މިމަހުގެ 16 ވަނަ ދުވަހު އިންތިގެ ކެމްޕެއިން ޓީމުން ހުވަދު އަތޮޅަށް
އިންތި އިންތިހާބުވެގެން ކުރައްވާނެ ކަންކަން މި ހަފްތާ ތެރޭގައި ހާމަކުރައްވާނެ
އުނގޫފާރު ދާއިރާގެ މެންބަރު މުހައްމަދު ވަހީދު
އެމްޑީޕީގެ ޗެއަރޕާސަންގެ އިންތިހާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ (އިންތި)ގެ ކެމްޕެއިންނަށް މި ހަފްތާގެ ބަންދުގައި ހުވަދުއަތޮޅަށް ދާނެ ކަމަށް އިންތިގެ ކެމްޕެއިން ޓީމުން ބުނެފިއެވެ.
އިންތިގެ ކެމްޕެއިން ޓީމުގެ ފަރާތުން ނޫސްވެރިންނާއި ބައްދަލުކުރައްވާ ވާހަކަދައްކަވަމުން އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑޭ) ވިދާޅުވީ ނިމުނު ހަފްތާ ބަންދުގައި އިންތިއާއެކު ކެމްޕެއިން ޓީމުން ތިލަދުންމަތީގެ ވަރަށް ގިނަ ރަށްރަށަށް ދަތުރުކޮށްފައިވާ ކަމަށެވެ. އަދި މި ދަތުރުގައި ކެންޑީޑޭޓާއެކުގައި ޕާޓީގެ މެންބަރުން އުފާވެރި ވަގުތެއް ހޭދަކުރެވުނު ކަމަށާއި، އިންތިއަށް އޮތް ތާއިދާއި ލޯބި ފެނިގެން ދިޔަ ކަމަށެވެ. އަދި ނިންމާލެވުނީ ވަރަށް ކާމިޔާބު ކެމްޕެއިން ދަތުރެއް ކަމަށް ވައްޑޭ ވިދާޅުވިއެވެ.
ވައްޑޭ ވިދާޅުވީ މި ހަފްތާ ބަންދުގައި ހުވަދުއަތޮޅަށް ދިއުމަށް ނިންމާފައިވާ ކަމަށެވެ. މި ހަފްތާގައި ބުދަ ދުވަހު ދަތުރު ފަށާފައި އާދީއްތަ ދުވަހާއި ހަމައަށް ރަށްރަށަށް ދަތުރުތައް ކުރާނެ ކަމަށާއި، ރަށްރަށަށް ގޮސް ދޮރުން ދޮރަށް ދާނެ ކަމަށާއި، އިންތިހާބު ކާމިޔާބު ކުރެވޭނެ ކަމުގެ އުއްމީދު އެބައޮތް ކަމަށް ވައްޑޭ ވިދާޅުވިއެވެ.
ވައްޑޭ ވިދާޅުވީ އިންތިހާބު ކާމިޔާބު ކޮށްގެން އިންތި ކުރައްވާނެ ކަންކަން ހާމަކުރައްވާނެ ކަމަށެވެ. އެގޮތުން ހުށަހަޅުއްވަނީ އެމްޑީޕީގެ ސިޔާސަތާއި އެއްގޮތަށް ލާމަރުކަޒީ އޮނިގަނޑާއި އެއްގޮތަށް ޕާޓީގެ އޮނިގަނޑު ބަދަލުކުރުމާއި، ހަމަ އެގޮތަށް ޕާޓީގެ ހަރަކާތްތައް ހިންގުމަށްޓަކައި ރަށްރަށަށް ބޭނުންވާ ޖަގަހަ ހެދުމަށް ބޭނުންވާ ޖާގަ ނުވަތަ ބިން ކަނޑައެޅުމުގެ ގާނޫނީ ޖަގަ ހޯދުމަށް ހުށަހަޅަން ހިމަނާފައިވާ ކަމަށެވެ.
