ލާމަރުކަޒީ އުސޫލު ކާމިޔާބުވާނީ އަތޮޅުތެރޭގައި ޚިދުމަތް ފޯރުކޮށްދޭނެ ފަންނީ ދިވެހިން އުފެދިގެން: މިނިސްޓަރ

ލާމަރުކަޒީ އުސޫލު ކާމިޔާބު ކުރެވޭނީ އަތޮޅުތެރޭގައި ޚިދުމަތް ފޯރުކޮށްދޭނެ ފަންނީ ތައުލީމީ ދިވެހިން އުފެއްދިގެން ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ ގައުމުގެ ތަރައްގީއަށް ބޭނުންވާ މީހުން ބިނާކުރުމުގެ ސިޔާސަތުގެ ދަށުން ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން ތަމްރީނުކުރުމަށްޓަކައި ޚާއްސަ ސްކޮލަރޝިޕް ސްކީމެއް ތައާރަފުކުރައްވަމުންނެވެ. މިނިސްޓަރ ވިދާޅުވީ މި ސަރުކާރުން އެންމެ އިސްކަމެއް ދޭ ކަމަކީ މީހުން ބިނާކުރުން ކަމަށާއި ލާމަރުކަޒީ އުސޫލު ކާމިޔާބު ކުރެވޭނީ އަތޮޅުތެރޭގައި ޚިދުމަތް ފޯރުކޮށްދޭނެ ފަންނީ ތައުލީމީ ދިވެހިން އުފެއްދިގެން ކަމަށެވެ.

މިނިސްޓަރ ވިދާޅުވީ އަތޮޅުތެރޭގެ ރީޖަނަލް ހޮސްޕިޓަލުތަކުގައި ސްޕެޝަލިސްޓުން ތަމްރީނުކުރަން ނިންމީ, އެ ޑޮކްޓަރުންގެ ޚިދުމަތް އެ ރީޖަނަލް ހޮސްޕިޓަލުތަކުގައި ލިބެން ހުރުމަކީ ކޮންމެހެން މުހިއްމު ކަމެއް ކަމުގައި ސަރުކާރަށް ގަބޫލު ކުރެވޭތީ ކަމަށެވެ.

ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން ތަމްރީނު ކުރުމަށް ހަމަޖެހިފައިވަނީ، ހުޅުމާލޭ ހޮސްޕިޓަލާއި 6 ރީޖަނަލް ހޮސްޕިޓަލަކުން އެދިފައިވާ ދާއިރާތަކާއި ލެވެލްތަކަށެވެ. އެ 6 ރީޖަނަލް ހޮސްޕިޓަލަކީ، އައްޑޫ އިކުއެޓޯރިއަލް ހޮސްޕިޓަލް، ކުޅުދުއްފުށީ ރީޖަނަލް ހޮސްޕިޓަލް، ލ. ގަން ރީޖަނަލް ހޮސްޕިޓަލް، ޑރ. އަބްދުސަމަދް މެމޯރިއަލް ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، މ. މުލީ ރީޖަނަލް ހޮސްޕިޓަލެވެ. އެ ހޮސްޕިޓަލްތަކުން ސުޕަރ ސްޕެޝަލްޓީ އަދި ސްޕެޝަލައިޒްޑް ޑޮކްޓަރުން 10 ދާއިރާއަކުން ތަމްރީނުކުރުމަށް އެދިފައިވާކަމަށް މިނިސްޓްރީން ބުނެފައިވެއެވެ.

އެ ދާއިރާތަކަކީ، ނެފްރޮލޮޖީ، ކާޑިއޯ ވެސްކިއުލަރ، ތޮރޭސިކް ސާރޖަރީ، އެންޑޯކްރައިނޮލިޖީ އެންޑް ޑައިބެޓިކް، ގޭސްޓްރޯއެންޓިރޯލޮޖީ އަދި ހެޕަޓޮލޮޖީ، އިންޓަރވެންޝަނަލް ރޭޑިއޮލޮޖީ، މެޑިކަލް އޮންކޮލޮޖީ، ޕީޑިއެޓްރިކް ނިއުރޯލޮޖީ، ރިއުމަޓޮލޮޖީ، ސަރޖިކަލް އޮންކޮލޮޖީއެވެ.

މި ސްކީމްގެ ދަށުން 15 ސްޕެޝަލައިޒްޑް ޑޮކްޓަރުން ތަމްރީނުކޮށް އެ ހޮސްޕިޓަލްތަކަށް ބޮންޑުކުރުމަށް ވަނީ ހަމަޖެހިފައެވެ.