ކުދިން ސްކޫލަށް ދާއިރު މާސްކު އެޅުން މަޖުބޫރެއް ނޫން: އެޑިއުކޭޝަން މިނިސްޓްރީ
14 މާރިޗު 2022 | ހޯމަ 02:20މާސްކު އެޅުން މަޖުބޫރު ނުވިނަމަވެސް ބެލެނިވެރިޔާއާއި ދަރިވަރުން ބޭނުންވާނަމަ މާސްކު އަޅައިގެން ސްކޫލަށް ފޮނުވިދާނެ
ޖަމާލުއްދީން ސްކޫލުގެ 37 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތު
ކުދިން ސްކޫލަށް ދާއިރު މާސްކު އެޅުން މަޖުބޫރު ނުވާނެ ކަމަށް އެޑިއުކޭޝަން މިނިސްޓްރީން ބުނެފިއެވެ.
އެ މިނިސްޓްރީން ނެރުނު ބަޔާނެއްގައި ބުނީ މި ނިންމުން ނިންމާފައިވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ޢާންމު ތަންތަނުގައި އުޅޭއިރު މާސްކް އަޅަން ނުޖެހޭ ގޮތަށް ނިންމުމާއި ގުޅިގެން ކަަމަށެވެ.
ބައްޔަށް ޕޮޒިޓިވްވާ ރޭޓް %20 އަށްވުރެ ދަށްކޮށް އުޅޭ ރަށްރަށުގެ ސްކޫލްތަކަށް ދަރިވަރުން ފޮނުވާއިރު މާސްކު އެޅުން މަޖުބޫރު ނުވިނަމަވެސް ބެލެނިވެރިޔާއާއި ދަރިވަރުން ބޭނުންވާނަމަ މާސްކު އަޅައިގެން ސްކޫލަށް ފޮނުވިދާނެ ކަމަށް މިނިސްޓްރީން ބުނެއެވެ. އަދި ހައި ރިސްކް ދަރިވަރުން ސްކޫލަށް ހާޒިރުވާއިރު މާސްކު އެޅުމަކީ އެދެވިގެންވާ ކަމެއް ކަމަށް ވެސް ވަނީ ބުނެފައެވެ.
މީގެއިތުރުން އެޑިއުކޭޝަން މިނިސްޓްރީން ބުނީ ސްކޫލްގައި އުޅޭ ވަގުތުތަކުގައި މާސްކު އެޅުމަކީ މަޖުބޫރު ކަމެއް ކަމުގައި ނުވިނަމަވެސް، ރައްކާތެރިކަމުގެ ފިޔަވަޅުތަކެއްގެ ގޮތުން ސްކޫލްގައި ހުންބެލުމާއި ގިނަގިނައިން އަތްދޮވުމުގެ ކަންތައްތައް ކުރިއަށްދާނެ ކަމަށެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިނާއި އެއްގޮތަށް ސްކޫލުތަކުގައި ކިޔަވައިދެމުންދާއިރު، ސްކޫލުތައް ހުޅުވުނުއިރު ބައެއް ސެޝަންތައް ނަގައިދެމުންދަނީ ވަގުތު ކުރު ކުރުމަށްފަހުގައެވެ. އަދި މާލެ ސަރަހައްދުގައި ފެންނަ ކޭސްތަކުގެ އަދަދު ދަށްވުމާއި ގުޅިގެން މިހާރު ބައެއް ސްކޫލުތަކުގެ އިތުރު ހަރަކާތްތައް ވެސް ވަނީ ފަށާފައެވެ.
