2023ގެ ރިޔާސީ އިންތިޚާބު: އިދާރީ މަސައްކަތްތައް ކުރިއަށްދޭ، އޮންލައިންކޮށް ރީ-ރަޖިސްޓަރކުރުމުގެ ފުރުސަތު ހުޅުވާލާނެ
ސޮފްޓްވެއަރގެ މަސައްކަތްތައް ކުރިއަށްދޭ
ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގެ ތެރެއިން
ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ ގޮތުން އިދާރީ މަސައްކަތްތައް ކުރިއަށްދާ ކަމަށާއި، އޮންލައިންކޮށް ރީ-ރަޖިސްޓަރކުރުމުގެ ފުރުސަތު ހުޅުވާލާނެކަމަށް އިލެކްޝަން ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެވެ.
އިލެކްޝަން ކޮމިޝަނުން ކުރަމުންދާ މަސައްކަތްތަކާއި، އިންތިޚާބުތަކަށް ވަމުންދާ ތައްޔާރީތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ހަސަން ވިދާޅުވީ, 2023ގެ ރިޔާސީ އިންތިޚާބަށް ތައްޔާރުވަމުންދާ ކަމަށާއި، އިދާރީ ގޮތުން ކުރަންޖެހޭ ވަރަށް ގިނަ މަސައްކަތްތައް ފަށާފައިވާ ކަމަށެވެ. އެގޮތުން ސޮފްޓްވެއަރއަށް ގެންނަންޖެހޭ ބަދަލުތައް ފާހަގަކޮށް އިތުރަށް ހަރުދަނާ ކުރުމުގެ މަސައްކަތްތައް ކުރިއަށްދާ ކަމަށް ހަސަން ވިދާޅުވިއެވެ. އިންތިޚާބުގެ މަސައްކަތްތައް އަމާންކަމާއެކު ކުރިއަށް ގެންދެވޭނެ އިންތިޒާމް ހަމަޖެއްސުމަށް ކުރަންޖެހޭ މަސައްކަތްތައް ކުރުމާއި، ރައްޔިތުންނަށް ފަސޭހައިން ޚިދުމަތް ދެވޭނެ ގޮތްތައް ފަހިކުރާނެކަމަށެވެ.
އޮންލައިންކޮށް ރީ-ރަޖިސްޓަރ ކުރުމުގެ ފުރުސަތު ހުޅުވާލާނެކަން ފާހަގަކުރައްވައި ހަސަން ވިދާޅުވީ, އޮންލައިން ފްލެޓްފޯމް އިތުރަށް ހަރުދަނާ ކުރުމުގެ މަސައްކަތް ކުރިއަށްދާ ކަމަށާއި، އިލެކްޝަން ކޮމިޝަން އޮފީހަށް ގިނަ ބަޔަކު އެއްފަހަރާ ޖަމާނުވެ ޚިދުމަތްތައް ލިބޭނެ މަގުފަހިކޮށްދޭނެ ކަމަށެވެ. އަދި މަސައްކަތް ކުރަނީ އޮންލައިން ސިސްޓަމަށް ބަދަލުކުރުމަށް ކަމަށެވެ.
މީގެ އިތުރުން ހަސަން ވިދާޅުވީ މޮނީޓަރުންނާއި އޮބްޒާވަރުންނާއި އަދި ކެންޑިޑޭޓުންގެ މަންދޫބުންނަށް, ވޯޓުލާ މަރުކަޒުގެ ތެރޭގައި މަސައްކަތް ކުރުމަށް ފަހި މާހައުލެއް ގާއިމްކޮށްދޭނެ ކަމަށެވެ. މީގެ ކުރީގެ އިންތިޚާބުތަކުގައި ބައެއް ވަސީލަތްތައް ގެންގުޅުމުގެ ބައެއް މައްސަލަތައް ފެންމަތިވެފައިވާއިރު، ކުރިއަށް އޮތް އިންތިޚާބުތަކުގައި އެފަދަ މައްސަލަތައް ދިމާނުވާނެ ގޮތަކަށް އިންތިޒާމްތައް ކުރާނެ ކަމަށް ހަސަން ވިދާޅުވިއެވެ.
ކުރީގެ އިންތިޚާބުތަކަށް އިޝާރާތް ކުރައްވައި ހަސަން ވިދާޅުވީ, ރިޔާސީ އިންތިޚާބުގައި އާއްމު ރައްޔިތުން ވަރަށް ހެނދުނާ ވޯޓުލާން ނުކުންނަ ކަމަށާއި، ގިނައިރު ކިޔުގައި މަޑު ކުރަންޖެހޭ ފަހަރު އަންނަ ކަމަށެވެ. އެހެންކަމުން ކުރިއަށް އޮތް އިންތިޚާބުތަކުގައި ގިނައިރު ކިޔުގައި މަޑުކުރަން ނުޖެހި ވޯޓުލެވޭނެ އިންތިޒާމްތައް ހަމަޖެއްސުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. އެއީ އޮފިޝަލުންނާއި ވޯޓުލާ މަރުކަޒުތައް އިތުރުކޮށް، ނުވަތަ އެއް މަރުކަޒަކަށް ވޯޓުލާން ޖެހޭ މީހުންގެ އަދަދު މަދުކޮށްގެން ވިޔަސް ހައްލު ގެންނާނެ ކަމެއްގެ ގޮތުގައި ހަސަން ފާހަގަކުރެއްވިއެވެ. އަދި ކުރިއަށް އޮތް ރިޔާސީ އިންތިޚާބުގައި ގާތްގަނޑަކަށް ދެލައްކަ ފަސްދޮޅަސްހާސް މީހުންނަށް ވޯޓުލުމުގެ ހައްގު ލިބޭނެ ކަމަށް އަންދާޒާ ކުރެވޭ ކަމަށް ހަސަން ވިދާޅުވިއެވެ.
