އަންނަ އަހަރުގެ ބަޖެޓުގައި ކުޅުދުއްފުށި މަގުހެދުމުގެ ފޭސް 3 ހިމެނިގެންދާނެ - އެމްޕީ ޔާސިރު
9 މާރިޗު 2022 | ބުދަ 06:08ދެވަނަ ފިޔަވަހީގެ މަޝްރޫގެ ދަށުން, ކުޅުދުއްފުށި ސިޓީގެ 23 މަގެއް ޒަމާނީ ފެންވަރަށް ތަރައްގީކުރުމަށް ވަނީ ހަމަޖެހިފައި
ކުޅުދުއްފުށި މަގުހެދުމުގެ ދެވަނަ ފިޔަވަހި ފެށުމުގެ ރަސްމިއްޔާތުގައި އެމްޕީ ޔާސިރު ވާހަކަދައްކަވަނީ
އަންނަ އަހަރުގެ ބަޖެޓުގައި ކުޅުދުއްފުށި ސިޓީ މަގުހެދުމުގެ ފޭސް 3 ހިމެނިގެންދާނެކަމަށް ކުޅުދުއްފުށި އުތުރު ދާއިރާގެ މަޖްލިސް މެމްބަރު ޔާސިރު އަބްދުއްލަތީފް ވިދާޅުވެއްޖެއެވެ.
ކުޅުދުއްފުށި ސިޓީ މަގުހެދުމުގެ ދެވަނަ ފިޔަވަހީގެ މަސައްކަތް ރަސްމީކޮށް ފެށުމަށް އަންގާރަ ދުވަހު ހަވީރު ބޭއްވި ރަސްމިއްޔާތުގައި ޔާސިރު ވިދާޅުވީ ކުޅުދުއްފުށި ސިޓީގެ މަގުހެދުމުގެ ފޭސް 3 އަންނަ އަހަރުގެ ބަޖެޓުގައި ހިމެނިގެންދާނެކަމީ ޔަގީންކަމެއްކަމުގައެވެ.
ކުޅުދުއްފުށި ސިޓީގެ މަގުތައް ރަނގަޅު ފެންވަރަށް ތަރައްޤީ ކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ވައުދެއްކަމަށާއި، އެވައުދާއި އެއްގޮތަށް ކުޅުދުއްފުށި މަގުތައް ނިންމާނީ ރައްޔިތުން އެދޭފަދަ ފުރިހަމަ މަގުތަކެއްގެ ގޮތަށް ތަރައްޤީކޮށްފައިކަމުގައި ވެސް ޔާސިރު ވިދާޅުވިއެވެ.
ޔާސިރު އިތުރަށް ވިދާޅުވީ ކުޅުދުއްފުށި މަގުހެދުމުގެ 2 ވަނަ ފިޔަވަހި ފެށިގެންދާއިރު ރައްޔިތުންގެ ހިޔާލާއި މަޝްވަރާ އޭގައި ހިމެނޭގޮތަށް ކަންކަން ތަރުތީބުކުރެވި އަތުރާލެވިގެންދާކަމީ ވަރަށް އުފާވާކަމެއްކަމަށާއި އެކަމަށްޓަކައި މޭޔަރަށާއި ކައުންސިލް މެންބަރުންނަށް ޝުކުރު އަދާކުރައްވާ ކަމުގައެވެ. އަދި ކައުންސިލުން އެދުނު ބަދަލުތަކާއެކު މި މަޝްރޫގެ އަގު ދެގުނަ އިތުރުވެގެން ގޮސްފައިވާކަމަށްވެސް ޔާސިރު ވިދާޅުވިއެވެ. އެގޮތުން ދެވަނަ ފިޔަވަހީގެ މަޝްރޫއު 100.7 މިލިއަން ރުފިޔާއަށް ހަވާލުކުރި ނަމަވެސް ގެނެވުނު ބަދަލުތަކާއެކު 200 މިލިއަނާއި ކައިރުކުރާކަމަށް ޔާސިރު ވިދާޅުވިއެވެ.
މީގެއިތުރުން އާރުޑީސީގެ އެމްޑީއަކީ ހީވާގި ކެރޭ ބޭފުޅެއްކަމަށާއި، އަމަލީ މަސައްކަތް ފެށުން ކުޑަތަންކޮޅެއް ލަސްވިކަމުގައިވިއަސް އެބޭފުޅާގެ ތޫނު ވިސްނުން ފުޅާއެކު ކަނޑައެޅިފައިވާ މުއްދަތުގެ ތެރޭގައި ކުޅުދުއްފުށި ރައްޔިތުންނަށް ލިބިގެންދާނީ ރީތި މަގުތަކެއްކަމަށް ޔަގީންކުރައްވާކަމަށް ޔާސިރު ވިދާޅުވިއެވެ.
ޑިޒައިން އެންޑް ބިލްޑް އުސޫލުން ކުރިއަށްގެންދާ ދެވަނަ ފިޔަވަހީގެ މަޝްރޫގެ ދަށުން, ކުޅުދުއްފުށި ސިޓީގެ 23 މަގެއް ޒަމާނީ ފެންވަރަށް ތަރައްގީކުރުމަށް ވަނީ ހަމަޖެހިފައެވެ.
