ނަލަނަލަ ރާއްޖެ ވީޑިއޯ ލަވަ ލޯންޗުކޮށްފި
ލަވައިގެ އޮފިޝަލް ވީޑިއޯގައި ދިވެހިރާއްޖޭގެ ގުދުރަތީ ރީތި މަންޒަރުތައް ދައްކުވައިދޭ
ނަލަނަލަ ރާއްޖެ ވީޑިއޯ ލަވަ ލޯންޗުކުރުން
ފަތުރުވެރިކަމުގެ ރަން އަހަރުގެ މުނާސަބަތާއި "ނަލަނަލަ ރާއްޖެ" ވީޑިއޯ ލަވަ ރަސްމީކޮށް ލޯންޗުކޮށްފިއެވެ.
މި ލަވަ ލޯންޗުކުރުމަށް ސޯޝަލް ސެންޓަރުގައި ކުރިއަށް ގެންދި ޝޯގައި "ނަލަނަލަ ރާއްޖެ" ވީޑިއޯ ލަވަ ރަސްމީކޮށް ލޯންޗުކުރީ މުހައްމަދު މާޖިދު (މެޒޯ މޯޑް)އާއި އަބްދުއްރަޝީދު (އަބްސީ)އާއި އަދި ނިޝް ނާޝިދެވެ.
މި ވީޑިއޯ ލަވައަކީ މިނިސްޓްރީ އޮފް ޓުއަރިޒަމާއި މިއުޒިކް ޔޫނިއަން މޯލްޑިވްސްއާ ގުޅިގެން ތައްޔާރުކޮށްފައިވާ ވީޑިއޯ ލަވައެކެވެ. މި ހަފްލާގެ ތެރެއިން, ދިވެހިރާއްޖޭގެ ފަތުރުވެރިކަމަށް 50 އަހަރުފުރޭ މުނާސަބަތާ ގުޅުވައިގެން ޓުއަރިޒަމް މިނިސްޓްރީއިން ވަނީ ޚާއްސަ ޓިކްޓޮކް ޗެލެންޖެއް ވެސް ތައާރަފު ކޮށްފައެވެ. ޓިކްޓޮކް ޗެލެންޖް ހުޅުވާލެވިފައިވަނީ ރާއްޖެއާއި ރާއްޖޭން ބޭރުގެ ފަރާތްތަކަށްވެސް ބައިވެރިވެވޭ ގޮތަށެވެ. އެގޮތުން މިޓިކްޓޮކް ޗެލެންޖް 12 މާޗުން ފެށިގެން މެއި މަހުގެ 10 ވަނަ ދުވަހާ ހަމައަށް ކުރިއަށް ދާނެއެވެ.
ޓިކްޓޮކް ޗެލެންޖުގައި ބައިވެރިވާ މީހުންނަށް ވަރަށް ޚާއްސަ އަގުހުރި އިނާމްތަކެއް ވަނީ ހުށަހަޅާފައެވެ. އެގޮތުން ދިވެހިންގެ ކެޓަގަރީގައި 10،000ން މަތިން ފޮލޯވަރުން, އަދި 10،000ން ދަށުން ފޮލޯވަރުންގެ ލިބޭ ފަރާތްތަކުގެ ތެރެއިން އެއްވަނައަށް އަންނަ ކޮންމެ ފަރާތަކަށް 25000، ދެވަނައަށް އަންނަ ފަރާތްތަކަށް 15000, އަދި ތިންވަނައަށް އަންނަ ފަރާތްތަކަށް 10000 ރުފިޔާގެ ފައިސާގެ އިނާމްވަނީ ހުށަހަޅާފައެވެ. މި ޗެލެންޖްގައި ރާއްޖޭން ބޭރުން ބައިވެރިވާ މީހުންގެ ކެޓަގަރީގައި 1 މިލިއަނުން މަތިން ފޮލޯވަރުން, އަދި 1 މިލިއަނުން ދަށުން ފޮލޯވަރުން ލިބޭ ފަރާތްތަކުގެ އެއް ވަނައަށް އަންނަ ކޮންމެ ފަރާތަކަށް 8 ދުވަހުގެ ހޮލިޑޭ ޕެކޭޖެއް (2 މީހަކަށް), އަދި ދެވަނައަށް އަންނަ ފަރާތްތަކަށް 5 ދުވަހުގެ ހޮލިޑޭ ޕެކޭޖެއް (2 މީހަކަށް) ދިނުމަށް ވަނީ ހަމަޖެހިފައެވެ.
ޓޫރިޒަމް މިނިސްޓްރީން ބުނީ މި ޗެލެންޖުގައި ބައިވެރިވާ މީހުންނަށް މާކްސް ދިނުމަށްޓަަކައި ޚާއްސަ ޖަޖުންގެ ޕެނަލެއް ހިމެނޭ ކަމަށެވެ. އެގޮތުން އެންމެ ގިނަ ވިއުސް ހިމެނޭ ވީޑިއޯއަށް 35 މާކްސް ލިބިގެންދާއިރު އެންމެ ގިނަ ލައިކްސް ލިބޭ ވީޑިއޯއަަށް 25 މާކްސް ލިބިގެންދާނެއެވެ. އަދި އެންމެ ގިނަ ޝެއަރ ހިމެނޭ ވީޑިއޯއަށް 40 މާކްސް ލިބިގެންދާނެއެވެ. ވަނަ ވަނައަށް ދާ ފަރާތްތައް ޓޫރިޒަމް މިނިސްޓްރީގެ ސޯޝަލް މީޑިއާ އެކައުންޓްތަކުން މެއި 17 ވަނަ ދުވަހު އިއުލާން ކުރެވިގެންދާނެ ކަމަށް ވެސް މިނިސްޓްރީން ބުންޏެވެ.
