މަހުލޫފުގެ ޝަރީއަތުގެ އަޑުއެހުން ހައިކޯޓުގައި ތާވަލުކޮށްފި
މަހްލޫފުގެ ޝަރީއަތުގެ އަޑުއެހުން އޮތީ އާދީއްތަ ދުވަހުގެ މެންދުރު 2:00ގައި
ކްރިމިނަލް ކޯޓުގައި ބޭއްވި އަޑުއެހުމަކަށް މަހްލޫފް ކޯޓަށް ވަދެވަޑައިގަންނަވަނީ
އެމްއެމްޕީއާރުސީ ޚިޔާނާތުގެ ފައިސާ ލިބުނުކަމަށް ތުހުމަތުކޮށް ކުޅިވަރާއި ބެހޭ ވަޒީރު އަހުމަދު މަހްލޫފުގެ މައްޗަށް އުފުލާފައިވާ ދައުވާ ބާތިލުކުރުމާއި ގުޅިގެން، ހައިކޯޓުގައި އިސްތިއުނާފުކުރި މައްސަލައިގައި އަޑުއެހުމަށް އާދީއްތަ ދުވަހަށް ތާވަލުކޮށްފިއެވެ.
އެ މައްސަލަ ޕްރޮސެކިއުޓަރ ޖެނެރަލްގެ އޮފީހުން ހައިކޯޓުގައި އިސްތިއުނާފުކޮށްފައިވަނީ މި މަހުގެ 7 ވަނަ ދުވަހުއެވެ. އާދީއްތަ ދުވަހަށް ހައިކޯޓުގައި މަހްލޫފުގެ މައްސަލަ ތާވަލުކޮށްފައިވަނީ މެންދުރު 2:00އަށެވެ.
މަހުލޫފްގެ މައްސަލަ މަދަނީ މިންގަނޑުން ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ކަނޑައަޅައި މައްސަލަ ބޭރުކޮށްލީ މިމަހުގެ 1 ވަނަ ދުވަހުއެވެ. އެ މައްސަލަ ބޭރުކޮށްލީ ދައުލަތުން މައްސަލާގައި ހުށަހެޅި ހެކިތަކަކީ އެ ދައުވާ ކުރިއަށް ގެންދެވޭނެ ފަދަ ބުރަދަނެއް ނެތް ހެކިތަކެއްކަމަށް ކަނޑައެޅުމަށްފަހުގައެވެ.
މި މައްސަލައިގެ ފުރަތަމަ އަޑުއެހުން ކްރިމިނަލް ކޯޓުގައި ކުރިއަށް ގެންގޮސްފައިވަނީ 10 ފެބްރުއަރީ 2022ގައެވެ. އެ ދުވަހުގެ އަޑުއެހުމުގައި ދައުވާ ސާފުކޮށް، ދައުވާއަށް ޖަވާބުދާރީވުމުގެ ބައި ވަނީ ކުރިއަށް ގެންގޮސްފައެވެ.
އެ ދުވަހުގެ އަޑުއެހުމުގައި މަހުލޫފު ވަނީ ދައުވާއަށް އިންކާރުކުރައްވާފައެވެ. މަހުލޫފު ދައުވާއަށް އިންކާރު ކުރެއްވުމާ ގުޅިގެން ދެފަރާތުގެ ވެސް އެދުމުގެ މަތިން, ހެކި ހާމަކުރުމުގެ ބައި ވަނީ ކުރިއަށް ގެންގޮސްފައެވެ. އެގޮތުން ދައުލަތުން ޝަފަހީ 6 ހެއްކަކާއި ކިތާބީ 24 ހެއްކެއް ވަނީ ހުށަހަޅާފައެވެ. އަދި ދިފާއުން ޝަފަހީ 1 ހެއްކަކާއި، ކިތާބީ 4 ހެއްކެއް ވަނީ ހުށަހަޅާފައެވެ.
