މިއަންނަ ހަފްތާގައި ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ޓޭބަލް ޓެނިސް ލެޖެންޑް ޒޯރަން ޕްރިމޯރަކްއަށް ޔޫތު މިނިސްޓްރީން ދީފައިވާ ދައުވަތު ގަބޫލުކޮށްފިއެވެ.
މިހާރު ކުޅުން ހުއްޓާލާފައިވާ ޒޯރަން ވަނީ ދެފަހަރުގެ މަތިން ވޯލްޑް ކަޕް ކާމިޔާބުކޮށްފައެވެ. މީގެ އިތުރުން ޒޯރަން އަކީ އޮލިމްޕިކް ގޭމްސްގައި ހަތް ފަހަރުގެ މަތިން ވާދަކުރި ތިން އެތުލީޓުންގެ ތެރެއިން އެކަކެވެ. ކްރޮއޭޝިއާއަށް ނިސްބަތްވާ ޒޯރަން އައިޓީޓީއެފްގައި އެންމެ މަތިން ރޭންކު ކުރެވިފައިވަނީ ދެވަނައިގައެވެ.
ދުނިޔޭގެ ގިނަ ޤައުމުތަކުގައި ކުޅިވަރު އެވޯޑުތަކަކީ ވަރަށް ކުލަގަދަކޮށް ކުރާކަމެކެވެ. އެގޮތުން މިނިސްޓަރު ވިދާޅުވީ ރާއްޖެއިންވެސް މަސައްކަތް ކުރަމުން އަންނަނީ ވީހާވެސް ކުލަގަދަކޮށް، ބޭރުގެ ފަރާތްތަކުގެ ސަމާލުކަން ލިބޭނެ ފަދަ ގޮތަކަށް މަސައްކަތް ކުރުން ކަމަށެވެ.
މިހަފްލާގައި ބައިވެރިވާ ލެޖެންޑުން މެދުވެރިކޮށް އެތަށް މިލިއަން ބައެއްގެ މެދުގައި ރާއްޖެ ކުޅިވަރުގެ ޒަރިއްޔާއިން އިޝްތިހާރުވެގެންދާނެއެވެ. މިއީ ރާއްޖޭގެ ފަތުރުވެރިކަމަށްވެސް ލިބޭނެ ކުރިއެރުމަކަށް ވާއިރު، މިކަމަށް އެންމެހާ ބޭފުޅުންގެ ބައިވެރިވުމާއި އެއްބާރުލުން ދެއްވާވާނެކަމަށް ޔަޤީންކޮށް މިނިސްޓަރު ޝުކުރު އަދާކުރެއްވިއެވެ.
