އެއާޕޯޓުގެ ފުލް ސްކޭލް އިމަރޖެންސީ އެކްސަސައިޒް މާދަމާ ހަވީރު
15 މާރިޗު 2022 | އަންގާރަ 08:42އެކްސަސައިޒް ކުރިއަށްދާނީ ހަވީރު 4:00ން އިރުއޮއްސި 6:00ށް
ވެލާނާ އިންޓަނޭޝަނަލް އެއަޕޯޓުގައި ޖައްސާފައިވާ އެއަރ އޭޝިއާގެ ފްލައިޓެއް
ރާއްޖޭގައި އޭވިއޭޝަން ދާއިރާއިން މިހާތަނަށް ބާއްވާ އެންމެ ބޮޑު އެއާޕޯޓު ފުލް ސްކޭލް އިމަރޖެންސީ އެކްސަސައިޒް ބުދަ ދުވަހު ކުރިއަށްދާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ން ބުނެފިއެވެ.
މިއީ 400 އެއްހާ ޕަސިންޖަރު ތިބި ފްލައިޓެއް ވެއްޓުމުން ކަންތައްތައް ކުރާނެ ގޮތުގެ އެކްސަސައިޒެކެވެ. މި އެކްސަސައިޒްގައި އެއާޕޯޓުގައި މަސައްކަތް ކުރާ ހުރިހާ މުއައްސަސާއަކުން ބައިވެރިވާނެއެވެ. ބުދަ ދުވަހުގެ ހަވީރު 4:00ން އިރުއޮއްސި 6:00ށް އެކްސަސައިޒް ކުރިއަށްދާނެއެވެ.
މި އެކްސަސައިޒާއި ގުޅޭގޮތުން އެމްއޭސީއެލްގެ ޓަރމިނަލް އޮޕަރޭޝަން ޖެނެރަލް މެނޭޖަރު އިބްރާހިމް ހުސައިން ވިދާޅުވީ މިއީ ކޮންމެ ދެ އަހަރުން އެއް އަހަރު އެއާޕޯޓުގައި ބާއްވާ އެކްސަސައިޒެއް ކަމަށެވެ. ނަމަވެސް ކޮވިޑް-19އާ ގުޅިގެން މެދުކެނޑުމެއް އައިސްފައިވާ ކަމަށް އޭނާ ވިދާޅުވިއެވެ. މިއީ ވަރަށް ބޮޑުކޮށް ކުރިއަށްގެންދާ އެކްސަސައިޒެއްކަން ފާހަގަކުރައްވައި އިބްރާހިމް ވިދާޅުވީ މާލެ ސިޓީގެ ހުރިހާ ހޮސްޕިޓަލްތަކެއް ވެސް އެލާޓަށް އަންނާނެ ކަމަށެވެ. އިބްރާހިމް ވިދާޅުވީ އެއާޕޯޓުގައި ހާދިސާއެއް ހިނގުމާއި ގުޅިގެން އަމަލުކުރާ އުސޫލަށް ހަރަކާތްތެރިވަމުންދާނެ ކަމަށާއި، އެވަގުތު ރަންވޭ ހުއްޓިގެންދާނެ ކަމަށެވެ. ނަމަވެސް ސީ ޕްލޭން އޮޕަރޭޝަންތައް ކުރިއަށްދާނެ ކަމަށް އޭނާ ވިދާޅުވިއެވެ.
މި އެކްސަސައިޒަކީ އެއާޕޯޓްގެ ހުރިހާ ދާއިރާއެއްގައި މަސައްކަތްކުރާ ފަރާތްތަކަށް ސަލާމަތީ ކަންކަމާއި ގުޅިގެން ތައްޔާރުވުމަށް ކުރިއަށްގެންދާ ޚާއްސަ އެކްސަސައިޒަކަށްވާއިރު، 29 އެޖެންސީއަކުން 400 ވޮލުންޓިއަރުން ބައިވެރިވާނެއެވެ.
