އަންހެނުން އެކަކު އަނެކަކުގެ ކުރިއެރުމަށް އެހީތެރިވެދެއްވާ - އީވާ
މިޕްރޮގްރާމްގެ މަގްޞަދަކީ އަންހެނުންނާއިގުޅޭ ޤާނޫނުތަކާއި، ކުޑަކުދިންނާގުޅޭ ގޮތުން ހެދިފައިހުރި ޤާނޫނުތަކުގެ މަޢުލޫމާތު ފޯރުކޮށްދީ، ބާރުވެރިކުރުމަށް ބޭނުންވާ މަޢުލޫމާތު ވެސް ފޯރުކޮށްދިނުން
"އަންހެނުންގެ ސައްލާ" ނިންމުމުގެ ރަސްމިއްޔާތު
އަންހެނުން އެކަކު އަނެކަކުގެ ކުރިއެރުމަށް ވީވަރަކުން އެހީތެރިވުމަށް ރައްޔިތުން މަޖިލީހުގެ ނައިބު ރައީސް އީވާ އަބުދުﷲ އިލްތިމާސް ކުރައްވައިފިއެެވެ.
އީވާ މިހެން ވިދާޅުވީ، ކުޅުދުއްފުށީ ސިޓީ ކައުންސިލުން އިންތިޒާމުކޮށްގެން އަންހެނުން ބާރުވެރިކުރުވަން ބޭއްވި "އަންހެނުންގެ ސައްލާ" ނިންމުމުގެ ގޮތުން ހޮނިހިރު ދުވަހުގެ ރޭ އެސިތީގައި ބޭއްވި ބައްދަލްވުން ޝަރަފުވެރިކޮށްދެއްވާ ވާހަކަދައްކަވަމުންނެވެ.
މިބައްދަލްވުމުގައި ވާހަކަ ދައްކަވަމުން އިވާ ވިދާޅުވީ އަނެއް މީހާއަށް ކުރިއަށް ބޯޅަ ޖަހާލަ ދޭ ބަޔަކަށް އަޅުގަނޑުމެން އަންހެނުން ވާންޖެހޭކަމަށާއި، އަންހެނުންނަށް ކުރިއެރުން ލިބޭނީ އެއް އަންހެނަކު އަނެއް އަންހެނެއްގެ ކުރިއެރުމަށް މަސައްކަތް ކޮށްގެންކަމަށެވެ. އެގޮތުން އެކި ދާއިރާތަކުގައި ފިރިހެނުންނާއި ވާދަކުރާއިރު އަންހެނުންނަށް ވަރަށް ގިނަ ގޮންޖެހުންތަކާއި ކުރިމަތިވާކަން ފާހަގަކުރައްވާ އީވާ ވިދާޅުވީ، އަންހެނަކު ކަމަކާއި ކުރިމަތިލާނަމަ ގިނަ ހުރަސްތަކެއް ގިރާ ކުރަންޖެހޭކަމަށާއި، ފިރިހެނަކާއި އެއްހަމަޔަށް އާދެވެނީ އެމީހުންނަށްވުރެ 6 ގުނަ އަށް މަސައްކަތް ކޮށްގެންކަމަށެވެ. އެހެންނަމަވެސް ހިތްވަރު ދޫކޮށްނުލާ މަސައްކަތް ކުރާނަމަ ކާމިޔާބުވާނެކަމަށް އީވާ ވިދާޅުވިއެވެ.
މީގެ އިތުރުން އިވާ ވިދާޅުވީ، ރައްޔިތުން މަޖިލީހުގެ ކުޅުދުއްފުށީ ގޮނޑިއެއް ތަމްސީލުކުރަން އެ ސިޓީގެ އަންހެނަކު އެ މަޖީލީހުން ފެނުމަކީ ވަރަށްބޮޑު އުންމީދެއް ކަމަށެވެ.
ކުޅުދުއްފުށި ސިޓީ ކައުންސިލުން އިންތިޒާމްކޮށްގެން ކުރިއަށް ގެންދާ "އަންހެނުންގެ ސައްލާ" ސިލްސިލާގެ ފުރަތަމަ ހަރަކާތް ކާމިޔާބު ކަމަށާއި މިހަރަކާތުގައި 30 ފަރާތަކުން ބައިވެރިވިކަމަށް ސިޓީކައުންސިލުން ވިދާޅުވިއެވެ.
މި ހަރަކާތް ކުރިއަށް ގެންދާ މަޤްޞަދުތަކުގެ ތެރޭގައި މި ހަރަކާތް މެދުވެރިކޮށް އެ ސިޓީގެ އަންހެނުންނަށް، އަންހެނުންނާއިގުޅޭ ޤާނޫނުތަކާއި، ކުޑަކުދިންނާގުޅޭ ގޮތުން ހެދިފައިހުރި ޤާނޫނުތަކުގެ މަޢުލޫމާތު ފޯރުކޮށްދީ އިޖުތިމާޢީ، އިޤްތިޞާދީގޮތުން އަންހެނުން ބާރުވެރިކުރުމަށް ބޭނުންވާ މަޢުލޫމާތު ވެސް ފޯރުކޮށްދިނުން ހިމެނެއެވެ. އަދި ސިޓީގެ ކަންކަން ނިންމުމުގައި އަންހެނުންގެ ޚިޔާލާއި މަޝްވަރާ ހޯދުމަކީ ވެސް މި ހަރަކާތުގެ އެއް މަޤްޞަދެވެ.
ސިޓީ ކައުންސިލުން ވިދާޅުވީ މިއީ ސިލްސިލާކޮށް ކުރިއަށްގެންދަން ނިންމާފައިވާ ޕްރޮގްރާމެއްކަމަށާއި، ކުރިއަށް އޮތްތަނުގައި އަދި އިތުރު ދާއިރާތަކުން އަންހެނުންނަށް ހާއްޞަކޮށް މި ޕްރޮގްރާމްގައި ސައްލާކުރެވިގެންދާނެކަމަށެވެ.
