ލިވަޕޫލްގެ މިޞްރު ފޯވާޑް މުޙައްމަދު ޞަލާހުގެ އާ އެއްބަސްވުން އޮތީ ޞަލާގެ އަތްމަތީގައިކަމަށް ކޯޗު ޔާގެން ކްލޮޕް ބުނެފިއެވެ. ލިވަޕޫލްގެ އެއްވަނަ ފޯވާޑް ސަލާހުގެ ކުރިމަގާ ގުޅޭގޮތުން ކޯޗު ކްލޮޕް ބުނީ ގޮތް ނިންމުން އޮތީ ޞަލާހުގެ އަތްމަތީގައި ކަމަށާއި, ކްލަބުން ކުރަން ޖެހޭ ކަންކަން ފުރިހަމަކުރާނެކަމަށެވެ.
ސަލާހް ލިވަޕޫލާއެކު މިހާރު ހަދާފައިވާ އެއްބަސްވުން ހަމަވާނީ ކުރިއަށް އޮތް ސީޒަންގެ ނިޔަލަށެވެ. ކްލޮޕް އުއްމީދުކުރަނީ އޭނާގެ އެއްވަނަ ފޯވާޑް ކްލަބްގައި މަޑުކުރާނެކަމަށެވެ. އެކަމަކު އެކަމާމެދު ސަލާހް އަދި ގޮތެއް ނުނިންމައެއްވެ. އެއްބަސްވުން އާކުރާނެކަމަށްވެސް, އަދި ނުކުރާނެކަމަށްވެސް ނުބުނެއެވެ. ކްލޮޕް ބުނީ އަދި އަވަސްއަރުވާލައިގެން އުޅެން ނުޖެހޭކަމަށެވެ.
ސަލާހު ރޯމާއިން ލިވަޕޫލާ ގުޅުނީ 2017 ވަނަ އަހަރުއެވެ. މިދިޔަ މުއްދަތުގައި ލިވަޕޫލަށް ކުޅެދިން 237 މެޗުން އޭނާ ވަނީ 152 ގޯލް ޖަހާފައެވެ. އޭނާގެ އެހީތެރިކަމާއެކު އެމުއްދަތުގައި ލިވަޕޫލުން ވަނީ ޕްރިމިއަރ ލީގާއި, ޗެމްޕިއަންސްލީގުގެ އިތުރުން ލީގުކަޕާއި, ފީފާ ކްލަބް ވަރލްޑްކަޕާއި, ޔުއެފާ ސުޕަރކަޕްވެސް ހޯދާފައެވެ.
