ޖަޕާނަށް ބާރުގަދަ ބިންހެލުމެއް އައުމުގެ ސަބަބުން މަދުވެގެން 2 މީހުން މަރުވެ 160 މީހުންނަށް އެކި އަނިޔާތައް ލިބިއްޖެއެވެ. ނަމަވެސް ބިންހެލުމުގެ ސަބަބުން އިމާރާތްތަކަށް މާބޮޑުގެއްލުމެއް ނުލިބޭކަމަށް ޚަބަރުތައް ބުނެއެވެ.

ބުދަ ދުވަހުގެ ރޭ ދަންވަރު ބިންހެލުން އައުމާއެކު ދެ މިލިއަނެއްހާ ގެއިން ކަރަންޓް ކެނޑިފައިވެއެވެ. އަދި ބުލެޓް ރޭލެއް ދަގަނޑުން ނައްޓާލިއެވެ. އެހެން ނަމަވެސް އެއްވެސް ފަސިންޖަރަކަށް ކަމެއް ނުވާކަމަށް ޚަބަރުލިބެއެވެ. ގިނަ ފަސިންޖަރުންނަށް ސަލާމަތް ވެވިފައިވީ ނަމަވެސް މުވައްޒަފުންނާއި އެހެނިހެން ބައެއް މީހުން ރޭލުގައި ބަންދުވެފައި 4 ގަޑިއެއްހާއިރު ތިބެން ޖެހުނު ކަމަށް ވެއެވެ.

7.4 މެގްނިޓިއުޑްގެ ބާރު މިނުގައި އައި ބިހެލުމާ ގުޅިގެން ސުނާމީގެ އިންޒާރުވެސް ނެރެފައިވެއެވެ. ނަމަވެސް ފަހުން އިންޒާރުވަނީ އުވާލާފައެވެ. ޖަޕާންގެ މީޓިއޮރޮލޮޖިކަލް އޭޖެންސީން ބުނީ, ސުނާމީގައި ފުކުޝީމާއާއި އިތުރު ދެސަރަހައްދަކަށް ތިންފޫޓުގެ ރާޅު އެރުން އެކަށީގެންވާކަމަށެވެ. ނަމަވެސް އެހާބޮޑެތި ރާޅު އަރާފައި ނުވާކަމަށް ވެއެވެ. އަދި ފަހުން ސުނާމީގެ އިންޒާރުވަނީ އުވާލާފައެވެ.

ޖަޕާނަށް މިފަހަރު ބިންހެލުން މިއައީ 2011 ވަނައަހަރު ބާރުގަދަ ބިންހެލުމެއް އައި ފުކުޝީމާ ސަރަހައްދާއި, ވެރިރަށް ޓޯކިޔޯ ހިމެނޭހެން ސާދަ ޕްރިފެކްޗަރަކަށެވެ. އެފަހަރުގެ ބިންހެލުމުގައި ފުކުޝީމާގެ ނިއުކްލިއަރ އިންޖީނުގެއަކަށް ގެއްލުން ލިބި, ބޮޑު ކާރިސާއެއް ހިނގާފައި ވީނަމަވެސް, މިފަހަރު އެފަދަ ގެއްލުމެއް ނުލިބޭކަމަށް ޚަބަރުލިބެއެވެ. 2011 ވަނަ އަހަރު އައި ބިންހެލުމުގެ ސަބަބުންނާއި ނިއުކްލިއަރ ގެއްލުން ތަކުގެ ސަބަބުން 18 ހާސް މީހުން މަރުވެފައިވެއެވެ.

މިފަހަރުގެ ބިންހެލުން އައި ވަގުތު, ބައެއް ހިސާބުތަކުގައި މީހުންނަށް ކޮޅަށް ތިބެންވެސް ދަތިވިކަމަށް ޚަބަރުލިބެއެވެ. އަދި ޓޯކިއޯގެ ބައެއް އިމާރާތްތައްވެސް ވަރަށް ބޮޑަށް ގުޑާފައިވެއެވެ. ނަމަވެސް ތަނެއް ވެއްޓި ބޮޑުގެއްލުމެއް ނުލިބޭކަމަށްވެއެވެ.