ޕްރިންސިޕަލުން ތަމްރީނުކުރުމުގެ ޕްރޮގްރާމުގެ ތެރެއިން އިތުރު ބެޗެއް ތަމްރީނަށް ފޮނުވަނީ
މި ޕްރޮގްރާމުގެ ތެރެއިން 60 ޕްރިންސިޕަލުން ތަމްރީނުކުރުމަށް ޕްރޮޕޯސަލް ހުށަހަޅާފައިވޭ
ޕްރިންސިޕަލުންގެ ސްކޮލަރޝިޕް ޕްރޮގްރާމް އިފްތިތާހުކުރުމުގެ ރަސްމިއްޔާތު
ސަރުކާރުގެ ފަރާތުން ޕްރިންސިޕަލުން ތަމްރީނުކުރުމަށް އިފްތިތާހުކޮށްފައިވާ ޕްރޮގްރާމުގެ ތެރެއިން ދެވަނަ ބެޗެއް ތަމްރީނުކުރުމަށް ފޮނުވުމުގެ މަސައްކަތް ސެޕްޓެމްބަރު އިންޓޭކުގައި ފަށަން މަސައްކަތްކުރައްވަމުންދާކަމަށް އެޑިއުކޭޝަން މިނިސްޓްރީގެ ޕާމަނަންޓް ސެކެޓްރީ އަހުމަދު އަލީ ވިދާޅުވެއްޖެއެވެ.
ހުރިހާ ޚަރަދެއް ދޭގޮތަށް, 3 އަހަރު ދުވަހުގެ ތެރޭގައި ސަރުކާރުގެ ހުރިހާ ސްކޫލްތަކަށް ބޭނުންވާ ޕްރިންސިޕަލުން ތަމްރީނުކުރުމަށްޓަކައި ޕްރިންސިޕަލުން ތަމްރީނު ކުރުމުގެ ސްކޮލަރޝިޕް ޕްރޮގްރާމް މިހާރު ވަނީ އިފްތިތާހުކޮށްފައެވެ. މި ޕްރޮގްރާމާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އަހުމަދު އަލީ ވިދާޅުވީ މި ޕްރޮގްރާމުގެ ތެރެއިން 60 ޕްރިންސިޕަލުން ތަމްރީނުކުރުމަށް ޕްރޮޕޯސަލް ހުށަހަޅާފައިވާނެ ކަމަށެވެ.
މި ޕްރޮގްރާމުގެ ތެރެއިން ކިޔަވަން ފޮނުވާ މިއަހަރުގެ ފުރަތަމަ ބެޗުގެ ކިޔެވުން ފެބްރުއަރީ/މާޗް އިންޓޭކުގައި ކުރިއަށްދާނެކަމަށް އޭނާ ވިދާޅުވިއެވެ. މި ބެޗުގައި 20 ސްކޫލެއްގެ ޕްރިންސިޕަލެއް ތަމްރީނުކުރެވިގެންދާނެއެވެ. އަދި އެ 20 ޕްރިންސިޕަލުންނަށް ވަނީ ސްކޮލަރޝިޕަށް ހޮވުނު ކަމުގެ ލިޔުން ހަވާލުކޮށްފައެވެ. އެ ބޭފުޅުން ކިޔެވުން ފެއްޓެވުމަށްޓަކައި މި ހިނގާ މާރޗު މަހުގައި މެލޭޝިއާއަށް ދަތުރުކުރައްވާނެއެވެ.
އަހުމަދު އަލީ އިތުރަށް ވިދާޅުވީ މިއަހަރުގެ ސެޕްޓެމްބަރު އިންޓޭކުގައި އިތުރު ބެޗެއްގެ ޕްރިންސިޕަލުން ތަމްރީނުކުރުމަށް ފޮނުވުމަށް މަސައްކަތްކުރަމުންދާކަމަށެވެ. އަދި މިހާރު ރޭވިފައިވާގޮތަށް މި ޕްރޮގްރާމް ކުރިއަށްގެންގޮސް، 60 ޕްރިންސިޕަލުން ތަމްރީނުކުރެވޭނެ ކަމަށް އޭނާ ވިދާޅުވިއެވެ.
މި ޕްރޮގްރާމުގެ ފުރަތަމަ ބެޗަށް ހޮވިފައިވާ ޕްރިންސިޕަލުން މެލޭޝިއާގެ ޔުނިވަރސިޓީ އޮފް މަލާޔާއިން މާސްޓަރސް އޮފް އެޑިޔުކޭޝަނަލް މެނޭޖްމަންޓް ކޯސް ފުރިހަމަކުރާނެއެވެ. އަދި އެ ކޯސް ފުރިހަމަކުރުމަށްފަހު 2023 ވަނަ އަހަރުގެ އެޕްރީލް މަހު, ޕްރިންސިޕަލުންގެ ގޮތުގައި ރާއްޖޭގެސްކޫލުތަކުގައި މަސައްކަތްކުރައްވަން ފައްޓަވާނެއެވެ. ދިވެހިރާއްޖޭގެ ސްކޫލްތަކަށް ރަނގަޅު ފެންވަރުގެ ޕްރިންސިޕަލުން ހޯދުމުގެ މަސައްކަތް އެކިފަހަރުއެކިގޮތަށް ކުރެވުނު ނަމަވެސް, ދެމެހެއްޓެނިވި ގޮތެއްގައި އަދި ރޭވުންތެރި ގޮތެއްގައި ދިވެހި ޕްރިންސިޕަލުން ތަމްރީނުކުރުމުގެ ޕްރޮގްރާމެއް ފަހުގެ ތާރީޚެއްގައި ހިންގިފައެއްނުވެއެވެ.
ސަރުކާރުން ހިންގާ 216 ސްކޫލު ރާއްޖޭގެ އެކިކަންކޮޅުގައި ހުރިއިރު އެއްވެސް ދުވަސްވަރެއްގައި ހުރިހާ ސްކޫލެއްގައި ތަމްރީނުވެފައިވާ ޕްރިންސިޕަލުން ހަމަވެފައެއްނުވެއެވެ. މިވަގުތުވެސް ރާއްޖޭގައި ދާއިމީ ޕްރިންސިޕަލެއް ނެތް 53 ސްކޫލް ހުރި އިރު، ދާއިރާގައި މަސައްކަތް ކުރައްވާ ދާއިމީ ޕްރިންސިޕަލުންގެ ތެރެއިންވެސް ތަމްރީނު ލިބިވަޑައިގެން ތިއްބެވީ 75 ބޭފުޅުންނެވެ. 3 އަހަރު ދުވަހުގެ މުއްދަތަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމްނިމޭއިރު ސަރުކާރުން ހިންގާ ހުރިހާ ސްކޫލަކަށް ތަމްރީނު ލިބިފައިވާ ދިވެހި ޕްރިންސިޕަލުން ހަމަވާނެއެވެ.