ދައުލަތުން ހުށަހަޅާފައިވާ ހެކިންގެ ތެރޭގައި, އެސްއޯއެފްގެ ރިސިޓަކާ ގުޅިގެން ހުށައަޅާފައިވާ ސްރީލަންކާގެ ރައްޔިތަކާއި، މި މައްސަލައިގެ މޯބައިލް ފޮރެންސިކް ރިޕޯޓު ތައްޔާރު ކުރި ފުލުސް އޮފިސަރަކާއި، އެ ރިޕޯޓު އެނަލައިޒްކުރި ބޭރުގެ ފަރާތަކާއި، ކުރީގެ ނައިބު ރައީސް އަހުމަދު އަދީބާއި، މ. ސެސްނާ، މުހައްމަދު އައްލާމް ލަތީފު (މޮހޯ), އަދި މ. ލޭންޑްއޮފްގާޑްން، އަހުމަދު އިޝްފާހް އަލީ ހިމެނެއެވެ.
ދިފާއުން ޝަފަހީ ހެކިންގެ ގޮތުގައި ހުށައަޅާފައިވަނީ މަހުލޫފުގެ އާއިލާ މެމްބަރެއްކަމަށްވާ އަލީ މުބީނެވެ.
އެ ދުވަހު ދެފަރާތުން ހެކި ހާމަކުރުމަށްފަހު ތަފްސީލީ ގޮތެއްގައި ހެއްކާ ގުޅޭގޮތުން ވާހަކަދައްކާފަައި ވެސް ވެއެވެ.
މި މައްސަލައިގައި އަންގާރަ ދުވަހު އޮތް އަޑުއެހުމުގައި ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ މައްސަލައެއް ނޫންކަމަށް ކަނޑައަޅުއްވައި ދައުވާ ބާތިލު ކުރައްވާފައެވެ.
އެސްއޯއެފްއިން އޭނާގެ އެކައުންޓަށް ޖަމާކޮށްފައިވާ ފައިސާއަކީ ޑޮލަރު ގަތުމުގެ މުއާމަލާތެއްގަައި ޖަމާކޮށްފައިވާ ފައިސާ ކަމަށް, އެކަމާ ގުޅިގެން ނެރުނު ބަޔާނެއްގައި މަހުލޫފް ވަނީ ވިދާޅުވެފައެވެ.
ޓްވީޓަކާއެކު ނެރުއްވި ބަޔާނެއްގައި މަހުލޫފު ވިދާޅުވީ, އެމުއާމަލާތަކީ އޭނާގެ އެއްބަނޑު އެއްބަފާ ކޮއްކޮ މެދުވެރިވެގެން ހިންގި "ސައްހަ ކަރަންސީ އެކްސްޗޭންޖްގެ މުއާމަލާތެއް" ކަމަށެވެ. އަދި އެ ފައިސާ އޭނާގެ އެކައުންޓަށް ޖަމާކުރަން ޖެހުނީ، މުއާމަލާތުގައި ހިމެނޭ "ދަ ޖީންސް" ފިހާރައިގެ ޑޮލަރު އެކައުންޓެއް ނެތުމުން ކަމަށް ވެސް މަހުލޫފު ވަނީ ވިދާޅުވެފައެވެ.
"ދަ ޖީންސް" ފިހާރައަކީ މަހުލޫފުގެ އާއިލީ ވިޔަފާރިއެއް ކަމަށް ބަޔާނުގައި އޭނާ ވަނީ ވިދާޅުވެފައެވެ. އެންމެ ފަހުން ބޭއްވި އަޑުއެހުމުގައިވެސް މަހުލޫފުގެ ފަރާތުން ބުނެފައިވަނީ މިއީ ކަނޑައެޅިގެން ސައްހަ, ޑޮލަރު މާރުކުރުމުގެ މުއާމަލާތަކުން ލިބިފައިވާ ފައިސާ ކަމަށެވެ.
