ޟަމީރުގެ ގައިދީންނަށް ޕާޓީގެ މެމްބަރުން ނުހައްދަވާނެ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ރައްޔިތުންގެ މަޖިލީހުގައި ވާހަކަދައްކަވަމުން އިންތި ވިދާޅުވީ، ސަރުކާރު ހިއްސަވާ ކުންފުނިތަކާއި، ސަރުކާރުގެ ބައެއް ސިޔަސީ ބޭފުޅުން އަމަލު ކުރައްވާ ގޮތުން ގަނޫނު އަސާސީން ލިބިދޭ ހަމަހަމަކަން ރައްޔިތުންނަށް ގެއްލިފައިވާ ކަމަށެވެ. ވެރިކަން ކުރާ ޕާޓީގެ އިންތިޚާބަކާއި ގުޅިގެން ބައެއް ކުންފުނިތަކުގެ ވެރިން މަގާމުގެ ނަހަމަ ބޭނުން ކުރައްވާ ކަމަށެވެ. ވަޒީފާ ދިނުމާއި، ވަކި ކެންޑިޑޭޓަކަށް ތާއީދުކުރުމުން ވަޒީފާގެ ބިރުދައްކަމުންދާ ކަމަށް އިންތި ވިދާޅުވިއެވެ. އަދި މިއީ ދައުލަތުގެ ފައިސާއަށް ވެވޭ ޚިޔަނާތެއް ކަމުގައި އިންތި ވިދާޅުވިއެވެ.
ސަރުކާރުގެ ކުންފުނިތަކަށް ކަންކަމުގައި ދިޔުމުން، މި އިންތިޚާބާއި ގުޅިގެން މަޖުބޫރީ ހާލަތަކަށް އެ މީހާ ވައްޓާލާ ކަމަށް އިންތި ތުހުމަތުކުރެއްވިއެވެ. އަދި ބޭނުންވާ ކެންޑިޑޭޓަކަށް ތާއީދުކޮށް ޚިޔާލުފާޅުކުރުންވެސް މަނާކޮށް މީހާގެ ޟަމީރު ހިފަހައްޓައި ޟަމީރުގެ ގައިދީއަކަށް މީހާވުމަށް މަޖުބޫރުކުރުވާ ކަަމަށާއި މިއީ އެމްޑީޕީގެ ވިސްނުމެއް ނޫން ކަމަށް އަދި އެމަނިކުފާނުގެ ޗެއާޕާރސަން ކަމުގެ ދަށުން އެކަން އެގޮތަށް ހިންގަން ފުރުސަތު ނުދެއްވާނެ ކަމުގައިވެސް އިންތި ވިދާޅުވިއެވެ.
އިންތި ވަނީ އިކޮނޮމިކް މިނިސްޓަރު ފައްޔާޒަށް އަމާޒުކުރައްވާ ބަހުގެ ހަމަލާތަކެއްވެސް ރައްދު ކުރައްވާފައެވެ.
އިންތި ވިދާޅުވީ، އިކޮނޮމިކް މިނިސްޓްރީ ތެރެއިން ހަދަމުންދާ ރިސޯޓެއްގެ ނަމުގައި އޮޅުވާލައިިގެން ވަގު ކޯޓާތަކެއް ބޭރުވެގެން ދިޔައިރު އެކަމަށް ޒިންމާވާނެ ބޭފުޅަކުވެސް ނެތް ކަމަށެެވެ. އަދި އެ މައްސަލަ ބެލިފައިވެސް ނެތް ކަމަށެވެ. އަދި އިންތި ވިދާޅުވީ ސަރުކާރަށް ޖެއްސުން ކުރާ ކަަމަށް ބުނެ ބައެއް މެމްބަރުން ވާހަކަދައްކަވަނީ ވެންޓިލޭޓަރުގެ ޚިޔާނާތާއި އެމްއެމްޕީއާރްސީގެ ޚިޔަނާތުގެ މައްސަލަ ފަދަ މައްސަލަތައް ނުބެލި އޮތުމުން އެވަހަކަދައްކާތީ ކަމަށެވެ.
ވެންޓިލޭޓަރު މައްސަލައަކީވެސް ރައްޔިތުން ދެރަ ނިކަމެތި ހާލަތެއްގައި ތިއްބާ ރޭވި އިންތިޒާމުވެގެން ހިންގި ބޮޑު ޚިޔާނާތެއް ކަމަށާއި، އެމްޑީޕީގެ ސަރުކާރެއް އޮވެގެން އެނގި ތިބެ ހިންގި ޚިޔަނާތެއް ކަމަށް އިންތި ވިދާޅުވިއެވެ.
އެމްޑީޕީގެ ވެރިކަމެއްގައި ރައްޔިތުންނަށް ޚިޔާނާތްތެރިވަމުންދާތީ ކަންބޮޑުވާ ކަމަށާއި، ޕާޓީގެ މަގްސަދާ އިދިކޮޅަށް ޕާޓީ ގެންދިޔުމަށް ކުރާ މަސައްކަތް ކުއްވެރިކުރާ ކަމަށް އިންތި ވިދާޅުވިއެވެ. އެކަމަށް ފުރުސަތު ނުދެއްވާނެކަމަށްވެސް އިންތި ވިދާޅުވިއެވެ.
