައި ހޮވި އެންމެ މޮޅު އެތުލީޓުގެ މަގާމު ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު އާއި، ބެޑްމިންޓަން ކުޅުންތެރިޔާ ފާތިމަތު ނަބާހާ ކާމިޔާބުކޮށްފިއެވެ.
ރާއްޖޭގެ ހުރިހާ ކުޅިވަރެއްގައި ހިމެނޭ އެތުލީޓުންގެ ތެރެއިން ސްޕޯޓްސްމަން އޮފް ދަ އިޔަރގެ އެވޯޑު ކާމިޔާބުކުރީ ސާއިދުއެވެ. އަދި ސްޕޯޓްސް ވުމަންގެ އެވޯޑު ހާސިލްކުރީ ނަބާހާއެވެ. ދެވަނައަށް އެންމެ މޮޅު ފިރިހެން އެތުލީޓަކަށް ބެޑްމިންޓަން ކުޅުންތެރިޔާ ހުސައިން ޒަޔާން ޝަހީދް ޒަކީ ހޮވުނުއިރު، ތިންވަނަ ހާސިލްކުރީ ވޮލީބޯޅައިގެ އެންމެ މޮޅު އެތުލީޓަކަށް ހޮވުނު އާދަމް ނަސީމްއެވެ. ރާއްޖޭގެ ދެވަނައަށް އެންމެ މޮޅު އަންހެން އެތުލީޓަކަށް ހޮވުނީ އެއްވަނަ ހާސިލްކުރި ނަބާގެ އެއްބަނޑުއެއްބަފާ ބެޑްމިންޓަން ތަރި އާމިނަތު ނަބީހާއެވެ. އަންހެން ޑިވިޝަންގެ ތިންވަނަ ކާމިޔާބުކުރީ ޓޭބަލް ޓެނިސްގައި ވިދާލާފައިވާ ޒުވާން ފާތިމަތު ދީމާ އަލީއެވެ.
ކޮންމެ އެސޯސިއޭޝަނަކުން އެންމެ މޮޅު ތިން ކުޅުންތެރިންވެސް މި ހަފްލާގައި ހޮވާފައިވެއެވެ. މި އެވޯޑަށް ކުޅުންތެރިންގެ ނަން ނޮމިނޭޓުކުރީ އެކުޅުންތެރިއަކު ނިސްބަތްވާ ކުޅިވަރު އެސޯސިއޭޝަނަކުންނެވެ.
