ރައީސަކު އިންތިޚާބުކުރާ ގޮތަށް ބަދަލު ގެނައުމަކީ އިޖުތިމާއީ، އިގްތިޞާދީ އަދި ސިޔާސީ އަދާލަތަށް ބޭނުންތެރިކަމެއް: ރައީސް ނަޝީދު
ރިޔާސީ އިންތިޚާބު ބާއްވާފައިވާއިރު އާންމު ހަމައެއްގެ ގޮތުގައި ފެނިފައިވަނީ ދެވަނައަށް އެންމެ ގިނަ ވޯޓު ހޯދާ ޕާޓީ ރިޔާސީ އިންތިޚާބު ކާމިޔާބުކުރާތަން
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު
ރައީސުލްޖުމްހޫރިއްޔާ އިންތިޚާބުކުރާ ގޮތަށް ބަދަލު ގެނައުމަކީ ރާއްޖޭގެ އިޖުތިމާއީ އިގްތިޞާދީ އަދި ސިޔާސީ އަދާލަތައް ކޮންމެހެން ބޭނުންތެރިކަމެއްކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ވެރިކަމުގެ ނިޒާމަށް ބަދަލުތަކެއް ގެންނަންޖެހޭކަމަށް އެމަނިކުފާނާ ވާހަކަދައްކަވަމުން ގެންދަވާތާ ދުވަސްތަކެއް ވެފައިވާއިރު މުޅި ރާއްޖޭގެ ފަރާތުން ވަކާލާތު ކުރުން ނަމުގައި ޓްވިޓަރ ގައި ވަނީ ލިޔުމެއް އާންމުކުރައްވާފައެވެ. އެލިޔުން ފައްޓަވަމުން ރައީސް ނަޝީދު ވިދާޅުވީ އަމަލުކުރަމުން މިގެންދާ ގާނޫނު އަސާސީ ވަނީ ދިވެހި ވެރިކަމުގެ ސިފައަށް ކިތަންމެ ބަދަލެއް ގެނެސްފައިކަމަށެވެ. ގާނޫނު އަސާސީއަށް އަމަލުކުރާތާ 13 އަހަރު ވެފައިވާއިރު ގާނޫނު އަސާސީގައި ހުރި ބައެއް ކަންކަމާއި ގުޅޭގޮތުން ވިސްނަންޖެހޭކަމީ މިގައުމުގެ ކަންކަމާއި ވިސްނާ އެކަކުވެސް ދެބަސްވާނެ ހަގީގަތެއް ނޫންކަމަށް ރައީސް ނަޝީދު ވިދާޅުވިއެވެ.
ލިޔުމުގައި ވަނީ ރައީސަކު އިންތިޚާބުކުރުމުގައި އެންމެ ގިނަ ވޯޓު ހޯދޭ ކެންޑިޑޭޓަކީ މޮޅުވާ ކެންޑިޑޭޓުގެ ގޮތުގައި ކަނޑައެޅުން ބޭނުންތެރިކަމަށް ވިދާޅުވެފައެވެ. އެގޮތަށް އެމަނިކުފާނު ވިދާޅުވާ ސަބަބުތައް ވަނީ ބަޔާންކުރައްވާފައެވެ. އެގޮތުން ގަނޫނު އަސާސީގެ ދަށުން 3 ފަހަރަށް ރިޔާސީ އިންތިޚާބު ބާއްވާފައިވާއިރު އާންމު ހަމައެއްގެ ގޮތުގައި ފެނިފައިވަނީ ދެވަނައަށް އެންމެ ގިނަ ވޯޓު ހޯދާ ޕާޓީ ރިޔާސީ އިންތިޚާބު ކާމިޔާބުކުރާތަން ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ 2008 ވަނަ އަހަރު އެންމެ ގިނަ ވޯޓު ލިބިވަޑައިގަތީ ރައީސް މައުމޫނަށްކަމަށެވެ. އެހެންނަމަވެސް ދެ ވަނަ ބުރުގައި އެހެން ހުރިހާ ޕާޓީއަކާއި ކެންޑިޑޭޓުން ރައީސް މައުމޫނާ ދެކޮޅަށް ނިކުމެ ރައީސް މައުމޫން ބަލިކުރެެއްވީ ކަމަށެވެ. ފުރަތަމަ ބުރުން އެމަނިކުފާނަށް ލިބިވަޑައިގެންނެވީ 25 އިންސައްތަ ކަމަށާއި ފުރަތަމަ ބުރާއި ދެވަނަ ބުރާ ދެމެދުގައި ކުއްލި ގޮތަކަށް އެތައް ރައްޔިތުންނެއް އެމަނިކުފާނާ ރުހި އެމަނިކުފާނަށް އަގްލަބިއްޔަތު ވޯޓު ދިނީކަމަށް ދެކޭކަމަށްވާނަމަ އެއީ ދޮގެއްގެ މައްޗަށް ދެކެވޭ ދެކެވުމެއްކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރިޔާސީ އިންތިޚާބު ނޫނަސް މަޖިލިސް އިންތިޚާބުތަކުގައިވެސް އަދި ކައުންސިލް އިންތިޚާބުތަކުގައިވެސް އެއްވެސް ޕާޓީއަކަށް އަގްލަބިއްޔަތު ވޯޓު ހޯދިފައިނުވާކަމަށެވެ. އަގްލަބިއްޔަތު ވޯޓު ހޯދުމަކީ އެއްވެސް މިނިވަން މުޖުތަމައުއެއްގައި ފަސޭހަކަމެއްވެސް ނޫންކަމަށާއި ވަރަށް މަދުން ނޫނީ ނުވާކަމެއްކަމަށެވެ.
ރާއްޖޭގެ ސިޔާސީ ތޮބިއްޔަތަށް ބަލާއިރު ބޮޑު ދެޕާޓީ ކަމަށްވާ އެމްޑީޕީ އާއި ޕީޕީއެމް އަށްވެސް ތާއީދު އޮންނަނީ ދާދި އެއް މިންވަރެއްގައި ކަމަށް ރައީސް ނަޝީދު ވިދާޅުވިއެވެ. އެއީ 35 އިންސައްތަ އާއި 45 އިންސައްތަ އާ ދެމެދުކަމަށް ރައީސް ނަޝީދު ވިދަޅުވިއެވެ. މި ދެޕާޓީވެސް އިންތިޚާބު ކާމިޔާބުކުރުމަށް އެހެން ކުދި ޕަޓީތަކާ ގުޅެންޖެހޭކަމަށާއި މިގުޅުމަކީ ވަރަށް އަގު ބޮޑު ގުޅުމެއްކަމަށް ރައީސް ނަޝީދު ވިދާޅުވިއެވެ.
2018 ވަނަ އަހަރުގެ ރިޔާސީ އިންތިޚާބުގައި މި 5 އިންސައްތަ ވޯޓު ހޯދުމަށްޓަކައި އެމްޑީޕީން ވަނީ އެމީހުންގެ ސަރުކާރުގެ ކެބިނެޓްގެ 60 އިންސައްތަ ދޫކޮށްލާފައިކަމަށް ރައީސް ނަޝީދު ވިދާޅުވިއެވެ. 5 އިންސައްތަ ރައްޔިތުން އެދޭގޮތަށް ކަންކަން ގެންދިޔުމަށް 45 އިންސައްތަ ރައްޔިތުންގެ އުންމީދުތައް ފެންކޮށްލެވެނީކަމަށް ރައީސް ނަޝީދު ވިދާޅުވިއެވެ. އެފަދަ ބޭއިންސާފުގައި ވެރިކަމުގެ ކަންކަން ގެންދަނީނަމަ އެތައް ގޮންޖެހުމަކާ ކުރިމަތިލާންޖެހޭކަމަށް ރައީސް ނަޝީދު ވިދާޅުވިއެވެ. ގިނަ ބަޔަކީ ބާކީވާ މީހުންކަމުގައި އެމީހުން ދެކޭނަމަ ނުކުންނާނެ ހިތި ނަތީޖާ ގައުމުތަކުގެ ހަޔާތުން ވަނީ ސާފުވެފައިކަމަށް ރައީސް ނަޝީދު ވިދާޅުވިއެވެ.
